04/09/2026
چیرۆکی “پاڵتۆ” لە نووسینی: نیکۆلای گۆگۆل
وەرگێڕانی: بەڕێز “کەیوان هەورامی”
ئەکاکی ئەکاکیڤیچ، کارمەندێکی سادە و هەژاری ناو فەرمانگەیەکی شاری پیترسبۆرگی ڕووسیایە. کارەکەی کۆپیکردنەوەی دەقی نامە و دەستنووسەکانە.
بە موچەیەکی کەم و بە ژیانێکی سادەی مەمرە و مەژییەوە، ئەم مرۆڤە سادە و بچوکە، کات تێدەپەڕێنێ و ڕازییە بەوەی هەیەتی.
مرۆڤێک، نە لە بەژن و باڵادا، نە لە ڕوخسار و پێگەی بنەماڵەیی و ساماندا، تەنانەت لەباری ڕەوانبێژی و توانای کەسیشەوە؛ هیچی وای نیە کە بۆ خەڵک شایەنی گرنگی پێدان و سەرنجدان بێت. ئەکاکی لەو جۆرە مرۆڤانەیە کە بون و نەبونیان بۆ کەسێکی ئەوتۆ گرنگ نیە.
لەم چیرۆکەدا کۆمەڵێک مەبەستی قوڵ هەیە؛ لەوانە: نیشاندان و ناساندنی مرۆڤە هەرە سادە و پەراوێزخراوەکانی کۆمەڵگە. ئەوانەی بە تەنیشتتدا دەڕۆن و هیچیان نیە سەرنجت ڕابکێشێ، نە پۆشاکی جوانیان، نە بۆنی خۆش و نە ڕوخساری جوان و نە ناوبانگیان. نە هێندەش بە زەبر و بە دەم و پلن کە سنور بۆ زیادەڕەوی بەرامبەرەکانیان دابنێن. کاتێک ئەم مرۆڤانە بەر نیگای توندوتیژی کۆمەڵگە دەکەون، زۆرجار دەبن بە کەرەستەی ڕابواردن و لاقرتێ. کۆمەڵگە هێندە سەر دەخاتە سەریان تا لە پڕێکدا بەبێ ویستی خۆیان، تراژیدیای ژیان و ئازارەکانیان خۆی نیشان دەدات و ئەوسا دەبن بە جێی بەزەیی. هەندێکجار ئەو بەزەییەی کۆمەڵگە بۆیان، لە خودی ژیانە پڕ ئازار و مەینەتەکەیان تراژیدی ترە، چونکە دەکەوێتە پاش مەرگیان!
خاڵێکی دیکەی جێی سەرنج لەم چیرۆکەدا، هەستکردنە بەو جیاوازیە لە خواست و هیوای مرۆڤەکان، کە پلە و پایە و توانای گیرفانیان بڕیاری لەسەر دەدا. بۆ کەسێکی هەژار و بێ نەوای وەک ئەکاکی ئەکاکیڤیچ، پاڵتۆیەکی تازە؛ هێندەی هاوسەرێک، نەوەیەک، سامانێکی بێ ژمار، چێژ و شکۆی خۆیی هەیە.
پاڵتۆ بۆ هەژارێکی سەرمابردەڵە، دەکرێ ئەو ئامانجەبێ کە لە پێناویدا برسی دەبێ و شەوان وەک ڕوخساری یار، دێتە نێو خەون و خەیاڵەکانیەوە. پاڵتۆیەک هەم گەرمی بکاتەوە، هەم لەناو کارمەندانی فەرمانگەکەیدا، ڕێز و شکۆی پێ ببەخشێت. بۆیە لێرەدا پاڵتۆکە تەنها پۆشاک نیە، بەڵکوو شکۆ و مافی ژیانە. بۆیە لە دەستدانی، دەکرێ ژیانیش بەدوای خۆیدا بەرێت.
ئاریان ئومێد حەمەتاڵ
