13/05/2021
សេចក្ដីស្រឡាញ់
មនុស្សគ្រប់គ្នាតែងតែប្រាថ្នានារី រឺបុរសក្នុងក្ដីស្រមៃ ជាមនុស្សម្នាក់ដែលល្អព្រមទាំងរូបសម្បត្តិ និងចរិយាសម្បត្តិ។ ហើយអ្វីដែលសំខាន់គឺចរិតមាយាទរបស់មនុស្សម្នាក់ដែលយើងនឹងជ្រើសរើសរួមរស់នៅជាមួយគ្នានៅថ្ងៃអនាគត។ ការស្រឡាញ់មិនអាចពឹងផ្អែកតែលើពាក្យថាស្រឡាញ់តែពីរម៉ាត់នោះទេ ពីព្រោះប្រសិនបើកាលណាយើងគ្រាន់តែប្រើពាក្យថាស្រឡាញ់ប៉ុន្តែតែមិនមានទង្វើឬសកម្មភាពដែលបង្ហាញអំពីក្ដីស្រឡាញ់ក៏គ្មានន័យដែរ។ ការជ្រើសរើសនរណាម្នាក់ដែលយើងគិតថាគេជាមនុស្សម្នាក់ដែលរឹងមាំនិងអាចអោយយើងផ្អែកស្មើបានទៅថ្ងៃមុខជាមនុស្សដែលដឹងខុសដឹងត្រូវមានគុណធម៌សីលធម៌ល្អក្នុងការរស់នៅ។ ស្នេហាសម្រាប់យុវវ័យមួយចំនួនគឺប្រៀបដូចជាស្នេហាភ្លើងចំបើងដែលឆាប់ឆេះពីដំបូងនោះមិនយូរប៉ុន្មានក៏រលត់ទៅវិញ មិនមាននរណាម្នាក់ដែលចង់ជ្រើសរើសដៃគូជីវិតច្រើនទេ ប៉ុន្តែមុននឹងជ្រើសរើសក៏ត្រូវតែវិភាគផងដែរ។ ការសម្រេចចិត្តថាទទួលយកមនុស្សម្នាក់ចូលមកក្នុងជីវិតត្រូវប្រើពេលវេលាដើម្បីសង្កេតអំពីសកម្មភាពនិងអត្តចរិត មិនត្រូវមើលតែរូបរាងខាងក្រៅល្អស្អាត ជ្រើសរើសយកនរណាម្នាក់ដើម្បីកំដរអារម្មណ៍លេងសើចនោះទេ រឿងផ្សេងអាចលេងសើចបានប៉ុន្តែសម្រាប់បេះដូង និងជីវិតយើងមិនអាចយកវាមកលេងសើចបានទេ។ បេះដូងគឺជាផ្នែកមួយដ៏សំខាន់នៅក្នុងរាងកាយមនុស្សចុះប្រសិនបើមិនមានបេះដូងរាងកាយមួយនោះអាចទៅរស់នៅបានបន្តដូចមនុស្សទូទៅបានដែរឬទេ? ហើយម្យ៉ាងទៀតជីវិតក៏ដូចគ្នាមិនត្រូវយកជីវិតមកលេងសើចទេ ពីព្រោះនៅក្នុងសង្គមបច្ចុប្បន្នខ្ញុំតែងតែឃើញមានយុវវ័យយើងខ្លះដែលគាត់ខូចចិត្តរឿងស្នេហាដោយសារស្នេហាបែកបាក់ ពេលខ្លះមនុស្សម្នាក់ដែលយើងខំស្រឡាញ់ទុកចិត្តស្មើកែវភ្នែកបែរជាមានចិត្តមិនល្អមិនស្មោះត្រង់ទៅវិញ។ ទាំងនេះហើយជាមូលហេតុដែលធ្វើអោយអារម្មណ៍នៃដៃគូម្ខាងទៀតទទួលយកមិនបានរហូតមានអ្នកខ្លះលែងគិតលែងនឹកឃើញអំពីគ្រួសារឪពុកម្ដាយបងប្អូនសាច់ញាតិ ដែលកំពុងរង់ចាំមើលជោគជ័យនៅជីវិត ត្រូវចាំថាពួកគាត់បានលះបង់ច្រើនស្ទើរតែមួយជីវិតនេះ បានចិញ្ចឹមបីបាច់ថែរក្សាបារម្ភគ្រប់ពេលវេលា។ ហើយប្រសិនបើអ្នកចង់បញ្ចប់ជីវិតមួយនេះដោយសារតែស្នេហា តើអ្នកមានគិតទេថានៅណាដែលឈឺចាប់ខ្លាំងជាងគេបំផុតជាគ្រួសាររបស់អ្នកឬជាមនុស្សដែលក្បត់អ្នក? ជីវិតអ្នកមិនអាចយកមកលេងសើចបានទេមិនមែនអ្នកកើតថ្ងៃនេះមិនស្លាប់ស្អែកនឹងកើតមកវិញនៅថ្ងៃខានស្អែកនោះទេ។ ដូច្នេះដើម្បីធ្វើឲ្យស្នេហាមួយមានភាពរឹងមាំចេះរៀនអត់ធ្មត់ទប់អារម្មណ៍ឬកំហឹង អធ្យាស្រ័យផ្ដល់កម្លាំងចិត្តនៅក្បែរគ្នាគ្រប់ពេលវេលាមិនថាពេលសុខឬពេលទុក្ខ និងផ្ដល់ពេលវេលាសប្បាយរីករាយចំណងស្នេហ៍ដែលអាចរក្សាបានរាប់ឆ្នាំគឺអាស្រ័យលើដៃគូទាំងសងខាងយល់ពីគ្នាមានហេតុផលត្រឹមត្រូវចេះស្ដាប់គ្នាទៅវិញទៅមកផ្ដល់ទំនុកចិត្ត ការជឿជាក់គ្នា និងការផ្ដល់តម្លៃឲ្យគ្នាទៅវិញទៅមក។
_ _ _
នគរស្មេរទី289
អត្ថបទដោយ ហ៊ល កញ្ញា
©រក្សាសិទ្ធិដោយក្រុមការងារនគរ
