18/08/2025
ခေတ်သစ် ကြိတ်စက်(စံနစ်ယန္တရား)ကြီးမှ ထွက်ပြေးခြင်း
FIREနောက်ကို လိုက်နေသူတွေဟာ လှပတဲ့အိပ်မက်တွေဆီကို ပြေးလွှားနေကြသလိုပဲ၊
သူတို့ကို တွန်းထုတ်နေတဲ့ နာကျင်စရာ၊ စိတ်ပျက်စရာ လက်ရှိဘဝတွေဆီကနေလည်း ထွက်ပြေးနေကြတာပါ။
"တစ်ခုခုဆီသို့" ပြေးခြင်းထက် "တစ်ခုခုမှ" ထွက်ပြေးခြင်းလိုဆိုရင် ပိုမှန်ပါလိမ့်မယ်။
FIRE လို့ကြားလိုက်တာနဲ့ လူအများစုက ဒါဟာ ပျင်းရိချင်လို့၊ အလုပ်မလုပ်ချင်လို့ ပိုက်ဆံတွေအများကြီးစုပြီး အေးအေးဆေးဆေး နေထိုင်ဖို့ကြိုးစားတဲ့ နည်းလမ်းတစ်ခုလို့ အပေါ်ယံရှုမြင်တတ်ကြပါတယ်။
အမှန်တကယ်တော့ အဲဒါထက်ပိုမိုနက်ရှိုင်းပါတယ်။
"ဘာလဲFIRE?" ဆိုတဲ့ မေးခွန်းကို တူးဆွကြည့်လိုက်တဲ့အခါမှာ၊ ဒါဟာ ငွေကြေးသက်သက်မဟုတ်ပဲ၊ ခေတ်သစ်လူ့အဖွဲ့အစည်းရဲ့ အောင်မြင်မှု၊ ကြွယ်ဝမှုနဲ့ ပျော်ရွှင်မှုဆိုတဲ့ အဓိပ္ပာယ်ဖွင့်ဆိုချက်တွေကို အခြေခံကျကျပြန်လည်မေးခွန်းထုတ်နေတဲ့ တော်လှန်ရေးအတွေးအခေါ်တစ်ခု ဖြစ်နေတာကိုတွေ့ရပါလိမ့်မယ်။
FIREလှုပ်ရှားမှုရဲ့ အဓိကကျတဲ့အချက်က "အလုပ်မှစောစီးစွာအနားယူခြင်း" (Retire Early) ဆိုတာ အလုပ်လုံးဝမလုပ်တော့ဘဲ ထိုင်စားဖို့မဟုတ်ပါဘူး။ လူအများစုအတွက် ဒါဟာ "ဝင်ငွေကောင်းသည်ဖြစ်စေ၊ မကောင်းသည်ဖြစ်စေ၊ ကိုယ်တကယ်မြတ်နိုးတဲ့အလုပ်ကို လုပ်ပိုင်ခွင့်ရှိခြင်း" ဆိုတဲ့ ရွေးချယ်မှုရှိတဲ့ဘဝကိုပုံဖော်ခြင်းပါပဲ။ FIRE ဆိုတာ ငွေစုစာရင်းတစ်ခုထက် အများကြီးပိုပါတယ်၊ လူတစ်ယောက်ရဲ့ တန်ဖိုးအရှိဆုံးနဲ့ ပြန်လည်ဖြည့်တင်းလို့မရတဲ့ အရာဖြစ်တဲ့ "အချိန်"ကို ပြန်လည်ရယူပိုင်ဆိုင်ဖို့ ကြိုးပမ်းမှုတစ်ခုဖြစ်ကြောင်း နားလည်လာကြမှာဖြစ်ပါတယ်။
ဒီလှုပ်ရှားမှုရဲ့ လူကြိုက်များလာမှုဟာ အထူးသဖြင့် လူငယ်မျိုးဆက်တွေကြားမှာ တန်ဖိုးထားမှုတွေ ပြောင်းလဲလာခြင်းရဲ့ ရှေ့ပြေးနိမိတ်တစ်ခု ဖြစ်ပါတယ်။ လွန်ခဲ့တဲ့မျိုးဆက်တွေရဲ့ "အလုပ်အတွက် အသက်ရှင်ခြင်း" (live to work) ဆိုတဲ့ အတွေးအခေါ်ကို ငြင်းပယ်ပြီး "အသက်ရှင်သန်ဖို့အတွက် အလုပ်လုပ်ခြင်း" (work to live) ဆိုတဲ့ အတွေးအခေါ်ကို လက်ခံလာကြတာပါ။
ဒါဟာ အသက် ၆၅ နှစ်မှာ ပင်စင်ယူဖို့အတွက် အနှစ် ၄၀ ကျော်အလုပ်လုပ်ရမယ်ဆိုတဲ့ အရိုးစွဲလည်ပတ်နေခဲ့တဲ့ စံနစ်ယန္တရားပုံစံခွက်ငယ်ထဲကလူ့ဘဝကို ငြီးငွေ့လာခြင်းရဲ့ နောက်ဆက်တွဲတစ်ခုလည်း ဖြစ်ပါတယ်။
FIRE ဆိုတာ ဒီပုံစံခွက်စံနစ်ယန္တရားထဲက ရုန်းထွက်ပြီး ကိုယ်ပိုင်တန်ဖိုးဖြစ်တဲ့ "အချိန်"ကို ကိုယ်ပိုင်ပြဋ္ဌာန်းခွင့်နဲ့ လွတ်လပ်မှုတွေအပေါ် အခြေခံတဲ့ဘဝသစ်တစ်ခုကိုတည်ဆောက်ဖို့ ကြိုးစားတဲ့နည်းလမ်းတစ်ခုဖြစ်လာပါတယ်။
(Burnout ကပ်ရောဂါ)
"ကျွန်တော် ဆယ်စုနှစ်တစ်ခုကြာအောင် တစ်ပတ်ကို နာရီ ၆၀ အလုပ်လုပ်ခဲ့တယ်။
ကျွန်တော့်မှာ နာတာရှည် စိတ်ဖိစီးမှုရောဂါရှိနေပြီ၊ မိသားစုကိုတောင် မတွေ့ရသလောက်ပဲ၊
တနင်္လာနေ့ကို ကြောက်တဲ့စိတ်က သောကြာနေ့ညနေကတည်းက စနေပြီ။
ကျွန်တော် FIREကိုလိုက်နေတာ အလုပ်ကိုမုန်းလို့မဟုတ်ဘူး၊ ဒီလိုအလုပ်မျိုးကို မုန်းလို့။
ကျွန်တော် အားကုန်ပြေးလွှားနေရတာ၊ FIREက ပန်းဝင်မျဉ်းပဲ။"
ဒီစကားတွေဟာ အလုပ်ကြောင့် (Burned-Out)စိတ်ရောကိုယ်ပါပင်ပန်းနွမ်းနယ်နေတဲ့ ပညာရှင်တစ်ယောက်ရဲ့ ရင်ဖွင့်သံပါ။
ခေတ်သစ်အလုပ်ခွင်တွေမှာ Burnoutဟာ ကပ်ရောဂါတစ်ခုလို ပျံ့နှံ့နေပါတယ်။
အသက် ၂၈နှစ်အရွယ် သုတေသီတစ်ဦးက သူ့ရဲ့တွန်းအားကို "တနင်္ဂနွေညရဲ့ ကြောက်စိတ်ကနေ လွတ်မြောက်ဖို့" လို့ ဆိုပါတယ်။
အသက် ၃၁နှစ်အရွယ် သူနာပြုတစ်ဦးကတော့ "ကျွန်မအလုပ်က ကျွန်မကျန်းမာရေးကို ဖျက်ဆီးခဲ့တယ်၊ အဲဒါကို ပြန်လိုချင်တယ်"လို့ နာနာကျင်ကျင်ပြောပါတယ်။
အသက် ၃၄နှစ်အရွယ် အထူးကြပ်မတ်ကုသဆောင် (ICU) သူနာပြုတစ်ဦးကလည်း "ကျွန်မတစ်ခါ Burnout ဖြစ်ခဲ့ဖူးတယ်၊ နောက်တစ်ခါ ဘယ်တော့မှအဖြစ်မခံတော့ဘူး" လို့ ခိုင်မာစွာဆိုပါတယ်။
အလားတူပဲ အသက် ၄၄နှစ်အရွယ် ဘဏ်လုပ်ငန်းရှင်ဟောင်းတစ်ဦးက" လစာများပြီး စိတ်ဖိစီးမှုများတဲ့အလုပ်ကို စိတ်ကျန်းမာရေးအတွက်စွန့်လွှတ်ခဲ့ပြီ" လို့ ပြောပါတယ်။
ဒီသက်သေခံချက်တွေက လူတစ်ယောက်ရဲ့ ကျန်းမာရေးနဲ့ပျော်ရွှင်မှုကိုစတေးပြီး အောင်မြင်မှုကိုတိုင်းတာတဲ့ ခေတ်သစ်အလုပ်ယဉ်ကျေးမှုရဲ့ အမှားကို ထောက်ပြနေပါတယ်။
(ဆက်ရန်...)
ပူလောင်မှုတွေကိုကျော်လွန်ပြီး ငြိမ်းအေးတဲ့ဘဝကို ဖန်တီးနိုင်ကြပါစေ...
MHS (Myanmar Hobby Shop)
