23/02/2026
नांदेड : ‘नांदेड भूषण’ पुरस्काराने अशोकराव चव्हाण यांचा गौरव
नांदेड येथे आयोजित ‘नरेंद्र–देवेंद्र महोत्सवा’त पं. दीनदयाल उपाध्याय स्मृती प्रतिष्ठान तर्फे माजी मुख्यमंत्री तथा खासदार अशोकराव चव्हाण यांना ‘नांदेड भूषण’ पुरस्कार प्रदान करण्यात आला. नवा मोंढा मैदानावर हजारो नागरिकांच्या उपस्थितीत हा भव्य सन्मान सोहळा उत्साहात पार पडला.
पुरस्कार स्वीकारताना खा. चव्हाण यांनी मनोगत व्यक्त करताना सांगितले की, राज्य व देशपातळीवर अनेक सन्मान मिळाले असले तरी आपल्या मातीत, आपल्या लोकांकडून मिळणारा सन्मान हा कोणत्याही पुरस्कारापेक्षा श्रेष्ठ असतो. “नांदेडकरांनी दिलेली ही पावती माझ्यासाठी अत्यंत मोलाची आहे,” असे त्यांनी नमूद केले.
सामाजिक क्षेत्रात उल्लेखनीय कार्य करणारे अॅड. दिलीप ठाकूर यांचे त्यांनी विशेष कौतुक केले. निराधारांच्या जीवनात आनंद निर्माण करण्यासाठी त्यांच्या कार्याला आपण खंबीर पाठबळ देणार असल्याचे त्यांनी सांगितले. मनपामार्फत त्यांच्या कविसंमेलनासाठी आर्थिक सहाय्य देण्याबाबतही त्यांनी सूचनाही केल्या.
संत बाबा बलविंदरसिंघजी यांच्या हस्ते स्मृतिचिन्ह, मानपत्र, महावस्त्र व रोख रुपये ११,००० देऊन खा. चव्हाण यांचा सन्मान करण्यात आला.
या कार्यक्रमाचे स्वागताध्यक्ष म्हणून माझ्याहस्ते व्यासपीठावरील मान्यवरांचा सत्कार करण्यात आला. यावेळी माजी मंत्री डी. पी. सावंत, भाजपा शहराध्यक्ष अमर राजुरकर, महापौर कविता मुळे, उपमहापौर दीपकसिंह रावत, कृषि उत्पन्न बाजार समितीचे सभापती संजय लहानकर तसेच इतर मान्यवर उपस्थित होते.
संयोजक अॅड. दिलीप ठाकूर यांनी प्रास्ताविकात खा. चव्हाण यांच्या कार्याचा आढावा घेतला. पुढील काळात कवी संमेलन अधिक भव्य करण्याचा मानस व्यक्त करत प्रसिद्ध कवी कुमार विश्वास यांना आमंत्रित करण्याची इच्छा त्यांनी व्यक्त केली. कार्यक्रमासाठी मनपामार्फत निधी उपलब्ध करून देण्याची मागणीही त्यांनी केली.
सूत्रसंचालन संतोष देवराय यांनी तर आभार दिनेशसिंह ठाकूर यांनी मानले. कार्यक्रमाच्या यशस्वी आयोजनासाठी अनेक कार्यकर्त्यांनी परिश्रम घेतले.
एकंदरीत, ‘नांदेड भूषण’ पुरस्कार सोहळा उत्साहपूर्ण वातावरणात पार पडला असून नागरिकांनी मोठ्या संख्येने उपस्थित राहून खा. अशोकराव चव्हाण यांच्या कार्याचा गौरव केला.
