18/06/2020
Doston, hum is duniya mein khud ki marzi se nahi aaye. Na jaane pichhle janmon ke kitne punya karmon ke baad hamein maanav yoni mein janm mila hai.Hamare maa baap ne apne saamarthya se kahin zyada hum bachon ko sab kuchh diya hai.Maa baap apne bachchon se jitna pyaar karte hain,shabdon mein kabhi bayaan nahi kiya ja sakta.Shayad isi liye unhe dharti pe bhagwaan ka doosra roop kaha jaata hai.Zindagi mein sukh dukh aate jaate rehta hai.kuchh bhi sthir nahi.Jaise aaj raat hai to kal subah honi hi hai. Agar aaj dukh hai to kal sukh aana hi hai. Isliye aap sabhi se request hai ki,apni zindagi ke kathin daur mein kabhi himmat na haarein. kabhi koi galat step na uthaayein.Yadi poori duniya bhi aap se nafrat karne lage to bhi yaad kijiye ki aapke parents hamesha aapse sachcha pyaar karenge.Unki taakat banein.Baaki galat karne waalon ko unke haal pe chhod dijiye.Kyunki ek bahut badi adalat hai jahan sifarish nahi chalti.wahan sirf sachcha nyaay hota hai. Koi shakti to zaroor hai jo is poori srishti ko niyamit roop se chala rahi hai. Ishwar pe vishwas rakhein. Jaana to har kisi ko hai ek din lekin jis tarah duniya mein aane ka faisla hamara nahi tha, usi tarah jaane ka faisla bhi upparwaale ke haath chhod dein.Manzil to ek na ek din aa hi jaayegi,lekin jeevan ki is yaatra ka muskurate huye anand lijiye. Is waqt poora vishwa bahut kathin daur se guzar raha hai.Nafrat bhare post,ek doosre pe kataaksh,ek doosre ka mazaak udana band karte huye ek doosre ko protsaahit karein.Positive baaton ko share karein.Imaandaari se apna karm karein aur ek doosre ko pyaar baantein.
