26/02/2016
چیرۆكی ئەحمەدی تۆبەكار
باسی چیرۆكی كۆن ناكەین، بۆ ئەوەی كەس نەڵێ:
ئەوە سەردەمی رسول الله بوە -صَلَّى اللهُ عَلَيْهِ وَسَلَّمَ.
ئەوە سەردەمی صەحابە بوە -ڕەزای خوایان لێبێت-.
ئەوە سەردەمی پیاوچاكان بوە ڕەحمەتی خوایان لێبێت.
باسی سەردەمی خۆمان دەكەین:
شیخێك (*١) كە خەڵكی وڵاتی عەرەبستانە، بۆ هەندێ كار و باری خۆی سەفەر دەكات بۆ یەكێك لەو وڵاتانەی دەوروبەری خۆیان، دوای تەواوبونی كارەكانی كە ڕۆژێك دەخایەنێت، بە مەبەستی گەڕانەوە بەرەو فڕۆكەخانە دەكەوێتە ڕێ، لەبەر ئەوەی سەفەرەكەی زۆر ماندوی كردوە، پشویەك دەدات لە ناو مزگەوتی فرۆكەخانەكەدا، ئەڵێ: خەوتم و ئاگام نەبوو تا نزیك نوێژی نیوەڕۆ لە گریانی گەنجێكدا بەخەبەر هاتم كە خەریكی نوێژكردن بو، تەمەنی لەسەروی بیستەوە ولەخوار سیەوە بو، بە كوڵی دەگریا، وەكو گریانی ئافرەتێك بە پێش چاویەوە مێردەكەی لە دەست بچێت، وەكو دایكێك بە پێش چاویەوە جگەر گۆشەكەی تیا بچێت، هاتە پێشەوە و بێداری كردمەوە، ووتی: تۆ خەوت لێدەكەوێ؟! دەتوانی بخەوی؟! وتم: بەڵێ، وتی: بەڵام من خەوم لێناكەوێ، ناتوانم بخەوم، ناتوانم تامی خەو بچەژم. منیش وتم: خێرە، با نوێزەكەمان بكەین پاشان پێكەوە قسە دەكەین [لِيَقْضِيَ اللَّهُ أَمْرًا كَانَ مَفْعُولًا]، ئەڵێ: كە نوێزمان تەواو كرد، وتی: من خەڵكی «رياز»م (*٢)، لەخێزانێكی دەوڵەمەندم، خۆشگوزەرانم، حەزمان لە هەرچی بێت دەیكەین، حەزم كرد لە ژیانی ڕۆژانە و ئەو ژیانەی كە عادەتیە و هەمو ڕۆژێك دوبارە دەبێتەوە بێزار بوم، حەزم كرد جەوێك بگۆڕم، سەفەرم كرد بۆ ئەم ووڵاتەی كە ئێستا من و تۆ لە فڕۆكەخانەكەی دانیشتوین، لەگەڵ هەندێ برادەری خراپ سەفەرم كرد، مەبەستیشم ئەوە نەبو توشی داوێن پیسی ببم، بەڵكو تەنها بۆ ڕابواردن وبەسەر بردنی كاتێكی خۆش بو، بەڵام برادەرە خراپەكانی دەوری دەگرن، وازیان لێنەهێنا لەم شوێن بۆ ئەو شوێنی خراپ، هەتا بەرە بەرە لە پێشەكیەكانی زینا نزیكیان كردەوە، لەگەڵ ئافرەت وكیژۆڵەی جوان دایاننا، تا ئەوەبو لەگەڵ یەكێكیان تەنها كەوت و پاش قسەی خۆش كردن و یاری كردن، توشی فاحیشە هات، و هەرچی شەهوەتی هەبوو بەتاڵی كرد، گەرمی تاوان بەر لاشەی كەوت، وەكو قامچی لە دڵی دەدا، لە پشتی دەدا، ئاگر بەربو لە گیانی، هاواری كرد: چۆن ئەم كارەم كرد؟ چۆن ئەو پەرژینەم شكاند؟ من ئیتر مەحروم دەبم لە حۆریەكانی بەهەشت! دەستی كرد بە گریان و بەرەو دەشت كەوتە ڕێ، تەماشا دەكات ئەوە یەكێكە لەو خراپەكارانە لە دەرەوە وەستاوە، وتی: بۆ دەگریت؟ وتم: ئەزانی چیمكرد من زینام كرد، من زینام كرد!! ئەو خراپەكارە پێی ووت: ها بگرە ئەوە پەرداخێكی مەیە بیخۆرەوە هەموو شتێكت لە بیر دەچێ!!! دەڵێ وتم: هەر وازم لێناهێنن لە حۆریەكان بێ بەشتان كردم، ئەتانەوێ لە مەی بەهەشتیش مەحرومم بكەن.
پاكی بۆ ئەو خوایەی دڵەكان دەگۆڕێت! تۆزێك پێش ئێستا زیناكار بو، ئێستا دەگری وپەشیمانە.
پاشان ئەو خراپەكارە چی پێدەڵێ؟ پێی دەڵێ: «گوێی مەدەرێ خوا غفور و رحیمە. بەڵام لە بیری چوو كە «شديد العقاب»یشە. ئەڵێ: زۆر گریا و وتی: خۆگە پارەكەمیان ببردایە، نەك دین و ئیمانەكەمیان بشكاندایە. لەو كاتەوە خەوم لێناكەوێ، دڵتەنگم چاو بە گریان، ئیسراحەتم لێبڕاوە.
ئەڵێ: منیش ووتم: ئایەتێكت بۆ دەخوێنمەوە وگوێ بگرە بەڵكو سودت پێبگەیەنێت، والله هیچ ئایەتێك لە قورئان نابینم ئومێد دارتر بێت، پڕ هیواتر بێت لەو ئایەتەی كە خوای میهرەبان دەفەرموێ: [قُلْ يَا عِبَادِيَ الَّذِينَ أَسْرَفُوا عَلَى أَنْفُسِهِمْ لَا تَقْنَطُوا مِنْ رَحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ] واتە: «ئەی ئەو بەندانەم كە ڕۆچون لە گوناهو تاوان، بێ ئومێد مەبن لە ڕەحمەتی خوا، خوا ڕەحمەتی فراوانە»، ئەڵێ: وتی: خوا لە هەموو كەسێك خۆش ئەبێ لە من نەبێ، من زینام كردووە، دەزانی زینا چیە؟ تۆ قەت لە تەمەنتا زینات كردووە؟! وتم: نە والله لە تەمەنمدا زینام نەكردووە، وتی: دەی بۆیە نازانی ناڕەحەتی زینا چیە؟! ئەڵێ: لەم كاتەدا بوین و لە فڕۆكەخانەكەوە وترا: فڕۆكەكە دەكەوێتە ڕێ، منیش ناونیشانەكەیم لێوەرگرت، ماڵئاوایم لێكرد و لە دڵی خۆم وتم: دو سێ ڕۆژێكە و لە بیری دەچێ، ئەڵێ پاش ماوەیەكی كەم لە گەیشتنەوەم بۆ شوێنی خۆم، تەلەفۆنێكم بۆ هات تەماشا دەكەم ئەوە، ووتی: حەز ئەكەم بتبینم، ئەوەبو مەوعیدێكمان دانا و یەكترمان بینی، هەر كە چاوی پێم كەوت باوەشی پێمدا كرد و دەستی كرد بە گریان، وتی: والله لەو ڕۆژەوە بە ئیسراحەت نەخەوتوم، خەو لە چاوم ناكەوێ بە كەمی نەبێت! چی بڵێم بە خوا لەو ڕۆژەی كە پرسیارم لێدەكات: زینات كرد؟ بڵێم: بەڵێ خوایە بەم پێیانەی خۆم ڕۆیشتم بۆ زیناكردن؟؟!! وتم: خوا ڕەحمەتی فراوانە. وتی: نەهاتوم بۆ سەردانی كردنت، هاتوم بۆ ماڵئاوایی لێكردنت، ناتبینمەوە لە بەهەشت نەبێت ئەگەر خوا ڕەحمی پێكردم، وتم: خێر بۆ كوێ دەڕۆی؟ وتی: دەمەوێ خۆم ڕادەستی دادگا بكەم ودان بە تاوانەكەمدا بهێنم، تا حەددی خوام لەسەر جێبەجێ بكرێ، وتم: لەخوا بترسە! ئەی تۆ نازانی حەددی زیناكەر بەرد باران كردنە تا مردن، ستری خۆت و خێزانەكەت بكە، تۆ خێزانداری، ستری هاوڕێكانت بكە، وتی: كەسیان لە ئاگری دۆزەخ ڕزگارم ناكەن! ئەڵێ: كە بینیم زۆر سورە وپاشگەز نابێتەوە، وتم: باشە بەڵێنێكت لیوەردەگرم، وتی: بەس نەڵێی خۆت مەدە بە دەستەوە، وتم: ئەوە ناڵێم، پێم وت: دەستم بەرێ وگفتم پێ بدە، ئەڕۆین سەردانی فڵان زانا دەكەین، كە یەكێكە لە زانا پایە بەرز و خوا ناسەكان، ئەو هەرچی وت بە قسەی دەكەین، ئەگەر وتی: خۆت بدە بە دستەوە، بە دەستی خۆم دەتبەم تەسلیمت دەكەم، ئەگەریش وتی: نابێ خۆت تەسلیم بكەی پێویستە بە قسەی بكەی، وتی: باشە ڕازیم.
ئەڵێ: كە چوم سەردانی ئەو زانا بەڕێزەم كرد وباسەكەم بۆ گێڕایەوە، وتی: با خۆی تەسلیم نەكات، هەروەها پێی وتم: ئەو گەنجە بێزاری كردوم ئەوەندە تەلەفۆنی بۆ كردوم، پێم وتوە: خۆت تەسلیم مەكە و لە نێوان خۆت و خوادا تەوبە و داوای لێخۆشبون بكە، پەروەردگار لە تاوانەكان خۆش دەبێ. ئەڵێ: وتی بۆ ئەوەندە ئازاری ئەو زانایەت داوە؟ وتی: ویستم ڕازی بكەم و خۆم لەو ئازار و ناڕەحەتیەی دڵ ڕزگار بكەم. ئەڵێ: لەو قسانەی كە ئەو گەنجە بە زاناكەی وتبو: ئەی مامۆستا لە خوا بترسە، لە قیامەتدا یەخەت دەگرم ئەڵێم پەروەردگارا ویستم خۆم بدەم بە دەستەوە ئەم مامۆستایە نەیهێشت، مامۆستاكەش وتی: ئەمە ئەوەیە كە پێی دەگەمەوە بە خوا، فەتواشم بۆ نەداوی بە عیلمەوە نەبێت.
ئەڵێ: پاشان پێی وتم: من ماڵئاواییت لێدەكەم، وتم: بۆ كوێ؟ وتی: بۆ حەج ئەڕۆم -جا ئەوكاتە نزیكی حەج بو-، داوام لێكرد لەگەڵ ئێمەدا حەج بكات، وتی: نا، جا من وامزانی هاوسەفەری تری هەیە و ئەیەوێت لەگەڵ ئەواندا بڕوات، ئەڵێ: ڕۆیشتین بۆ حەج، دووەم ڕۆژی جەژن بوو لە دورەوە بینیم، بانگم كرد: «ئەحمەد، ئەحمەد» -جا ناوی ئەحمەد بو-، ئەڵێ: ئاوڕی دایەوە وكە منی بینی ڕوی وەرگێڕا و ڕایكرد، وتم: سبحان الله! تۆ بڵێی ئەحمەد لەبەر چی وایكرد، چی دڵی گۆڕی بێ لە ئاست من؟! وتم: بەشكو گەڕامەوە لە «ڕیاز» بینیم لێی دەپرسم، كە گەڕاینەوە بینیم و پێم وت: ئەحمەد ئەوە بۆ بانگم لێكردی خۆت لێونكردم، وتی: حەزم كرد بە تەنها بم، بە تەنها حەجم كرد لەسەر پێی خۆم هەمو شەعیرەكانم ئەنجامداوە، بەڵكو خوا بمبینێ بە پێ لە میناوە دەڕۆم بۆ عەرەفە، یان دەڕۆم بۆ موزدەلیفە، یان بۆ ڕەمی جەمەرات، بەڵكو خوا بمبینێ و بەزەیی پێمدا بێتەوە، وتم: ئەی كە بانگم لێكردی ڕاتكرد؟ وتی: سەرقاڵی استغفار كردن بوم، سەرقاڵی داوای لێخۆشبون كردن بوم لەو تاوانەی كردبوم. لە حەجەكەیدا جارێك دەیوت: دەترسم بە هۆی شومی تاوانەكەمەوە خوای گەورە لەوانەی دەوروبەریشم خۆش نەوێ، جاروباریش دەیوت: بەڵكو خوا بەهۆی ئەم نوێژكەر و خواناس و تەسبحات كارانەوە لێم خۆش ببێت
جا پێم وت: بۆ نایەی لەگەڵماندا لە كۆڕ و دەرسەكان ئامادە بیت، لەگەڵ ئەو مامۆستایانە دانیشیت و لە زانستی شەرعی سود وەربگری، وتی: نەخێر، ئێوە پاكن و من پیس و زیناكارم، نامەوێ ئێوەش پیس بكەم بە زیناكەی خۆم.
تەماشا بكەن چۆن ملكەچ و زەلیل بووە، كاتێك تاوان كەسێك توشی ملكەچی و زەلیلی دەكات، زۆر لە عابدێك باشترە كە بە هۆی عیبادەتەكەیەوە توشی فیز و لوت بەرزی ببێت، نوزەی گریانی تۆبەكاران خۆشترە لە تەسبیحاتی عابیدانی خۆ بەگەورەزانان.
ئەڵێ: ئەم تۆبەكارە دوای حەجكردنەكەی زیاتر مولەتەزیم بو دینەوە و تەنانەت قورئانی لەبەر كرد و ڕۆژ نە ڕۆژێكیش بە ڕۆژو دەبو.
ئەڵێ: پەیوەندی نێوانمان توند وتۆڵ بو، سەردانی یەكترمان دەكرد و هاتوچۆی یەكترمان دەكرد و بەردەوام بوین لە دەرسەكان، كە ئەو ماوەیە مامۆستا باسی ژیاننامەی پیاوچاكانی دەكرد، لەو چیرۆكانەی كە مامۆستا لە مەجلیسەكەدا باسی دەكرد، چیرۆكی ڕەبیعی كوڕی خوسەیم «الرَّبِيعُ بنُ خُثَيْم» بو، ئەو گەنجەی كە تەمەنی سی ساڵی تێنەپەڕاندوە، خواناس، دیندار، ڕو لە مزگەوت، لە خوا ترس، بەڵام ئەو شوێنەی ئەوی تێدابوو كۆمەڵێك خوانەناس و خراپەكار و مونافیقی تێدا بو -وەكو چۆن لە هەمو شوێنێك هەمو ڕو لە خوایەك هەندێك لەو خەڵكە خراپەی هەر بەر دەكەوێت فمستقل ومستكثر-، جا وتیان: با پیلانێك بۆ لە خشتەبردنی ڕەبیع دابنێین، وتیان: جا چی بكەین؟ وتیان: ئەچین بۆلای «غانية» -كە ئافرەتێك بوو ئەوەندە جوان بو پێیان دەوت غانیە، غانیەش واتە: پێویستی بە خۆ جوانكردنەوە نیە ئەوەندە جوانە-، جا ڕۆیشتن بۆ لای و وتیان: ئەوە هەزار دینار بۆ تۆ، لەسەر چی؟ بەس بە مەرجێ ڕەبیع ماچێكت بكات، ئەگەر ماچێكی كردی ئەوە هەزار دینار بۆ تۆ!! ئەویش وتی: دوو هەزار بۆ ئێوە ئەگەر كەمترین شتم لەگەڵ بكات. ئەڵێ: ڕۆیشت خۆی بۆ ئامادەكرد و كاتێكی گونجاوی بۆ دیاریكرد و چوە بەردەمی ڕەبیع و خۆی پیشانی ڕەبیعدا و هەموو جلەكانی لەبەر خۆی لادا، بەڵام ڕەبیع یوسف -علية السلام- ئاسا كە وتی: [قَالَ مَعَاذَ اللَّهِ إِنَّهُ رَبِّي أَحْسَنَ مَثْوَايَ] «پەنا بە الله، ئەی چی بڵێم بە پەروەردگارم كە ڕێزی لێناوم، چۆن دەست دەبەم بۆ حەرامكراوەكانی» (*3) ، بە ئافرەتەكەی وت و هاواری كرد بەسەریدا: لە خوا ناترسی؟! چی دەكەی ئەگەر ئیستا لاشەت گەڕ بێت و ئەو جوانیەی كە هەتە بڕوات؟! چی دەڵێی ئەگەر ملك الموت دابەزێت و پەتی ژیانت بپچڕێنێت، ئەی چی ئەڵێ كە نەكیر و مونكەڕ پرسیاریان لێت كرد؟! هەر ئەوەندەی وت ئافرەتەكە دەستی كرد بە هاوار كردن و وتی: «حسبى حسبى» بەسمە بەسمە، ئەوەبو پەشیمان بویەوە و دەستی كرد بە عیبادەتكردنی خوا، تا وای لێهات ناونرا بە «عابدة الكوفة» «خوا پەرستەكەی كوفە»، ئەو فاجر و فاسیقانە وتیان: بەڕاستی ڕەبیع ئەویشی لێخراپكردین و ئەویشی لێتێكداین!!
ئەڵێ: كە ئەحمەد كە گوێی لەم چیرۆكە بوو دەستی كرد بە گریان و وتی ڕەبیع دەڕۆن بۆلای و وەڵامیان ناداتەوە، بەڵام من بە پێی خۆم دەڕۆم بۆ لایان، ئەو بەردەمی لێدەگرن و دەڵێ: نەخێر، بەڵام من بە پێی خۆم دەڕۆم بۆ زینا كردن، ئەڵێ: بە گریان و دڵشكاوی و دڵتەنگیەوە مەجلیسەكەی بەجێهێشت.
ئەڵێ: جارێكیان یەكێك لە زانایانم بینی باسی چیرۆكی ئەحمەدم بۆ كرد، كە چەند ملكەچ و هەمیشە خەریكی قورئان وخویندن و ڕۆژو گرتنە، وتی: بەڵكو ئەو زیناكردنەی ببێتە هۆی چونە بەهەشتی، وا دەزانم هەندێك ئایەت بۆ بۆ ئەو كوڕە زۆر گونجاوە و لەسەر ئەو جێبەجێ دەبێت، خوا سبحانة وتعالى دەفەرموێ:[وَالَّذِينَ لَا يَدْعُونَ مَعَ اللَّهِ إِلَهًا آخَرَ وَلَا يَقْتُلُونَ النَّفْسَ الَّتِي حَرَّمَ اللَّهُ إِلَّا بِالْحَقِّ وَلَا يَزْنُونَ وَمَنْ يَفْعَلْ ذَلِكَ يَلْقَ أَثَامًا * يُضَاعَفْ لَهُ الْعَذَابُ يَوْمَ الْقِيَامَةِ وَيَخْلُدْ فِيهِ مُهَانًا * إِلَّا مَنْ تَابَ وَآمَنَ وَعَمِلَ عَمَلًا صَالِحًا فَأُولَئِكَ يُبَدِّلُ اللَّهُ سَيِّئَاتِهِمْ حَسَنَاتٍ وَكَانَ اللَّهُ غَفُورًا رَحِيمًا * وَمَنْ تَابَ وَعَمِلَ صَالِحًا فَإِنَّهُ يَتُوبُ إِلَى اللَّهِ مَتَابًا] پەروەردگار باسی سیفاتی عباد الرحمن دەكات، سیفاتی بەندەكانی خۆی، جا لەو سیفاتانەیان ئەوەیە: هاوار لە غەیرە خوا ناكەن، نەفس ناكوژن بە ناهەق و حورمەتی نەفس ڕادەگرن، زیناش ناكەن، هەركەسێكیش ئەوە بكات دەخرێتە ناو دۆزەخەوە بە هەتا هەتایی بە سەر شۆڕ تێیدا دەمێنێتەو، مەگەر كەسێك كە تەوبە بكات، وئیمان بهێنێت و كار و كردەوەی چاك ئەنجام بدات، ئا ئەوانە خوا سبحانة وتعالى چیان بۆ دەكات؟ تەماشای بەزەیی و میهرەبانی رب العالمين بكەن: «خراپەكانیان بۆ دەگۆڕیت بە چاكە»، زیناكەی بۆ دەگۆڕێت بە چاكە؟ بەڵێ، دەیگوڕێت بە چاكە.
ئەڵێ هەر كە بیستم سەیرم لێهات، وتم: چۆن تا ئێستا لەم ئایەتە بێ ئاگابوم؟!! ئەڵێ: ڕاستەوخۆ چوم بۆ ماڵیان، بۆ كۆشكە جوانەكەی ماڵ باوكی ئەحمەد، پێیان وتم: ئەحمەد لە ماڵ نیە و لە مزگەوتدایە، ڕۆیشتم تەماشا دەكەم، گەردنكەچانە خەریكی خوێندنەوەی قورئانە، وتم: مژدەیەكم پێیە بۆت، وتی: چیە؟ وتم: [وَالَّذِينَ لَا يَدْعُونَ مَعَ اللَّهِ إِلَهًا آخَرَ وَلَا يَقْتُلُونَ النَّفْسَ الَّتِي حَرَّمَ اللَّهُ إِلَّا بِالْحَقِّ وَلَا يَزْنُونَ] ئەڵێ كە گەیشتمە ئەم ئایەتە ئەڵێی بە چەقۆ دات لە جەرگی، بەردەوام بوم لە خوێندنەوە [وَمَنْ يَفْعَلْ ذَلِكَ يَلْقَ أَثَامًا * يُضَاعَفْ لَهُ الْعَذَابُ يَوْمَ الْقِيَامَةِ وَيَخْلُدْ فِيهِ مُهَانًا * إِلَّا مَنْ تَابَ وَآمَنَ وَعَمِلَ عَمَلًا صَالِحًا فَأُولَئِكَ يُبَدِّلُ اللَّهُ سَيِّئَاتِهِمْ حَسَنَاتٍ وَكَانَ اللَّهُ غَفُورًا رَحِيمًا] هەركە تەواوم كرد خۆی بۆم فڕێدا و باوەشی پێمدا كرد وسەری ماچ كردم، وتی: والله هەمو قورئانم لەبەرە، ئەڵێی تا ئێستا ئەم ئایەتەم نەبینیوە، بەڕاستی دەرگایەكی گەورەی هیوات بۆ كردمەوە، بەڵكو بەهۆی ئەم ئایەتەوە خوا بەزەیی پێمدا بێتەوە و لێم خۆش بێت.
ئەڵێ كاتی نوێژی مەغریب هاتو، هاتن نویژ داببەستن ئیمامی مزگەوتەكە نەهاتبو، بانگ خوێنەكە ئەحمەدی خستە پێشەوە، ئەڵێ: الله أكبری كرد و سورەتی فاتیحای خوێند و دەستی كرد بە خوێندنی [وَالَّذِينَ لَا يَدْعُونَ مَعَ اللَّهِ إِلَهًا آخَرَ وَلَا يَقْتُلُونَ النَّفْسَ الَّتِي حَرَّمَ اللَّهُ إِلَّا بِالْحَقِّ وَلَا يَزْنُونَ وَمَنْ يَفْعَلْ ذَلِكَ يَلْقَ أَثَامًا * يُضَاعَفْ لَهُ الْعَذَابُ يَوْمَ الْقِيَامَةِ وَيَخْلُدْ فِيهِ مُهَانًا * إِلَّا مَنْ تَابَ] كە گەیشتە [إِلَّا مَنْ تَابَ] ئەوەندە گریا نەیتوانی ئایەتەكە تەواو بكات و ڕۆیشتە ڕكوع، كە بۆ ڕكاتی دووەم هەستایەوە دیسانەوە ئەو ئایەتەی خوێندەوە، كە گەیشتە [إِلَّا مَنْ تَابَ] دیسانەوە ئەوەندە گریا نەیتوانی ئایەتەكە تەواو بكات و ڕۆیشتە ڕكوع و نوێژەكەی تەواو كرد، ئەڵێ لەسەر ئەم حاڵەتە ماینەوە تاوەكو ڕۆژێك لە ڕۆژان هات، ڕۆژی هەینی لە پشوی بەهاردا، ساڵی 1409كۆچی (*٤) ، ڕاستەوخۆ پاش نوێژی عیشا تەلەفۆنێكم بۆ هات، وتی: من باوكی ئەحمەدی هاوڕێتم، كارێكی زەرورم پێتە و خێرا وەرە بۆلام، ئەڵێ: خێرا كەوتمە ڕێ و ترسام شتێك ڕویدا بێت، كە گەیشتمەی كۆشكەكەی ماڵی باوكی تەماشا، دەكەم باوكی لەبەر دەرگا ڕاوەستاوە و چاوەڕێمە، وتم: چی بوە، وتی: هاوڕێكەت داوای لێبوردنت لێدەكات، ماڵئاوایی لێدەكات بۆ ئاخیرت، مەغریبی ئەمڕۆ گەڕایەوە لای پەروەردگاری، پاشان باوكی دەستی كرد بە گریان، پاشان ڕۆیشتمە ماڵەوە، وبردمیە ژورێكەوە تەماشا دەكەم ئەمە ئەحمەدە هەڵیان ژاندوە و بان چاویان داوە، بان چاویم لادا، والله نورم بینی نور، نور لە نێو چاوانی دەباری لە جوانی و درەوشاوەیی، زۆر لەوە و پێش جوانتر بو، ئەڵێ: باوكی وتی توخوا ئەم كوڕەم چی كردبو؟ بۆ لەم سەفەرەی هاتەوە ئەم كوڕە توشی ئەم حاڵەتە بوو؟ ئەڵێ: منیش بەڵینمدا بو باسی لای هیچ كەسێك نەگێڕمەوە، جا وتم: خۆشەویستێكی لە دەستدابوو، هەرواش بوو، چونكە ئەو ئیمانە عەزیزەی لە دەستدابوو، ئەڵێ: خێزانەكەی وتی والله لەو رۆژەوە كە لەو سەفەرەی هاتۆتەوە هەرگیز بە ئیسراحەت نە خەوتووە.
وتمە باوكی چیرۆكی مردنی ئەم كوڕە چۆن بو بۆم بگێڕەوە، وتی: وەك خۆت دەزانی ئەم كوڕە رۆژ نە ڕۆژێ بە ڕۆژو دەبوو، ئەمڕۆ ڕۆژی جومعە بە ڕۆژو بوو، لە مزگەوت هەر نەهاتەوە و هەر دەپاڕایەوە بە ئومێدی بەر ئەو ساتە بكەوێت كە دوعای تێدا گیرایە، تۆزێك پێش مەغریب ڕۆیشتم بۆلای وتم: ڕۆڵە گیان! وەرەوە لە ماڵەوە بەربانگ بكەرەوە، وتی: بابەگیان هەست بە ئاسودەییەكی زۆر دەكەم و زۆرم لێمەكە، وتم: ڕۆڵە گیان! وەرەوە لە ماڵەوە بەربانگ بكەرەوە، وتی: بابەگیان شتێكم بۆ بنێرن لێرە بەربانگ دەكەمەوە، دوای نوێژی عیشا دێمەوە، وتی: ڕۆڵەگیان كەیفی خۆتە. باوك ئەڵێ: كە هاتمەوە دوای نوێژ هەستم بە شتێكی سەیر كرد لە ناخمدا و ئاسودە نەبوم كوڕە بچكۆلەكەمم نارد، وتم: بڕۆ بۆ مزگەوت بزان دەنگوباسی براكەت چۆنە، ئەڵێ: منداڵەكە بە هاوەرەوە هاتەوە و وتی: بابەگیان ئەحمەد قسەم لەگەڵدا ناكات، باوكی ئەڵێ: منیش بە خێرا ڕۆیشتم بۆ مزگەوت، تەماشا دەكەم ئەمە ئەحمەدە ڕاكشاوە و لە دوا ساتەكانی ژیانیدایە، شانی دابو بە شتێكەوە كە ئیسراحەتی تێدا دەكرد و پشتی پێدەدایەوە، منیش پشتێكەم لادا و شانیم دابە خۆمەوە، تەماشا دەكەم ناوی مامۆستا ئەحمەد دەهێنێت، وەك ئەوەی وەسیەتی سەلام لێكردنی بكات، پاشان لەو دوا ساتانەی ژیانیدا بزگەیەك گرتی، و والله هەرگیز نەمبینیوە بەو شێوە پێ بكەنێت دوای گەڕانەوەی لەو سەفەرە، پاشان ئا لەو ساتانەدا دەستی كرد بە خوێندنی: [[وَالَّذِينَ لَا يَدْعُونَ مَعَ اللَّهِ إِلَهًا آخَرَ وَلَا يَقْتُلُونَ النَّفْسَ الَّتِي حَرَّمَ اللَّهُ إِلَّا بِالْحَقِّ وَلَا يَزْنُونَ * وَمَنْ يَفْعَلْ ذَلِكَ يَلْقَ أَثَامًا * يُضَاعَفْ لَهُ الْعَذَابُ يَوْمَ الْقِيَامَةِ وَيَخْلُدْ فِيهِ مُهَانًا * إِلَّا مَنْ تَابَ وَآمَنَ وَعَمِلَ عَمَلًا صَالِحًا فَأُولَئِكَ يُبَدِّلُ اللَّهُ سَيِّئَاتِهِمْ حَسَنَاتٍ]، ئەڵێ: كە گەیشتە ئێرە ئیتر ڕوحی دەرچو. پاشان باوكی وتی: والله نازانم بۆ ئاخر خێریەكەی بگیرم، یان بۆ لە دەستدانی جگەر گۆشەكەم. بۆیە ئەم چیرۆكە ئەبێتە مایەی باش بونی خانەوادەكەیی و براكانی و هاوڕێكانی.
(*١) مەبەستم لە شێخ لەم كتێبەدا مامۆستای مزگەوتە، ئەو كەسەیە كە زانایە یان شارەزای شەرعی هەیە، نەك ئەوەی كە لە وڵاتی خۆماندا پێیان دەڵێن شێخ، مەبەستم جۆری یەكەمە نەك دوەم.
(*٢) پایتەختی عەرەبستانە.
(*٣) ئەمە لەسەر ئەو تەفسیرەی كە «رب» لێرەدا: مەبەست پێی الله یە، وتراویشە مەبەست پێی عزیزی میسرە، هەردوكیشیان هەڵدەگرێت ماناكەی والله أعلم.
(*٤) واتە: ساڵی ١٩٨٩-١٩٩٠
