24/06/2022
#អំពីផ្កាយព្រះគ្រោះទាំង៥នៅក្នុងត្រៃភូមិខ្មែរ
ដោយនាវេលាម៉ោង៥ ព្រហាមព្រឹកស្អែកនេះ នឹងមានមហាព្រឹត្តិការណ៍ដែលភពសំខាន់ៗទាំង៥ក្នុងប្រព័ន្ធព្រះអាទិត្យនឹងរះបណ្តាក់គ្នាក្នុងពេលតែ១។ ដូចនេះយើងសូមនាំអារម្មណ៍លោកអ្នកមកស្វែងយល់ អំពីភពទាំង៥ នៅក្នុងគំនិតខ្មែរបុរាណវិញម្តង។ មនុស្សនៅសម័យបុរាណ គេបានយល់ដឹង និងសង្កេតចលនាការគោរចរ របស់ភពទាំង៥នេះតាំងពីយូរយារណាស់ហើយ តែគេសម្គាល់ភពទាំង៥នេះជាផ្កាយព្រះគ្រោះ ដោយសារវាមានលក្ខណៈគោចរខុសប្លែកពីផ្កាយដទៃនៅលើមេឃ។
តាមរយៈត្រៃភូមិខ្មែរ ផ្កាយព្រះគ្រោះទាំង៥ដួងប្រចាំចក្ករាសី មានដូចជា ផ្កាយព្រះអង្គារ ផ្កាយព្រះពុធ ផ្កាយព្រះព្រហស្បតិ៍ ផ្កាយព្រះសុក្រ និងផ្កាយព្រះសៅរ៍ រួមសរុបហៅតាមហោរាសាស្ត្រថា ព្រះគ្រោះទាំង៥។
ផ្កាយព្រះអង្គារ(ភុម្មមហាទេវោ) មានរស្មីក្រហមចាស់(បិង្គល) ក្នុង១ថ្ងៃគោចរបាន ៤០១៧យោជន៍ ៣៥២សិន ១៧ព្យាម ១៨ធ្នាប់ ឆ្លងកាត់រាសី១(តារានិករ១) ។ លុះគ្រប់៥៦ថ្ងៃ ទើបអាចឆ្លងកាត់ទៅរាសី១ផ្សេងទៀតបាន។ គឺ ត្រូវចំណាយពេល៥៦ថ្ងៃ ទើបអាចធ្វើដំណើរឆ្លងកាត់រាសី១បាន។ ឧទាហរណ៍ ដើម្បីឆ្លងកាត់មេសរាសី ( តារានិករ Aries) ផ្កាយព្រះអង្គារត្រូវចំណាយពេល ៥៦ថ្ងៃ ដើម្បីឆ្លងទៅកាន់ ឧសភរាសី( តារានិករ Taurus)។
ផ្កាយព្រះពុធ(ពុធមហាទេវោ) មានរស្មីពណ៌បៃតង(បីត) ក្នុង១ថ្ងៃគោចរបាន ៧៥០០យោជន៍ ឆ្លងកាត់រាសី១(តារានិករ១) ។ លុះគ្រប់៣០ថ្ងៃ ទើបអាចឆ្លងកាត់ទៅរាសី១ផ្សេងទៀតបាន។
ផ្កាយព្រះព្រហស្បតិ៍ (គុរុមហាទេវោ) មានរស្មីពណ៌លឿងទុំ(មញ្ជេដ្ឋ)ក្នុង១ថ្ងៃគោចរបាន ៦៣៥យោជន៍ ឆ្លងកាត់ រាសី១(តារានិករ១) ។ លុះគ្រប់១២ខែទើបអាចឆ្លងកាត់ទៅរាសី១ផ្សេងទៀតបាន។
ផ្កាយព្រះសុក្រ( សុក្រមហាទេវោ) មានរស្មីពណ៌ខៀវ ទឹកប្រាក់(រូបិយ) ក្នុង១ថ្ងៃគោចរបាន ៧៥០០យោជន៍ ឆ្លងកាត់រាសី១(តារានិករ១) ។ លុះគ្រប់៣០ថ្ងៃ ទើបអាចឆ្លងកាត់ទៅរាសី១ផ្សេងទៀតបាន។
ផ្កាយព្រះសៅរ៍ (សោរមមហាទេវោ) មានរស្មីពណ៌ខ្មៅបែបផ្កាអញ្ជ័ន(នីល) ក្នុង១ថ្ងៃគោចរបាន ២៥០យោជន៍ ឆ្លងកាត់រាសី១(តារានិករ១) ។ លុះគ្រប់២ឆ្នាំ៦ខែ ទើបអាចឆ្លងកាត់ទៅរាសី១ផ្សេងទៀតបាន។
តាមហោរាសាស្ត្រ បើព្រះគ្រោះធ្វើដំណើរទៅដល់រាសីណា១ហើយនោះ គេហៅថា ពាក់មណ្ឌល។ បើដើរយឺតទៅដល់រាសីមិនទាន់តាមក្បួនកំណត់ គេហៅថា សេកៈ ។ បើព្រះគ្រោះ ដើររហ័សទៅដល់រាសីមុនកំណត់គេហៅថា ពាក់កិរិយា។ ផ្កាយព្រះគ្រោះទាំងអស់ធ្វើដំណើរជា ទក្ខិណាវដ្ត មិនមែនដើរជា ឧត្តរវដ្តទេ ។
