10/04/2026
ခွင့်ပြန်လုပ်သား ၁၀၀ ကျော် ကို OWIC ကတ်ပါ ကုမ္ပဏီနှင့်လုပ်ကိုင်နေသည့်ကုမ္ပဏီ မတူညီလို့ ဆိုကာ ပြည်ပပြန်ထွက်ခွင့်ပယ်ချ
ပြည်ပအလုပ်အကိုင် အလုပ်သမား သက်သေခံကတ်(OWIC)မှာပါရှိတဲ့
လုပ်ငန်းကုမ္ပဏီနဲ့ အမှန်တကယ်သွားရောက် အလုပ်လုပ်ကိုင်မယ့် လုပ်ငန်းကုမ္ပဏီ မတူလို့ဆိုကာ ပြည်ပကနေ ခွင့်ဖြင့်ပြန်လာတဲ့ လုပ်သား ၁၀၀ကျော်ကို ပြည်ပပြန်ထွက်ခွင့် စစ်ကော်မရှင် လက်အောက်ခံအလုပ်သမားဝန်ကြီးဌာနက ပယ်ချလိုက်တယ်လို့ သိရပါတယ်။
ပြည်ပ ထွက်ခွာမယ့် အလုပ်သမားတွေက အလုပ်သမားဝန်ကြီးဌာနထံ သက်မှတ်ထားတဲ့ အချက်အလက် တွေနဲ့အတူ နေပြည်တော်အလုပ်သမားရုံးကို ပြည်ပထွက်ခွင့်လျှောက်ထားရပြီး ထွက်ခွင့်ပြုခြင်းမပြုခြင်းကို အလုပ်သမားဝန်ကြီးဌာနက ဖွင့်လှစ်ထားတဲ့ Safe Migration တယ်လီဂရမ်ကနေ ထုတ်ပြန်ကြေညာပေးလျက်ရှိပါတယ်။
ပြီးခဲ့တဲ့ မတ်လ နောက်ဆုံးပတ်က စပြီး လက်ရှိအချိန်ထိ OWICကတ်ပါ ကုမ္ပဏီနဲ့လက်ရှိလုပ်နေတဲ့ ကုမ္ပဏီ မတူဘူးဆိုတဲ့ အကြောင်းပြချက်နဲ့ ပြည်ပထွက်ခွင့် ပယ်ချခံရတဲ့ ခွင့်ပြန် လုပ်သား၁၀၀ကျော်ရှိ ကြောင်း စာရင်းတွေအရသိရပါတယ်။
"အရင်က OWICကတ် ကအလုပ်နဲ့ အခု အလုပ် လုပ်ငန်း မတူ လည်း ထွက်ခွင့်ပြုတယ် ပြီးခဲ့မတ်လ နောက်ဆုံးပတ်မှာ စပြီး မပေးတော့တာ လူငယ်တွေ ပြည်ပမထွက်ရအောင် ပိုပြီး တင်းကြပ်လိုက်တာ ဒီလို မတူရင် ထွက်ခွင့်မရဘူးလို့လဲ ကြိုပြီး အသိပေးကြေညာတာမျိုး မရှိတော့ ခွင့်ပြန်လုပ်သားတွေ နစ်နာဆုံးရှုံးမှုပိုများကုန်တာပေါ့""လို့ ပြည်ပထွက်ခွင့်လျှောက်ထားမှုအတွက်ဝန်ဆောင်မှုပေးသူတစ်ဦးကပြောပါတယ်။
အခုလို OWIC ကတ်ပါ အလုပ်နဲ့ လက်ရှိ လုပ်နေတဲ့ အလုပ်မတူညီလို့ ပြည်ပထွက်ခွင့် မရတဲ့ ခွင့်ပြန် လုပ်သားတွေ မှာ ကြိုတင်ဖြတ်ထားတဲ့လေယာဉ်လက်မှတ်ခ များဆုံးရှုံးသလို အချိန်မီ လုပ်ငန်းခွင်မဝင်နိုင် လို့ အလုပ်အကိုင်ဆုံးရှုံးရမယ့် အနေထားတွေပါ ဖြစ်ပေါ်နေတယ်လို့ သိရပါတယ်။
"OWICကတ်နဲ့ အခုလုပ်နေတဲ့ ကုမ္ပဏီနဲ့မတူလို့ ထွက်ခွင့်မရဘူး နေပြည်တော်အလုပ်သမားရုံးကို ဖုန်းဆက်မေးတော့ အချက်အလက်အစုံနဲ့ OWICကတ်ပြန်လုပ်ရမယ် ပြောတယ် အဲ့အတွက်ကြာချိန်က ၃လ အထက်မှာဘဲ ရှိတယ် ခွင့်ယူထားတဲ့ အချိန်နဲ့မလောက်တော့ဘူး ထိုင်းကိုလာတုန်းကတော့ MOUနဲ့ ဟိုရောက်တော့ အလုပ်ကအဆင်မပြေဘဲ တခြားအလုပ်ကိုပြောင်းလိုက်ရတာ တစ်ဖက်နိုင်ငံမှာ ကိုယ့်နိုင်ငံသားတွေ ဘယ်လိုအခက်ခဲနဲ့ရုန်းကန်ရတယ် လုပ်သားအခွင့်ရေးတွေဆုံးရှုံးနေတာကျတော့ မကူညီတဲ့အပြင် ကိုယ့်နိုင်ငံက ထွက်ခွင့်ကိုတောင် အမျိုးမျိုး ပိတ်ပင်နေတာကြီးကတော့ အတော်လေး ဆိုးပါတယ်""လို့ထွက်ခွာခွင့်ပယ်ချခံရတဲ့ခွင့်ပြန်လုပ်သားတစ်ဦးကပြောပါတယ်။
ထွက်ခွာခွင့်ပယ်ချခံရတဲ့ လုပ်သား အများစုမှာ မိမိတို့ရဲ့ အလုပ်အကိုင်ဆုံးရှုံးမှာ ကြောက်ပြီး ပြည်ပထွက်ခွင့်ပြုမယ့် အချိန်ကို မစောင့် တော့ဘဲ အဂတိ လိုက်စားတဲ့ ဌာနဆိုင်ရာဝန်ထမ်း အချို့ စီစဉ်ပေးတဲ့ လမ်းကြောင်း နဲ့ ငွေကြေးများစွာပေးပြီး ရသလို နည်းလမ်းနဲ့ ပြည်ပကို ပြန်လည်ထွက်ခွာနေရတယ်လို့ သိရပါတယ်။
ပြည်ပ ထွက်ခွာရာမှာလည်း လေကြောင်းဖြင့်သွားရောက်တာမျိုးရှိသလို အောက်လမ်းက တစ်ဆင့် ထွက်ခွာသူတွေရှိကာလမ်းကြောင်းရှင်းပေးခ တွေမှာ လည်း အခြေနေပေါ်မူတည်ပြီး ကျပ်သိန်း၄၀အထိ ပေးရတာတွေရှိတယ်လို့ သိရပါတယ်။
#ကိုရီးယားနေထိုင်မှု #မြန်မာ
