03/02/2026
តាមច្បាប់អន្តោប្រវេសន៍របស់សហរដ្ឋអាមេរិក វីសាអន្តោប្រវេសន៍តាមរយៈ គ្រួសារ (Family-Based Immigrant Visas) សម្រាប់ការស្នើសុំកាតបៃតង ត្រូវបានកំណត់ចំនួនអតិបរមា ៤៨០,០០០ វីសាក្នុងមួយឆ្នាំសារពើពន្ធ។ ក្នុងពេលដូចគ្នា វីសាអន្តោប្រវេសន៍តាមរយៈ ការងារ (Employment-Based Immigrant Visas) សម្រាប់រស់នៅ និងធ្វើការនៅសហរដ្ឋអាមេរិក ត្រូវបានកំណត់ចំនួន ១៤០,០០០ វីសាក្នុងមួយឆ្នាំសារពើពន្ធ។
ក្នុងករណីដែលមានការអនុវត្តគោលនយោបាយរឹតបន្តឹងលើការស្នើសុំវីសាអន្តោប្រវេសន៍តាមរយៈគ្រួសារ ធ្វើអោយវីសាប្រភេទនេះ មិនត្រូវបានប្រើប្រាស់អស់តាមចំនួនកំណត់ប្រចាំឆ្នាំ នោះវីសាដែលនៅសល់ នឹងត្រូវបានគេយកមកបែងចែកឡើងវិញ ស្របតាមបទប្បញ្ញត្តិច្បាប់អន្តោប្រវេសន៍ជាធរមាន។
ឧទាហរណ៍ ប្រសិនបើវីសាអន្តោប្រវេសន៍តាមរយៈគ្រួសារមានចំនួនសរុប ៤៨០,០០០ វីសា ប៉ុន្តែអាចប្រើប្រាស់បានត្រឹមតែ ១៨០,០០០ វីសា ក្នុងមួយឆ្នាំសារពើពន្ធ នោះនឹងនៅសល់ចំនួន ៣០០,០០០ វីសា។ វីសាដែលនៅសល់ចំនួននេះ នឹងត្រូវបាន បង្វិលទៅបន្ថែមអោយវីសាអន្តោប្រវេសន៍តាមរយៈការងារ ដើម្បីស្នើសុំកាតបៃតង ស្របតាមច្បាប់អន្តោប្រវេសន៍របស់សហរដ្ឋអាមេរិក។
ដោយហេតុនេះ ប្រសិនបើសហរដ្ឋអាមេរិកបន្តអនុវត្តគោលនយោបាយរឹតបន្តឹងលើវីសាតាមរយៈគ្រួសារ នោះចំនួនវីសាអន្តោប្រវេសន៍តាមរយៈការងារ នឹងមានការកើនឡើងជាបន្តបន្ទាប់ ដែលអាចជួយធ្វើអោយ Visa Bulletin សម្រាប់ប្រភេទ EB-1, EB-2 និង EB-3 មានការរំកិលទៅមុខបានលឿនជាងមុន។
