01/03/2021
#តើនាងជានរណា?
បេះដូងរបស់នាង គឺជាបេះដូងស្មោះត្រង់ ដួងចិត្តថ្លាឆ្វង់បរិសុទ្ធ ឥតមានងាករេ ។ ប៉ុន្តែដំណើរជីវិតនៃស្នេហារបស់នាង វាបានធ្វើឱ្យបេះដូងនាងច្រៀកជាចម្រៀកតូចៗ ដោយពុំដឹងថាផ្គុំជាប់គ្នាវិញដោយរបៀបណា ។ នាងជាមនុស្សមានគូច្រើន ត្បិតចរិតរបស់នាងអាចសម្របខ្លួនរស់នៅនឹងបុរសគ្រប់ប្រភេទបាន តែបេះដូងនាងនៅតែមិនអាចដាក់បុរសណាម្នាក់ជំនួសអ្នកបានឡើយ ។
តើនាងគឺជានរណា? នាងគឺជា "ភាពស្មោះត្រង់" ។ នាងសុខចិត្តជ្រើសយកការឈឺចាប់មកធ្វើជាមិត្តស្និទ្ធស្នាល រស់នៅជាមួយភាពស្ងៀមស្ងាត់ និងយកតំណក់ទឹកភ្នែកធ្វើជាទីប្រឹក្សា ។ ពេលណានាងឈឺចាប់ខ្លាំង
រហូតទ្រាំមិនបាន គឺតំណក់ទឹកភ្នែកដែលមានរសជាតិប្រៃដូចសមុទ្រ នឹងចេញមកលួងលោមប្រលោមអារម្មណ៍របស់នាងឱ្យធូរស្រាលបណ្ដោះអាសន្នអន់មួយគ្រា ។
ខ្ញុំយល់អារម្មណ៍មនោសញ្ចេតនាដ៏ជ្រាលជ្រៅដែលមានក្នុងបេះដូងរបស់នាង តែខ្ញុំជួយនាងមិនបានទេ ដ្បិតការឈឺចាប់វាត្រូវការពេលវេលាព្យាបាល ។ ទឹកល្អក់ត្រូវការពេលវេលាដើម្បីឱ្យថ្លាវិញ រីឯការឈឺចាប់របស់នាងក៏ត្រូវការពេលវេលាដូចគ្នាដែរ ។ ខ្ញុំចង់នៅក្បែរនាងគ្រប់ពេលវេលា តែនាងគ្មានអារម្មណ៍មកចង់នៅក្បែរខ្ញុំទេ ។ ខ្ញុំចង់លួងលោមនាងរាល់ ពេលណាដែលនាងមិនសប្បាយចិត្ត តែនាងគ្មានស្នាមញញឹម និងភាពរឹងមាំមកអង្គុយជាមួយខ្ញុំឡើយ ។ តើខ្ញុំជានរណា? ខ្ញុំគឺជា "សៀវភៅ"។
ដកស្រង់ចេញពីសៀវភៅ #អំណានជាអំណាច
និពន្ធដោយ ឡាំ លីម
