03/08/2026
മീര രാജീവ് Meera Rajiv പതിനെട്ടാപതിനെട്ടാമത്തെ നിറം വായിക്കുന്നു.
#പതിനെട്ടാമത്തെനിറം 📚
✨വി. കെ. അനിൽ കുമാർ ✒️
പൂരമാലയിലെ നിറങ്ങളിൽ അവസാനത്തെ പതിനെട്ടാം നിറവുമാടി ദാമോദരൻ പണിക്കർ കരി വിളക്ക് താഴ്ത്തി അണിയറയിലേക്ക് മറയുമ്പോൾ ബാക്കിയാവുന്നത് ഒരു ചരിത്രമാണ്. രേഖപ്പെട്ട ചരിത്രങ്ങൾക്കപ്പുറമുള്ള ചരിത്രം. എല്ലാ പ്രതികൂലങ്ങളെയും മറികടന്ന് മഹാജ്ഞാനത്തിന്റെ കേദാരങ്ങൾ കൊത്തിക്കിളച്ച മനുഷ്യൻ.
അത്യുത്തര കേരളത്തിലെ ഒരു പ്രാചീന രൂപമാണ് പൂരക്കളി എന്ന അനുഷ്ഠാനം. മറത്തുകളി അതിന്റെ ഭാഗമായി പിന്നീട് ഉടലെടുത്തതാവണം
ഉത്തര കേരളത്തിലെ കരിവെള്ളൂർ ദേശം പൂരം കളിക്കും മറത്തു കളിക്കും ഏറെ പ്രസിദ്ധി ഉള്ളതാണ്. കരിവെള്ളൂരിന്റെ പടിഞ്ഞാറെ കരയാണ് കുനിയൻ കൈപ്പാടുകളും നെൽവയലുകളുംഇടകലർന്ന പാടിപ്പുഴയുടെ തീരം.ഇവിടെ ഒരുപാട് കർഷക സമരങ്ങൾ നടന്നിട്ടുണ്ട്..ഈ കുണിയനിൽ ആണ് ദാമോദരൻ പണിക്കർ ജനിച്ചത് അതേ കണ്ടത്തിലും കൈപ്പാടിലും ആണ് ജീവിതത്തിലെ പതിനെട്ടു നിറങ്ങളും ദാമോദരൻ
ആടി തെളിഞ്ഞത്.
ദാമോദരൻ എന്ന കലാകാരൻ കയറി വന്ന ചരിത്ര ഭൂമികയിലേക്കാണ് ഈ പുസ്തകം നമ്മളെ കൊണ്ടുപോകുന്നത്.
വിജ്ഞാനത്തിന്റെ എല്ലാ മേഖലകളും ഉഴുതുമറിച്ച ഒരു മനുഷ്യൻ. അദ്ദേഹം ഒരു ദേശമാണ് ഒരു ചരിത്രമാണ്. വായിച്ചുതീർക്കാൻ ആകാത്ത അത്രയും അടരുകളുള്ള ഒരു മാനവ ചരിത്രം തന്നെയാണത്.
ജന്മിത്വവും അയിത്തവും കൊടികുത്തി വാണിരുന്ന കാലം.
വിദ്യയും കലയും സാഹിത്യവും ഒക്കെ അന്ന് സവർണ്ണരുടെ മാത്രം കുത്തകയായിരുന്നു.
സംസ്കൃതം പോലുള്ള ഭാഷ പഠിക്കാൻ അന്ന് കീഴാളന്മാർക്ക് പാടില്ലായിരുന്നു. എന്നാൽ സ്വന്തം ഇച്ഛാശക്തി കൊണ്ട് സംസ്കൃതവും മറ്റു വിജ്ഞാന മണ്ഡലങ്ങളും കയ്യടക്കിയ മനുഷ്യൻ.
കേരളത്തിന് ഒരു ഇരുണ്ട ഭൂതകാല ചരിത്രമുണ്ട്. ആ കാലം നമ്മളെ അസ്വസ്ഥപ്പെടുത്തുന്ന ഒന്നായിരുന്നു.
സവർണാധികാരത്തിന്റെ ഹിംസാത്മക സമീപനങ്ങൾക്കെതിരെ പ്രയോഗിക്കാവുന്ന ഏറ്റവും ശക്തമായ ജൈവായുധങ്ങളാണ് നമ്മുടെ ദൈവവും മറത്തുകളിയും.
പക്ഷേ അതേ അധികാരശക്തികൾ തന്നെ ദൈവത്തെ മറത്തുകളിയെയും അവരുടെ ആയുധങ്ങളാക്കി പരിവർത്തിപ്പിക്കുന്ന രാഷ്ട്രീയ സാഹചര്യത്തിലാണ് ഇന്നുള്ളത്. അഹിന്ദുക്കൾക്ക് പ്രവേശനമില്ലെന്ന് ദൈവവും പൂരവും നടക്കുന്ന കാവുകളിൽ വലിയ ബോർഡുകൾ എഴുതി പ്രദർശിപ്പിക്കുമ്പോൾ ആദ്യം പുറത്തു പോകേണ്ട അഹിന്ദു ആരാണ്? നാം എതിർത്ത് തോൽപ്പിച്ചത് എന്തൊക്കെയാണോ അതൊക്കെ വീണ്ടും തിരിച്ചുവരികയാണ്.
ദാമോദരൻ എന്ന കീഴാളൻ ഒരു ചരിത്രം ആകുന്നതിന്റെ ചരിത്രപരമായ പ്രസക്തി അത്ര നിസ്സാരമല്ല.
ചരിത്രത്തിന്റെ വിസ്മൃതിയിലേക്ക് മറഞ്ഞു കൊണ്ടിരിക്കുന്ന ഒരു കലയെയും കലാകാരനെയും പുതിയ തലമുറയ്ക്ക് പരിചയപ്പെടുത്തുക എന്നുള്ള ഒരു വലിയൊരു ഉത്തരവാദിത്തമാണ് എഴുത്തുകാരൻ ഈ പുസ്തകത്തിലൂടെ നിർവഹിച്ചിരിക്കുന്നത്. ദാമോദരപ്പണിക്കർ വെറുമൊരു പൂരക്കളി പണിക്കർ അല്ല... ചരിത്രത്തിന്റെ മറ്റൊരു ബദലാണ്.
പരിമിതമായ കാല ദേശത്തിനുള്ളിൽ ഒരു മനുഷ്യന്റെ അടയാളപ്പെടുത്തലുകളാണ് അയാളുടെ ജീവിതം.
അത്തരം ജീവിതങ്ങളുടെ ഒരു വീണ്ടെടുപ്പ് കൂടിയാണ് ഈ പുസ്തകം.
പൂരക്കളി,മറത്തുകളി എന്നിങ്ങനെയുള്ള ഉത്തര കേരളത്തിന്റെ തനതായ കലാരൂപങ്ങളുടെ പഠനം അർഹിക്കുന്ന ഒരു പുസ്തകം കൂടിയാണ്
വി. കെ. അനിൽകുമാറിന്റെ പതിനെട്ടാമത്തെ നിറം....
മികച്ച പുസ്തകങ്ങൾ മിതമായ നിരക്കിൽ സ്വന്തമാക്കാൻ വിലാസം വാട്സാപ്പ് ചെയ്യൂ 👇👇👇
http://wa.me/+919539234343
📲☎️9539234343
Kairali Books 📖📖
