តោះយេីងអាន-Let's read

តោះយេីងអាន-Let's read ចែករំលែកចំណេះដឹងដល់អ្នកដទៃវាជាកាត?

#រឿងរ៉ាវខ្លះៗដែលអ្នកអស់សំណើចនឹងខ្លួនឯងពេលនឹកឃើញរឿងនៅកាលពីតូចកាលនៅពីតូច តែងតែជឿចាស់ៗនិយាយគ្រប់បែបយ៉ាង។ ឆោតក៏ឆោត ស្តាប់បង...
15/02/2021

#រឿងរ៉ាវខ្លះៗដែលអ្នកអស់សំណើចនឹងខ្លួនឯងពេលនឹកឃើញរឿងនៅកាលពីតូច

កាលនៅពីតូច តែងតែជឿចាស់ៗនិយាយគ្រប់បែបយ៉ាង។ ឆោតក៏ឆោត ស្តាប់បង្គាប់ក៏ស្តាប់បង្គាប់ ឲ្យតែចាស់ៗនិយាយអីដឹងតែជឿស្លុងតែម្តង។ ពេលខ្លះមិនហ៊ានធ្វើ ខ្លាចជួបរឿងបែបហ្នឹង។ នឹកឃើញដល់រឿងទាំងអស់នោះ គួរឲ្យចង់សើច៖
១. ញ៉ាំបាយបណ្តើរ ដេកបណ្តើរ នឹងដុះកន្ទុយដូចក្រពើ

២. ញ៉ាំចុងអំពៅ ឬកន្ទុយត្រី ចេះហែលទឹក

៣. ពេលលឺភ្លេងហែសព ត្រូវបិទផ្ទិតឲ្យជិត កុំឲ្យខ្មោចចូល

៤. មិនឲ្យរកចៃ ប្រយ័ត្នចៃសែងទម្លាក់ទឹក

៥. ញ៉ាំពងត្រី មុខឡើងមុន

៦. ច្រៀងពេលកំពុងធ្វើម្ហូប បានប្តីពោះម៉ាយឬប្រពន្ធមេម៉ាយ

៧. ញ៉ាំបាយក្តាំង ក្បាលរឹង
~~~~~~~
អ្នកនិពន្ធ៖ រ៉េត សុភ័ក្រ
១៥.០២.២០២១
រូបភាព៖ Pinterest

#ប្រចណ្ឌព្រោះតែមិនទុកចិត្ត បើតាមសង្កេតមើលទៅ នៅពេលដែលស្រលាញ់គ្នាដំបូង មនុស្សយើងម្នាក់ៗតែងតែព្យាយាមផ្គាប់ចិត្តដៃគូគ្រប់បែ...
13/02/2021

#ប្រចណ្ឌព្រោះតែមិនទុកចិត្ត

បើតាមសង្កេតមើលទៅ នៅពេលដែលស្រលាញ់គ្នាដំបូង មនុស្សយើងម្នាក់ៗតែងតែព្យាយាមផ្គាប់ចិត្តដៃគូគ្រប់បែបគ្រប់យ៉ាង មិនថាធ្វើអ្វីក៏ដោយ ក៏មិនហ៊ានប្រកែក។ លុះដល់ពេលដែលបានស្រលាញ់គ្នាយូរៗទៅ អ្នកខ្លះក៏មានចិត្តប្រចណ្ឌដៃគូទៅវិញ។ តើការប្រចណ្ឌនេះកើតឡើងមកពីអ្វី? អ្នកខ្លះនិយាយថា ការប្រចណ្ឌកើតឡើងពីការស្រលាញ់។ ចុះបើស្រលាញ់ ហេតុអ្វីបានជាត្រូវប្រចណ្ឌ?

តាមពិតទៅ ការប្រចណ្ឌកើតឡើងដោយសារតែការមិនទុកចិត្តទៅលើដៃគូ ដោយខ្លាចបាត់បង់ទៅឱ្យអ្នកផ្សេង ឬចង់ឱ្យដៃគូខ្វល់តែពីខ្លួនឯង។ ប្រសិនបើអ្នកកំពុងប្រកាន់យកនូវឥរិយាបថបែបនេះ សូមពិចារណាឡើងវិញជាថ្មីម្ដងទៀត។

នៅពេលដែលមនុស្សណាម្នាក់ព្រមមកស្រលាញ់យើង គេក៏ចង់បាននូវសេរីភាព និងការគោរពទៅលើភាពឯកជននោះដែរ។ បើអ្នកប្រចណ្ឌខ្លាំង រហូតដល់គ្រាន់តែនិយាយជាមួយមិត្តភក្តិប្រុសឬស្រីមិនបានដែលនោះ ស្នេហារបស់អ្នកក៏មិនខុសប្លែកអ្វីពីការចាប់សេកដាក់ក្នុងទ្រុងដែកនោះដែរ។ យើងមិនមែនជាមនុស្សតែម្នាក់នៅក្នុងជីវិតរបស់គេឡើយ។ ដូច្នេះ តើវាជារឿងត្រឹមត្រូវដែរឬទេដែលត្រូវហាមឃាត់គេមិនឱ្យជួប ឬនិយាយជាមួយនឹងអ្នកផ្សេងពេញ២៤ម៉ោងនោះ? ស្នេហាបែបប្រចណ្ឌជ្រុលនឹងនាំមកឱ្យដៃគូទាំងសងខាងនូវភាពធុញទ្រាន់ នឿយហត់ សម្ពាធផ្លូវចិត្ត ហើយមិនយូរមិនឆាប់នោះទេ វានឹងឈានទៅរកផ្លូវបញ្ចប់។
~~~~~
អ្នកនិពន្ធ៖ រ៉េត សុភ័ក្រ
១៣.០២.២០២១
រូបភាព៖ Pinterest

#សុំទោសខ្លួនឯង-សុំទោសខ្លួនឯង ដែលខំព្យាយាមរស់នៅក្នុងអតីតកាលទាំងដឹងថាវាមិនមែនបច្ចុប្បន្នកាល -សុំទោសខ្លួនឯង ប្រើអ្នកឱ្យធ្វ...
13/02/2021

#សុំទោសខ្លួនឯង

-សុំទោសខ្លួនឯង ដែលខំព្យាយាមរស់នៅក្នុងអតីតកាលទាំងដឹងថាវាមិនមែនបច្ចុប្បន្នកាល

-សុំទោសខ្លួនឯង ប្រើអ្នកឱ្យធ្វើអ្វីគ្រប់យ៉ាង គ្មានពេលសម្រាក

-សុំទោសខ្លួនឯង ដែលខំទុកចិត្តស្រលាញ់មនុស្សខុសហើយ មិនព្រមដកខ្លួនចេញ

-សុំទោសខ្លួនឯង ដែលបានមើលងាយខ្លួនឯង មិនលើកទុកចិត្តខ្លួនឯង ហើយហ៊ានទាំងប្រមាថជីវិតខ្លួនឯងទៀត នៅពេលដែលបាក់ទឹកចិត្ត

-សុំទោសខ្លួនឯង ដែលរកសេចក្តីសុខសម្រាប់ខ្លួនឯងមិនបាន បំពេញតែតម្រូវចិត្តនិងផ្គាប់ចិត្តអ្នកដទៃ

-សុំទោសខ្លួនឯង នៅតែខំប្រឹងញញឹម ទោះបីក្នុងចិត្តមិនមែនដូច្នេះ

-សុំទោសខ្លួនឯង មិនហ៊ានទទួលយកការពិត សុខចិត្តនៅទ្រាំឈឺចាប់

-រិតតែសុំទោសខ្លួនឯង ហេតុអ្វីមិនព្រមក្រោកឈរ បោះចោលរឿងមិនល្អ ចាប់ផ្តើមធ្វើអ្វីដែលខ្លួនឯងស្រលាញ់។
~~~~~~~~~
អ្នកនិពន្ធ៖ រ៉េត សុភ័ក្រ
១៣.០២.២០២១
រូបភាព៖ Pinterest

#កាហ្វេមួយកែវមិនស្មើសៀវភៅមួយក្បាលឬសៀវភៅមួយក្បាលមិនស្មើកាហ្វេមួយកែវ?ជាទូទៅមនុស្សជាច្រើនស្រលាញ់សៀវភៅខ្លាំងណាស់ តែមិនហ៊ានទ...
10/02/2021

#កាហ្វេមួយកែវមិនស្មើសៀវភៅមួយក្បាលឬសៀវភៅមួយក្បាលមិនស្មើកាហ្វេមួយកែវ?

ជាទូទៅមនុស្សជាច្រើនស្រលាញ់សៀវភៅខ្លាំងណាស់ តែមិនហ៊ានទិញសៀវភៅយកមកអានទេ។ ឃើញគេទៅទិញសៀវភៅ គេចែកសៀវភៅទៅដែរ ឱ្យតែមានមុខ។ តែត្រឡប់មកវិញ យកសៀវភៅមកទុកចោល ទុកឱ្យសៀវភៅមើលវិញ។ អ្នកខ្លះទៀតចូលទៅទិញសៀវភៅអាន សួរសិន មានIdolខ្ញុំគាត់នៅហ្នឹងអត់ បើនៅ បានទៅចូលរួម។ ចួនកាលទៅដើម្បីថតរូប រួចធ្វើទិញសៀវភៅមួយក្បាល ដើម្បីបានស៊ីញ៉េត្រឡប់មកផ្ទះវិញ។

ឥលូវហាងកាហ្វេក៏មានដាក់សៀវភៅឱ្យអានច្រើនដែរ។ អ្នកខ្លះចូលហាងកាហ្វេ ទាញសៀវភៅពីរបីក្បាលយកមកដាក់ទ្រាប់ដៃ ហើយជជែកគ្នា។ ផឹកកាហ្វេរួច យកសៀវភៅទុកវិញអត់បានអានមួយម៉ាត់។ អ្នកខ្លះវិញបបួលទៅទិញសៀវភៅនិយាយថា "អត់លុយទេ"។ សៀវភៅទិញមកស៊ី អត់កើត ទិញយកមកអានខាតពេលវេលាអត់ប្រយោជន៍។ តែល្ងាចៗឡើង ឃើញនៅហាងកាហ្វេផឹកសុទ្ធអាថ្លៃ តែថ្អូរថាអត់លុយ។

ខ្ញុំនៅចាំសម្តីអ្នកគ្រូខ្ញុំ ពេលកំពុងរៀន គាត់បានមានប្រសាសន៍ថាប្រហែលជាឆ្នាំ២០១៥ ឆ្នាំនោះគេប្រកួតបោះឆ្នោតតាមប្រព័ន្ធonline ជ្រើសរើសសម្បត្តិបេតិភណ្ឌជាតិប្រចាំប្រទេសនីមួយៗ។ ខ្មែរយើងក៏បានដាក់ចូលប្រកួតដែរ គឺប្រាសាទអង្គរវត្ត។ គាត់មានប្រសាសន៍ថាប្រាសាទអង្គរវត្តមិនបានលេខ១ទេ គ្រប់គ្នាក្នុងថ្នាក់ឆ្ងល់សម្តីរបស់គាត់។ គាត់បន្តទៀតថាត្រូវបានលេខ១ តែមិនបាន។ គាត់បន្តទៀតថា ម្នាក់ៗមិនហ៊ានចំណាយលុយ២០០០រៀលចូលInternetបោះឆ្នោតឱ្យទេ។ សុខចិត្តទិញកាហ្វេម្នាក់មួយកែវតម្លៃលើស២០០០រៀលអង្គុយក្រោមដើមឈើជជែងគ្នាវិញ។

ទោះបីបានលេខមួយក៏មិនមែនមនុស្សមួយប្រទេសខ្មែរជាអ្នកបោះឆ្នោតឱ្យដែរ។ ប្រហែលជាប្រទេសគេទៅវិញទេ ដែលស្រលាញ់ប្រាសាទអង្គរវត្តខ្មែរពិតៗ។ លទ្ធផលអត់បានលេខ១ដូចគាត់និយាយមែនគឺបានលេខ៣។ ដើម្បីប្រាសាទខ្លួនឯងជាប់ជាបេតិភណ្ឌជាតិ សូម្បីចំណាយលុយបន្តិចបន្តួចមិនហ៊ានចំណាយផង។ សៀវភៅបោះពុម្ពរៀងរាល់ថ្ងៃជាច្រើនក្បាល តែអ្នកអានសៀវភៅនៅតែអាន អ្នកមិនអាននៅតែមិនអាន។ សួរថាសៀវភៅដែលបោះពុម្ពថ្មីៗជាច្រើនក្បាលទុកឱ្យអ្នកណាអាន។

ពេលខ្លះតម្រូវឱ្យអ្នកនិពន្ធសៀវភៅ និពន្ធបំពេញចិត្តខ្លួនជាអ្នកអានទៅវិញ។ ធ្វើបែបហ្នឹង ធ្វើឱ្យអ្នកនិពន្ធបាត់បង់មនសិកាខ្លួនឯងដើម្បីលុយ មិនមែនដើម្បីចេញពីពាក្យពិត អារម្មណ៍ពិត សរសេរមកចង់ឱ្យអ្នកអានចេះយកមកប្រើជាប្រយោជន៍ដើម្បីប្រទេសជាតិ។ តើអ្នកនិពន្ធត្រូវចំណាយពេលវេលា ខួរក្បាល បេះដូង ការភ័យខ្លាច ការលះបង់អ្វីខ្លះ? ពេលខ្លះចង់អោយអ្នកអានដឹងអ្វីដែលជាពាក្យពិត ចុះផ្ទាល់រៀនផ្ទាល់ខ្លួនឯង ដើម្បីកុំឱ្យគេថាយើងសរសេរទៅកុហកគេ។ សរុបមកចំណាយលុយដើម្បីសៀវភៅខ្លះទៅមួយខែតែ១ក្បាលក៏បានដែរ កុំចំណាយទៅលើកាហ្វេច្រើនពេក។
~~~~~~~~~
អ្នកនិពន្ធ៖ រ៉េត សុភ័ក្រ
១០.០២.២០២១
រូបភាព៖ Pinterest

#អរគុណខ្លួនឯង- អរគុណខ្លួនឯងដែលមកដល់នេះ នៅតែមិនព្រមចុះចាញ់នឹងឧបសគ្គទាំងឡាយ- អរគុណខ្លួនឯងដែលមិនបានយកពាក្យសម្តីរបស់អ្នកដទៃ...
04/02/2021

#អរគុណខ្លួនឯង

- អរគុណខ្លួនឯងដែលមកដល់នេះ នៅតែមិនព្រមចុះចាញ់នឹងឧបសគ្គទាំងឡាយ

- អរគុណខ្លួនឯងដែលមិនបានយកពាក្យសម្តីរបស់អ្នកដទៃមកគិតច្រើន ហើយជ្រើសរើសដើរនៅលើផ្លូវជីវិតក្នុងនាមជាខ្លួនឯង

- អរគុណខ្លួនឯងដែលនៅតែញញឹម ទោះបីជាដឹងថាមានបញ្ហាប្រឈមជាច្រើនកំពុងតែរង់ចាំ ប៉ុន្តែនៅតែព្យាយាមដើម្បីដោះស្រាយវាឱ្យបាន

-អរគុណខ្លួនឯងដែលតែងតែរឹងមាំ ទោះបីកំពុងស្ថិតនៅក្នុងកាលៈទេសៈលំបាកយ៉ាងណាក៏ដោយ នៅតែពុះពារដើម្បីដើរទៅមុខបន្ត

-អរគុណខ្លួនឯងដែលនៅតែបន្តប្រព្រឹត្តអំពើល្អ ដោយមិនរំពឹងចង់បានអ្វីត្រឡប់មកវិញ

-អរគុណខ្លួនឯងដែលនៅតែមានភាពរីករាយក្នុងចិត្ត បើទោះបីជានឿយហត់ផ្លូវកាយជារៀងរាល់ថ្ងៃយ៉ាងណាក៏ដោយ

-អរគុណខ្លួនឯងដែលព្រមទទួលយកការរិះគន់ពីអ្នកដទៃដើម្បីកែប្រែជីវិតឱ្យកាន់តែប្រសើរឡើង

-អរគុណខ្លួនឯងដែលព្រមដើរតាមក្តីស្រមៃរបស់ខ្លួន ហើយមិនបោះបង់វាចោលដោយងាយៗ

-ចុងបញ្ចប់ រឹតតែអរគុណខ្លួនឯងដែលតែងតែលើកទឹកចិត្តខ្លួនឯងឱ្យរឹងមាំគ្រប់ពេលវេលា។
~~~~~~
អ្នកនិពន្ធ៖ រ៉េត សុភ័ក្រ
០៤.០១.២០២១
រូបភាព៖ Pinterest

#រឿងវិស្សមកាលព្រឺព្រួច #វគ្គកោះមរណៈសេចក្តីមរណៈកំពុងរង់ចាំអ្នក សម្រាប់វិស្សមកាលដ៏ព្រឺព្រួចមួយនេះ បើអ្នកចង់ជួបវា ហេតុអ្វ...
31/01/2021

#រឿងវិស្សមកាលព្រឺព្រួច
#វគ្គកោះមរណៈ

សេចក្តីមរណៈកំពុងរង់ចាំអ្នក សម្រាប់វិស្សមកាលដ៏ព្រឺព្រួចមួយនេះ បើអ្នកចង់ជួបវា ហេតុអ្វីត្រូវខ្លាច.....

ជាសាច់រឿងមួយវគ្គចប់ វគ្គថ្មីចេញឆាប់ៗនេះ

សុំទោសចំពោះអក្ខរាវិរុទ្ធណាមួយដែលខុសឆ្គងទុកជាមុន
៣១.០១.២០២១
Link សាច់រឿង
~~~~~~~
https://documentcloud.adobe.com/link/review?uri=urn:aaid:scds:US:8a489370-3df2-4d75-9411-a7485a6ec131

#ប្រើបេះដូងឬប្រើខួរក្បាល មនុស្សយើងម្នាក់ៗសុទ្ធសឹងតែកើតមកដោយមាននូវបេះដូងនិងខួរក្បាលគ្រប់ៗគ្នា។ ប៉ុន្តែហេតុអ្វីទើបបានជាអ្...
30/01/2021

#ប្រើបេះដូងឬប្រើខួរក្បាល

មនុស្សយើងម្នាក់ៗសុទ្ធសឹងតែកើតមកដោយមាននូវបេះដូងនិងខួរក្បាលគ្រប់ៗគ្នា។ ប៉ុន្តែហេតុអ្វីទើបបានជាអ្នកខ្លះសុខចិត្តលះបង់អ្វីៗគ្រប់យ៉ាង ដើម្បីបានផ្គាប់ចិត្តអ្នកដទៃ ដោយមិនប្រើខួរក្បាលនិងបេះដូងរបស់អ្នកជាអ្នកសម្រេចទៅវិញ។

តាមពិតទៅ ទាំងខួរក្បាលនិងបេះដូងពិតជាសំខាន់សម្រាប់ជីវិតអ្នកខ្លាំងណាស់។ ចូរប្រើបេះដូងរបស់អ្នកដើម្បីផ្ដល់សេចក្តីស្រលាញ់ ការអាណិត និងការអត់ឱនចំពោះអ្នកដទៃ។ ចូរកុំប្រើបេះដូងរបស់អ្នក ដើម្បីក្បត់អ្នកដទៃ បោកប្រាស់ បំផ្លាញទឹកចិត្តល្អរបស់អ្នក ឬបំផ្លាញសេចក្តីស្នេហារបស់នរណាម្នាក់ឱ្យសោះ។ បេះដូងរបស់អ្នកអាចមានឥទ្ធិពលខ្លាំងណាស់ មិនថាចំពោះអ្នកដទៃឬខ្លួនឯងនោះទេ។ ប៉ុន្តែបើអ្នកមិនចេះប្រើប្រាស់បេះដូងឱ្យបានត្រឹមត្រូវ វាក៏អាចនឹងបង្កទៅជាបញ្ហាសម្រាប់អ្នកវិញបាន។ មនុស្សខ្លះបានក្លាយទៅជាមនុស្សល្ងង់ ឬមនុស្សដែលរស់នៅវិលវល់ក្នុងអតីតកាល ដោយសារតែប្រើប្រាស់បេះដូងច្រើនពេកក្នុងការសម្រេចចិត្ត។

ចំណែកឯខួរក្បាលរបស់អ្នកវិញក៏ដូចគ្នា។ វាគឺជាសរីរាង្គដ៏សំខាន់សម្រាប់ការគិត វិភាគ និងពិចារណាយ៉ាងល្អិតល្អន់។ ដូច្នេះ ចូរប្រើខួរក្បាលរបស់អ្នកឱ្យមានតម្លៃសម្រាប់ជួយខ្លួនឯង អ្នកដទៃ និងសង្គមជាតិ។ ខួរក្បាលរបស់អ្នកពិតជាមានឥទ្ធិពលខ្លាំងណាស់ ព្រោះវាគឺជាអ្នកកំណត់ទៅលើគ្រប់ផ្នែកនិងគ្រប់សកម្មភាពទាំងអស់របសអ្នក។ សូមចងចាំថា ខួរក្បាលនិងបេះដូងត្រូវដើរទន្ទឹមគ្នា ទើបអាចធ្វើឬសម្រេចការងារមួយ បានជោគជ័យយ៉ាងវិសេសវិសាលបាន។
~~~~~~~~~
អ្នកនិពន្ធ៖ រ៉េត សុភ័ក្រ
៣០.០១.២០២១
រូបភាព៖ Pinterest

#ស្អប់ពាក្យសន្យាអ្នកណាក៏ធ្លាប់សន្យា អ្នកណាក៏ធ្លាប់ស្តាប់ពាក្យសន្យា។ ពាក្យសន្យាមានច្រើនបែប ច្រើនទម្រង់ និងច្រើនអត្ថន័យខ្...
28/01/2021

#ស្អប់ពាក្យសន្យា

អ្នកណាក៏ធ្លាប់សន្យា អ្នកណាក៏ធ្លាប់ស្តាប់ពាក្យសន្យា។ ពាក្យសន្យាមានច្រើនបែប ច្រើនទម្រង់ និងច្រើនអត្ថន័យខ្លាំងណាស់ "សន្យាថាមិនបោះបង់អ្នក រង់ចាំអ្នក មិនឱ្យអ្នកឈឺចាប់ មិនឱ្យអ្នករង់ចាំយូរ ថ្ងៃណាមួយនឹងរៀបការជាមួយគ្នា"។ ប៉ុន្តែចុងក្រោយ ការសន្យាទាំងអស់នេះ បានក្លាយទៅជាការពិតសម្រាប់មនុស្សដែលបានគោរពពាក្យសន្យាច្បាស់លាស់តែប៉ុណ្ណោះ។

ផ្ទុយទៅវិញ សម្រាប់មនុស្សខ្លះ ពួកគេបានចាត់ទុកការសន្យាត្រឹមជារឿងលេងសើច។ ពាក្យថា "ឱ្យរង់ចាំ" មិនប្រាកដថា មនុស្សគ្រប់គ្នាសុខចិត្តនៅរង់ចាំអ្នកម្ភៃបួនម៉ោងនោះទេ ហើយក៏មិនប្រាកដថាអ្នកអាចធ្វើតាមសន្យាបាននោះដែរ។

ពាក្យសន្យាអាចក្លាយទៅជារឿងមួយដែលគ្រប់គ្នាស្អប់ ធ្វើឱ្យមនុស្សគ្រប់គ្នាខ្លាចរអា ហើយពេលខ្លះ ពាក្យសន្យា បានប្រែក្លាយពីមិត្តឬគូស្នេហ៍ ទៅជាសត្រូវនឹងគ្នាក៏មាន។ សម្រាប់មនុស្សដែលមិនសូវជិតដិតនឹងគ្នា ពាក្យសន្យាអាចជារឿងដែលមិនសូវសំខាន់។ ប៉ុន្តែសម្រាប់មនុស្សដែលជិតដិតនឹងយើងបំផុត ពាក្យសន្យា ពិតជាសំខាន់ណាស់សម្រាប់ពួកគេ។

បើជ្រុលជាសន្យាហើយ ហេតុអ្វីធ្វើមិនបាន ឬគោរពមិនបាន? ចុះដើមឡើយ ហេតុអ្វីទើបបានជាហាមាត់និយាយពាក្យសន្យាចេញមក បើគង់តែធ្វើមិនបានបែបនេះ?

អ្វីដែលបានលើកឡើងខាងលើនេះ មិនមែនចង់ឱ្យគ្រប់គ្នាស្អប់ពាក្យសន្យានោះទេ តែក៏ត្រូវមើលតាមកាលៈទេសៈដែរ។ អ្នកខ្លះ មនុស្សដែលសន្យានឹងអ្នកអាចនឹងមានហេតុផលផ្ទាល់ខ្លួនដែលមិនអាចនឹងធ្វើតាមពាក្យសន្យាបាន ប៉ុន្តែសម្រាប់អ្នកខ្លះ ពាក្យសន្យាគ្រាន់តែជាឈ្នាន់ សម្រាប់ពួកគេយកមកលេងសើចសប្បាយ។ សូមចងចាំថា ពាក្យសន្យាដែលមានតម្លៃ គឺជាពាក្យសន្យាដែលនិយាយហើយអាចធ្វើបានឬគោរពតាម មិនមែនជាពាក្យសន្យាដែលធ្វើឱ្យនរណាម្នាក់ឈឺចាប់ឬស្អប់យើងនោះឡើយ។
~~~~~~~
អត្ថបទដោយ៖ រ៉េត សុភ័ក្រ
២៨.០១.២០២១
រូបភាព៖ Pinterest

#ខូចចិត្តដើម្បីអ្នកណា? ខូចចិត្ត តូចចិត្ត ពិបាកចិត្ត មិនមានទំនុកចិត្ត លះបង់គ្រប់យ៉ាង ខ្វល់ខ្វាយគ្រប់យ៉ាង តើដើម្បីអ្នកណា?...
25/01/2021

#ខូចចិត្តដើម្បីអ្នកណា?

ខូចចិត្ត តូចចិត្ត ពិបាកចិត្ត មិនមានទំនុកចិត្ត លះបង់គ្រប់យ៉ាង ខ្វល់ខ្វាយគ្រប់យ៉ាង តើដើម្បីអ្នកណា? សួរខ្លួនឯងពីរឬបីដងយ៉ាងតិច មុននឹងគិតថាអ្វីៗមិនអាចដោះស្រាយ ហើយឈានទៅរកការបញ្ចប់ជីវិត។

មនុស្សរឹងមាំ គិតថាការខូចចិត្តជារឿងសាមញ្ញ អ្នកណាក៏ចេះខូចចិត្ត តែមនុស្សទន់ជ្រាយគិតមិនចេញ រកផ្លូវមិនឃើញ។ អ្វីដែលគេសម្លឹងឃើញ គឺរឿងតែម៉្យាង បើហ៊ានប្រឈមមុខ គេអាចនឹងមានភាពអាម៉ាស់ តែបើគេចវេះ គេនឹងមានកំហុសកាន់តែខ្លាំង។

នៅពេលដែលសម្ពាធកើនឡើងហើយរកផ្លូវដោះស្រាយមិនរួច មនុស្សទន់ខ្សោយចាប់ផ្តើមចុះចាញ់ នឹកឃើញតែការស្លាប់ដើម្បីបញ្ចប់រឿងទាំងអស់នោះ។ ផ្ទុយពីមនុស្សរឹងមាំ គេនៅតែជម្នះនិងប្រឈមមុខ ទោះបីដឹងថាបញ្ហាទាំងអស់នោះពិបាកដោះស្រាយយ៉ាងណាក៏ដោយ។

និយាយឱ្យខ្លីទៅ បើជ្រុលជាខូចចិត្តទៅហើយ កុំខូចចិត្តយូរពេក។ សួរខ្លួនឯងថា តើខូចចិត្តដើម្បីនរណា? តើវាបានអ្វីមកវិញឬអត់? បើអ្នកយកពេលខូចចិត្ត មកអភិឌ្ឍខ្លួនឯង វាមិនល្អជាងទេឬ? បើអ្នកសម្ងំតែនៅក្នុងបន្ទប់ មិនព្រមធ្វើអ្វី គិតតែពីដេកហើយឱបក្រសោបបញ្ហា នោះអ្នកមិនអាចចាកចេញពីស្រមោលអតីតកាលដ៏ឈឺចាប់នោះបានទេ។ ចូរគិតឡើងវិញ ដោយយកដៃជូតទឹកភ្នែកចេញ ហើយញញឹមជាថ្មី ព្រោះអ្វីៗវាបានកន្លងហួសអស់ហើយ ហេតុអ្វីត្រូវនៅស្តាយទៀត?

បើអ្នកចង់បានអ្វីថ្មីឱ្យកាន់តែល្អជាងមុន ចូរចាប់ផ្តើមធ្វើវានៅថ្ងៃនេះ។ ការខូចចិត្តគ្រាន់តែជាអារម្មណ៍មួយ តែបើអ្នកនៅតែបន្តទុកវារហូត មិនយូរទេ ថ្ងៃណាមួយអ្នកនឹងបោះបង់ខ្លួនឯង បណ្តោយខ្លួនឯង បន្តស្តាប់អ្នកដទៃ ហើយចុងក្រោយ លទ្ធផលដែលអ្នកទទួលបានគឺមានតែការឈឺចាប់បន្ថែមលើមុខរបួសចាស់ដដែល។
~~~~~~~~~~
អ្នកនិពន្ធ៖ រ៉េត សុភ័ក្រ
២៥.០១.២០២១
រូបភាព៖ Pinterest

#សង្ខេបរឿងដំណើរជីវិតវិលទៅរកអតីតកាលដ៏រុងរឿងសាច់រឿងដែលនិយាយពីមនុស្ស៤នាក់ជាមិត្តភក្តិនឹងគ្នា ដែលរៀននៅសាកលវិទ្យាភូមិន្ទវិចិ...
24/01/2021

#សង្ខេបរឿងដំណើរជីវិតវិលទៅរកអតីតកាលដ៏រុងរឿង

សាច់រឿងដែលនិយាយពីមនុស្ស៤នាក់ជាមិត្តភក្តិនឹងគ្នា ដែលរៀននៅសាកលវិទ្យាភូមិន្ទវិចិត្រសិល្បះ ផ្នែកបូរាណវិទ្យា។ កុម្ភៈ វុទ្យា ដេវីត និងលីកា ជាមិត្តនឹងគ្នាតាំងពីរៀនបឋម ជាមួយគ្នា។ ពួកគេចូលចិត្តរៀនបូរាណវិទ្យា ដោយសារតែស្រលាញ់ប្រាសាទខ្មែរ វត្ថុបូរាណ ជាពិសេស គឺចូលចិត្តដំណើរផ្សេងព្រេង។ ដែលឆុតឆាកដំបូងនិយាយពីការណែនាំខ្លួនរបស់ពួកគេ ពីចរិតលក្ខណៈ។ បន្តៗមកទៀតនិយាយពីការធ្វើកម្មវិធីនៅសាលា ដែលទាក់ទងទៅនឹង ល្ខោន ចង្វាក់រាំរបស់ខ្មែរជាដើម។ គ្នាគេទាំងបួននាក់តែងតែទៅណាមកណាជាមួយគ្នា មិនថាដើរលេង ឬចុះកម្មសិក្សានោះទេ។ អស់រយៈពេលបីឆ្នាំ សាលាបានរើសសិស្សដើម្បីចុះកម្មសិក្សា នៅឯខេត្តបាត់ដំបង គឺល្អាងស្ពាន ដែលជាបុរេប្រវត្តិរបស់ខ្មែរ។ ពួកគេបានជួយហ្នឹង រឿងរ៉ាវជាច្រើនដែលមិននឹកស្មាន ការកំណាយឃើញឆ្អឹងរបស់មនុស្សសម័យមុន មានចោរចូលមកលួចវត្ថុបូរាណជាដើម។ ដែលមានរឿងរ៉ាវជាច្រើនទៀត ធ្វើឲ្យពួកគេភ័យខ្លាច តែពួកគេមិនបោះបង់។ ដល់ឆ្នាំទី៤ ជាឆ្នាំបញ្ចប់ ពួកគេត្រូវបានទៅចុះកម្មសិក្សានៅឯជិតប្រាសាទកោះកេរ្តិ៍ នៅខេត្តព្រះវិហារ។ ហើយបានជួបរឿង ពិបាកៗជាច្រើន មានសប្បាយ កើតទុក្ខ យំសើច ជួបនឹងមនុស្សថ្មី កន្លែងថ្មីដែលពិបាករស់នៅ។ ជិតកម្មសិក្សាចប់ ពួកគេបានសុំគ្រូរបស់ពួកគេទៅលេងប្រាសាទអង្គរវត្ត និងទឹកធ្លាក់ភ្នំគូលែន។ តែជារឿងដែលមិននឹកស្មាន គ្នាគេទាំងបួនអ្នក បានរអិលធ្លាក់ទឹកជ្រោះនៅឯភ្នំគូលែន។ ហើយបានឆ្លងភពមកសម័យអង្គរ ដែលកំពុងសាងសង់។ ដោយពួកគេត្រូវបានដូនចាស់ម្នាក់ បានយកពួកគេមករស់នៅជាមួយ។ ហើយតួអង្គ លីកាបានប្រែទៅជាស្នំឯក របស់កូនស្តេច តែមិនចាំអ្វីទាំងអស់។ ចំណែកកុម្ភៈ វុទ្យា និងដេវីត មានការចងចាំទាំងអស់។ ពួកគេរស់នៅក្នុងសម័យអង្គរ ដោយពិបាកវេទនា ដោយសារតែ គេប្រើប្រាស់ភាសាសម័យនោះដើម្បីទំនាក់ទំនង។ មានតែកុម្ភៈទេ ដែលចេះភាសាសម័យអង្គរ។ ពួកគេត្រូវបាន លោកយាយយកមកចិញ្ចឹម ដោយលោកយាយជាគ្រូបង្រៀនភាសាសម័យអង្គរនៅសម័យនោះ។ ដោយគំនិតវ័យឆ្លាតរបស់កុម្ភៈ ដែលចេះច្នៃយកស្លឹកទ្រាំង មកធ្វើជាក្រដាសសៀវភៅ ធ្វើឲ្យកុម្ភៈជាមនុស្សដែលគេស្គាល់គ្រប់គ្នា។ តែចៃដន្យនៅពេលកុម្ភៈ ធ្លាក់ខ្លួនឈឺ លោកយាយបានចូលទៅវាំង(ប្រាសាទអង្គរវត្ត) សុំឲ្យគេមកព្យាបាលកុម្ភៈ ដែលត្រូវបានជួបព្រះនាង (តួអង្គលីកា) បានជួយ ដោយឲ្យគ្រូពេទ្យ មកជួយព្យាបាលកុម្ភៈ។ នៅពេលដែលកុម្ភៈបានជា បានឲ្យលោកយាយ នាំពួកគេទៅក្នុងវាំងដើម្បីអរគុណព្រះនាង។ នៅពេលពួកគេបានជួបព្រះនាង អ្វីដែលពួកគេបានឃើញ គិតថាជាមិត្តរបស់ពួកគេតែប៉ុណ្ណោះ (លីកា)។ ដេវីតនិងវុទ្យា ពួកគេឆ្ងល់គ្រប់រឿងបែបយ៉ាង។ ដោយថ្ងៃមួយពួកគេទាំងបីនាក់ ឆ្លៀតលោកយាយមិននៅ បានទៅរកលីកាក្នុងវាំង ចៃដន្យត្រូវព្រះនាងចាប់បាន តែដោយដឹងថាពួកគេជា ចៅលោកយាយ ក៏មិនយកទោស។ ដោយបានឲ្យពួកគេ នាំទៅលេងសំណាក់លោកយាយ ដោយសារតែកាលព្រះនាងនៅតូច ធ្លាប់ជាកូនសិស្សលោកយាយ។ ពេលទៅដល់ដំណាក់លោកយាយ ព្រះនាងចង់ចេះវិធីចារលើស្លឹកទ្រាំង ដោយលោកយាយបានឲ្យកុម្ភៈជាអ្នកបង្រៀនព្រះនាងផ្ទាល់ ដោយសារការរកឃើញការសរសេរលើស្លឹកទ្រាំងនេះ ដោយសារកុម្ភៈជាអ្នកនឹកឃើញ។ ព្រះនាងមករៀនរាល់ថ្ងៃនៅដំណាក់លោកយាយ ដោយកុម្ភៈជាអ្នកបង្រៀន ធ្វើឲ្យពួកគេទាំងពីរអ្នក មានចិត្តស្រលាញ់គ្នាទៅវិញទៅមក។ តែដោយព្រះនាងមានស្វាមីដែលជាព្រះបុត្រារួចទៅហើយ ធ្វើឲ្យព្រះបុត្រាជ្រាបដំណឹងនេះ បានឃុំព្រះនាងទុក។ វុទ្យានិងដេវីត ដឹងថាកុម្ភៈមានចិត្តលើព្រះនាង ក៏រកវិធីទៅរំដោះព្រះនាង ដើម្បីឲ្យជួបកុម្ភៈ។ តែត្រូវព្រះបុត្រាតាមទាន់បានសម្លាប់ពួកគេ ចំណែកព្រះនាងបាន រត់មករកកុម្ភៈ។ ពួកគេទាំងពីរអ្នកបានរត់ចូលក្នុងព្រៃជ្រៅ តែនៅតែព្រះបុត្រាដេញតាម រហូតដល់អស់ផ្លូវនៅលើកំពូលភ្នំ។ ត្រូវបានព្រះបុត្រាទាញធ្នូ បម្រុងនឹងសម្លាប់កុម្ភៈ តែត្រូវព្រះនាងរង ក៏ចំបេះដូងព្រះនាងស្លាប់បាត់ទៅ។ ដោយកុម្ភៈគិតថាបើរស់បន្តក៏គ្មានន័យអ្វីដែល ក៏ទាញធ្នូដែលចាក់បេះដូងព្រះនាង ចាក់ឆ្លាយដល់បេះដូងរបស់ខ្លួនស្លាប់បាត់ទៅ នឹងបានហូរតាមទឹកធ្លាក់បាត់រកមិនឃើញ។ នៅពេលពួកគេទាំងបួននាក់ភ្ញាក់ឡើងនៅក្នុងមន្ទីពេទ្យ ដោយសួរលោកគ្រូរបស់គេ ថាពួកគេសម្លប់អស់រយៈពេលជាច្រើនថ្ងៃ។ ធ្វើឲ្យរឿងរ៉ាវដែលគេបានជួប ដោយគិតថាជាសុបិន ឬជាការពិត។
~~~~~~~
Link រឿង
https://documentcloud.adobe.com/link/track?uri=urn:aaid:scds:US:6dc90ea1-c25e-4b39-823e-36cf8613ac5a

Address

Phnom Penh

Opening Hours

Monday 09:00 - 17:00
Tuesday 09:00 - 17:00
Wednesday 09:00 - 17:00
Thursday 09:00 - 17:00
Friday 09:00 - 17:00
Saturday 09:00 - 17:00
Sunday 09:00 - 17:00

Website

Alerts

Be the first to know and let us send you an email when តោះយេីងអាន-Let's read posts news and promotions. Your email address will not be used for any other purpose, and you can unsubscribe at any time.

Shortcuts

Share

Category