06/11/2019
💥කාර්යබහුල මවගේ වැඩකටයුතු සාර්ථක ලෙස කලමණාකරනය කරගැනීමේ රහස්
දරුවන් සමග නිවසේ කාර්යබහුල වන ඔබට ඔබගේ දෛනික වැඩකටයුතු අතපසු වීමකින් තොරව නිසියාකාරව කලමණාකරනය කරගැනීම ලොකුම අභියෝගයක් බව මම අත්දැකීමෙන්ම දන්නවා .ඔබ රාජකාරි කටයුතු සදහා නිවසින් බැහැරව යන මවක් නම් මේ සියලු වැඩකටයුතු අතපසු වීමකින් තොරව නිසිලෙස කලමණාකරනය කරගැනීම ඉතාමත් වැදගත් වෙනවා .කාලයක් මටත් තිබුනා මේ ප්‍රශ්නය .දරුවන් සමග නිවසේ කටයුතු දරුවන්ගෙ විවිධ වෛද්‍ය සායන ඇතුලු ඔවුන්ගේ වැදගත් appointments ගෙදර අඩුපාඩු මගේ අධ්‍යාපනය සම්බන්ධ දේවල් මහත්තයතයට වැදගත් වන දේවල් වැනි හැම දේම මේ ඔලුව ඇතුලට අරගෙන මතක තියාගන්න එක ලේසි දෙයක් වුනේ නෑ.මට මුලින්ම එකවරම නිවුන් දරුවන් ලැබුණු නිසා අත්දැකීම් නැතිකම මේහැමදේම එක්ක වැඩ හැම එකක්ම එකට පැටලිලා .පුදුම මානසික පීඩනයක් දැනුනේ.ඒ නිසා මම ගොඩක්ම උනන්දුවෙන් මගේ වැඩකටයුතු නිසියාකාරව කලමණාකරනය කරගන්නේ කොහොමද කියලා හොයලා බැලුවා .විවිධ දේ කලා .පොත් අරගෙන පිලිවෙලකට හදලා හැම දේම ලියන්න ගත්තා.ඒත් ටික දවසක් යනකොට කාර්යබහුල මට පොතේ පිටු පෙරල පෙරලා අදාළ තැන හොයාගෙන ලියන එකත් වදයක් වුනා. ඉතිං මේ හැමදේම නිසිලෙස කරගන්න කාලයත් සමග සාර්ථක ක්‍රමවේදයන් කිහිපයක් හමුවුණා .ඒ දේවල් මම ඔබ සමග බෙදා ගන්නේ ඉතාමත් ආසාවෙන් .
01 ඔබට ගැලපෙන සුදුසු කැලැන්ඩරයක් තෝරාගන්න.
දරුවන්ට ,ඔබට , මහත්තයාට , නිවසේ, පවුලට වගේම සමාජයට අදාලව ඔබට දිනකට කරන්න තියෙන වැඩකටයුතු එකක්වත් මගනොහැර කරන්න තියෙන සාර්ථක එක ක්‍රමයක් තමයි ඔබට සුදුසු කැලැන්ඩරයක් තෝරාගෙන එහි ලියන්න .මම අනුගමනය කරන වැඩ ඇතුළත් කැලැන්ඩරයට සමාන එකක පින්තූරයක් තියෙනවා .බලන්න .එහි මාසයේ සති 04 පහලට සහ දින 07 හරහට එන විදිහට හදලා තියෙනවා .මෙය ඔබට A4 කොලයක් අරගෙන පහසුවෙන්ම හදන්න පුලුවන් .ඉන්පසු එහි මාසය සහ එම මාසය පටන් ගන්න දවස බලල එහි පටන් ගන්න දවසට 01 දාලා පිලිවෙලකට මාසයට අයත් දින 30 හෝ 31 ලකුණු කරගන්න . මාසය අගහරුවාදා දවසකින් පටන් ගන්නවා නම් මුලින්ම තියෙන අගහරුවාදා ට අංක 01 දමා පිලිවෙලකට ඉලක්කම් ටික ලියන්න . ඔබට වැදගත් වන නිසා හදීසියකට බලන්න පහසු වෙන්න ඒ අවුරුද්දට අදාළ පුංචි කැලැන්ඩරයක් එහි කෙලවරක හෝ ලග තැනක අලවා ගන්න. දැන් ඔබට පුලුවන් දවසේ ඔබට එකතු වන පවුලේ දින වෙන්කර ගත් හමුවීම් appointment ,( වෛද්‍ය ,ගුරුදෙගුරු ) විවිධ වැදගත් සටහන් දරුවන්ගේ පනුබෙහෙත් දුන් දින වැනි අත්‍යවශ්‍යයම දේවල් මගහැරී යන්න අමතක වෙන්න පුලුවන් දේවල් මෙහි ලියන්න . දින වෙන්කරවා ගත් appointment වැනි ඒවා පැහැදිලිවම පේන්න ඔබ ලියන පෑනෙන් ලොකු සලකුණක් දාන්න .ඔබට ඈතට වුනත් පේන පරිදි . මෙය ඔබට පහසුවෙන්ම ඇස ගැටෙන තැනක තියාගන්න පුලුවන් . එවිට වැඩකරන ගමන් ඔබට මේ දෙස බැලූවිට එහි ඉදිරි දිනවලදී තියෙන appointment පැහැදිලිවම පෙනෙන නිසා මගහැරී යාමට තියෙන ඉඩකඩ ඉතාමත් අඩුයි. ඒවගේම තමයි රාජකාරි සදහා යන ඔබට පුලුවන් මෙවැනි ගැලපෙන කැලැන්ඩරය ක් ඔබගේ ස්මාර්ට් පෝන් එකට ඩවුන්ලොඩ් කරගන්න .එවිට වැඩට යන ගමන් වාහනය තුලදී වුනත් මේ දේවල් බලන්න ඇතුළත් කරන්න පුලුවන් .එවැනි වැදගත් ඇපස් දෙකක් නම්
https://calendar.google.com/calendar/r?pli=1
සහ
http://www.cozi.com
වෙනවා . ඔබට ඉතාමත් ප්‍රයෝජනවත් වේවි.උත්සාහ කර බලන්න .
02. ඔබට කිරීමට ඇති වැදගත් දේ ඔබට පැහැදිලිවම පෙනෙන සේ ඔබගේ මුලුතැන්ගෙයි ස්ථානයක අලවා තබන්න ලියා තබන්න .
මගේ ජීවිතයේ මට ඕනෑ තරම් අවස්ථා තියෙනවා යාලුවන්ගේ උපන්දින, විවාහ උත්සව වැනි දේ සදහා මොනවා හරි තෑග්ගක් කලින් අරන් තියෙනවා කියලා හිතුවත් වැඩත් එක්ක ඒක සම්පූර්ණයෙන්ම අමතක වෙනවා .ඉතිං ඒ දවසේ යන්න ලෑස්ති වෙනකොට තමයි තෑගි මතක්වෙන්නේ .ඒක ලොකු මානසික පීඩනයක් .සාමාන්‍යයෙන් පාටියකට යන්න ලෑස්ති වෙලා තෑගි තෝරන්න යන එක අනිත් මිනිසුන්ගෙන් විහිලුවක් වන දෙයක් .අනිත් එක නිදහසේ සුදුසු දෙයක් තෝරාගන්න වේලාවක් නෑ. මේ නිසා ඔබට පුලුවන් මෙවැනි වැදගත් දේ ඔබගේ නිවසේ මුලුතැන්ගෙයි වගේ ඔබ නිතරම ගැවසෙන තැනක මේ පිලිබඳව කෙටි පණිවිඩයක් ලියා තබන්න .මම ඉහත කී කැලැන්ඩරය මත මෙවැනි දේ ලියන්න එපා .දුරකථනට රිමයින්ඩර් එකක් ලෙස දාලා තිබුනත් එය නවතා දැමූ පසු නැවතත් අමතක වෙනවා .ඒ නිසා පුලුවන් නම් පොඩි වයිට්බෝඩ් එකක් මුලුතැන්ගේ තැනක එල්ලා තබන්න .ඔබට පුලුවන් එහි තෑග්ගක් ගත යුතු බවට සටහනක් දාලා තියන්න . නැත්නම් ශීතකරණය දොරෙහි පිටතින් කඩදාසි කැබැල්ලක් රදවා තැබිය හැකි කුඩා කාන්දම් වලින් සැකසූ විවිධ කුඩා උපකරණ තියෙනවා .මෙම කාන්දම් වලින් සැකසූ ශීතකරණ එල්ලා තැබිය හැකි කුඩා කඩදාසි රදවන තියෙනවා .
එවැනි දෙයක් භාවිතා කර ඔබට පේන්න පොඩි සටහනක් දමා තියන්න. එවිට නිතරම ඔබට පෙනෙන බැවින් ඔබට කරන්න අවශ්‍ය අත්‍යවශ්‍යයම වැඩ කවදාවත් ම අමතක වෙන්නේ නෑ. ඒවගේම තමයි ඔබ හදීසියකට එලියට යනවානම් ඔබට පුලුවන් මහත්තයාට, දරුවන්ට මෙහි පණිවිඩයක් තබා යන්න .මෙය මගේ ගැටලු වලට හොදම විසදුම ක් වුනා.
03. සතියකට අවශ්‍ය ආහාර මෙනු සකසා ගන්න .
සති අන්තයේ දිනයක පැය භාගයක් පැයක් පමණ කාලයක් අරගෙන ඔබට පුලුවන් නම් පොඩි කඩදාසියක් අරගෙන ඔබගේ ඉදිරි සතියේ දිනවල අහාර වේල් සදහා සකස්කර ගන්න අහාර මොනවාද යන්න තීරණය කරන්න එය කාර්යබහුල ඔබට ඉතාමත් පහසුවක් වෙනවා.ඒ වගේම ඔබ රාජකාරි සදහා යන මවක් නම් , කුඩා දරුවන් ඉන්නා මවක් නම් මෙය ඉතාමත් වැදගත් වෙනවා. ඒ වගේම මේ තුලින් සතියකට අවශ්‍ය බඩු ගෙනවිත් ඒ සදහා සූදානම් වීමට හැකි අතර ඔබගේ කාලය වගේම මුදල් ද ඉතිරි වෙනවා. මොකද ඔබ මිලදී ගන්නේ සතියකට ඔබ කලින් සකසා ගත් ආහාර මෙනු සදහා අවශ්‍ය ආහාර බැවින් අනවශ්‍ය කිසිම දෙයක් මිලදී ගන්නේ නෑ. ඒවගේම එලවලු පලතුරු මස් මාලු වුනත් අවශ්‍ය ප්‍රමාණය ඔබ දන්නා බැවින් නරක් වී කුනු වී යාමට එලවලු ඇතුලු බඩු ඔබ මිලදී ගන්නේ නෑ. ඒ නිසා මේ තුළින් ලොකු මුදල් නාස්තියක් අඩුවෙනවා . මේ නිසා සතියකට අවශ්‍ය කෑම වේල් සදහා ඔබ පිලියෙල කරන කෑම බීම පොඩි වේලාවක් අරගෙන ලියන්න .එහිදී ඔබට ඔබගේ කෑම වේල් සදහා යොදා ගන්න පුලුවන් රසවත් ආහාර මෙනු රාශියක් අම්මලා සදහන් කර තිබෙන අතර ඒ රසවත් ආහාර මෙනු කියවා ඔබගේ පවුලේ අයගේ කැමැත්ත පරිදි එක එක ආහාර වේල සදහා සකස්කර ගන්නා දේ ඔබ කලින් තීරණය කරන්න .
එහිදී ආහාර මෙනු සකස් කිරීමේදී මම වැඩ පහසු කරගැනීම සදහා කරන පොඩි දේවල් ටිකක් කියන්නම්.
# මම බ්‍රහස්පතින්දා රෑට කඩල ,කව්පි,හෝ මුංඇට ටිකක් පෙගෙන්නට දානවා.සිකුරාදා උදේට තම්බලා ගන්න . ඒත් එක්කම හාල් ටිකක් පෙගෙන්නට දානවා මගේ විදිහට පහසුවෙන්ම හදාගන්න පුලුවන් ආප්ප ටිකක් සෙනසුරාදා උදේට කන්න .
# සිකුරාදා උදේට මම ඊයේ රෑ හදපු මාලු ඇඹුල් තියල් එක්ක ,බටු මෝජු,සම්බලය ක් හදලා බත් කනවා. මහත්තයා දවල්ට ඇටවර්ග කන්න කැමති නිසා මොනවාහරි ඇටවර්ගයක් තම්බලා සිහින්ව කපා ගත්මාලු හෝ ටූනා ටින් එකක් ( සැමන් වුනත් රසයි) තෙලට දමා බැදුණු පසු තම්බා ගත් ඇට හා පොල් ටිකක් දමා හොදින් තෙම්පරාදු කර ගන්නවා. මෙය මගේ මහත්තයා ගේ ඔෆීස් අරන් ගිහින් ගන්න ප්‍රියතම දවල් ආහාරයක් වෙනවා.
# හවසට මම රෑ කෑම හදන ගමන් පෙගෙන්නට දැමූ හාල් ටික බ්ලෙන්ඩර් එකට දමා වතුර ස්වල්පයක් සීනි තේ හැදි දෙකක් පමන දමා හොදින් පිටි වෙනකල්ම දෙපාරක් තුන්පාරක් කොටා ගන්නවා කැබලි නැතිව පිටි ගතිය පැමිණෙන තුරු. ඉන්පසු එය වෙනත් භාජනයකට දමා ඊස්ට් ස්වල්පයක් දමා වසා තබනවා.ලුණු දාන්නේ නෑ. පසුවදා උදයට ලුනු සහ පොල්කිරි ස්වල්පයක් දමා ටික වේලාවක් තබා ආප්ප හදාගන්නවා.ඉතාමත් රසයි .පහසුයි. ඕනෑම කෙනෙක්ට හදන්න පුලුවන් .
# සදුදා පුතාලා සමග සෙල්ලම් කරන අතර වට්ටක්කා හෝ බටු වැනි දෙයක් පෙති ආකාරයෙන් කපනවා. වට්ටක්කා නම් තුනපහ මිරිස් ලුනු තෙල් එකතු කරලා බේකින් ට්‍රේ එකක දාලා තියෙනවා .බටු නම් ලුනු කහ තෙල් දමා බේකින් ට්‍රේ එකක දාලා තියෙනවා . කලින් කපාගත් කුකුල් මස් එක අයිස් දියවෙන්න වතුරට දමා ඉන්පසුව තුනපහ ,කැබලි මිරිස් ,ලුණු ,දෙහි ඉස්ම තක්කාලි සෝස් දමා බේකින් ට්‍රේ එකක දමා තියෙනවා . හවසට අවන් එකේ දමා රෑ කෑමට ගන්නවා. බේක් වුනු බටුනම් තෙල් වලින් පොඩ්ඩක් ඉක්මනින්ම බැදලා අරගෙන බටු මෝජුවක් දාගන්නවා . පලා සම්බලයක් සමග රෑ කෑමට ගන්නවා. රෑ කෑම හදන වේලාව ඉතුරු වෙන නිසා බටු බදින ගමන් පපඩම් මිරිස් හාල්මැස්සන් ඇටවර්ග බැදලා අරගෙන කුඩා කැබලි වලට කඩා වීදුරු බෝතලයකට දමා තියෙනවා .සතියක් පමණ අවශ්‍ය වෙලාවට කෑමට ගන්න පුලුවන් .ලෙහෙසියි.
# චිකන් රෝස් කරන්න විට ටිකක් වැඩිපුර අරන් පසුවදා උදයට පොඩි කැබලි වලට කඩා කැරට් ලීක්ස් වැනි එලවලු මිශ්‍ර කරලා ෆ්‍රරයිඩ් රයිස් එකක් උදයට හදනවා මහත්තයා ට වැඩට අරන් යන්න .එය මට ගොඩක්ම පහසුවෙන්ම හදාගන්න පුලුවන් .
# සතිඅන්තවල ලූනු වලින් සීනි සම්බල් හදලා අරන් තියෙනවා . ඉන්පසු බටර් ද භාගයක් පමණ වෙන්කර එයට ගම්මිරිස්, අඹ කුඩු ස්වල්පයක් දමා හොදින් කවලම් කර නැවත ශීතකරණයට දමා තියෙනවා . උදය කිරි එක සමග මෙම බටර් මිශ්‍රණය ලූනු සීනි සම්බල් ටිකක් සමග පාන් ඉතාමත් රසවත් වෙනවා වගේම මට හරිම පහසුයි.
# මාලු ඇඹුල් තියල් හදලා තියෙනවා .
# මම කැම්පස් යන දවස්වල නතර වී සිටි ගෙදර වයසක ඇන්ටි එයාගේ මහත්තයා ට කියලා පොල් ගෙඩියක් පමණ ගාගෙන වතුර දමා බ්ලෙන්ඩර් කර ශීතකරණයට දමා දින තුන හතරක් කෑම වලට දානවා . එය කාලය ඉතිරි වෙන අරපිරිමැස්මෙන් පොල් භාවිතා කිරීමට ඉතාමත් හොද බව මා සමග පවසා ඇති අතර මෙහි අපි පිටිකල පොල් කිරි භාවිතා කරන හෙයින් එලෙස කිරීමට අවස්ථාවක් ලැබුනේ නෑ.ඔබ කර බලන්න .
# බබා සමග ඔබට කෑම හැදීමට අපහසු නම් ටික දවසක් කෑම සදහා පිටිකල පොල්කිරි ,ඩෙසිකේට් පොල් භාවිතා කරන්න .අපිට අලුත් පොල් නැති බැවින් අපි කෑම හැදීමට ගන්නේ එවැනි පොල් හා පිටි වන අතර රසෙහි ලොකු වෙනසක් නෑ. ඉතාමත් පහසු වෙනවා .
# මස් මාලු වැනි දේ අවශ්‍ය මෙනුවලට ගැලපෙන සේ සෝදා සකස්කර ෂිප්ලොක් බෑග් වලට දමා ශීතකරණයට දමන්න .ලොකු අයිස් මිදීමක් සිදුවන්නේ නෑ. පහසුවෙන්ම කෑම හදන්න ගන්න පුලුවන්
04. එක් දිනක් පමණක් අවශ්‍ය බඩු රැගෙන ඒම සදහා වෙන්කරන්න .එම ද්‍රව්‍ය සතියකට ගැලපෙන පරිදි වෙන්කර තබන්න .
දැන් ඔබ මෙලෙස සකස්කර ගත් මෙනු වලට අවශ්‍ය බඩු සති අන්ත දිනක ගොස් එකවර අරගෙන එන්න. ඉන්පසු ඒවා පහසුවෙන්ම ගත හැකි පරිදි අසුරා තබන්න මස් මාලු සෝදා මෙනු වලට ගැලපෙන සේ සකස්කර කර ෂිප්ලොක් බෑග් වලට දමා දවස සදහන් කර ශීතකරණයට දමන්න .එලවලු ද මෙනුවලට ගැලපෙන පරිදි සෝදා මෙනුවලට අවශ්‍ය එලවලු එකට අසුරා (ප්ලාස්ටික් පෙට්ටි වැනි දෙයක) පිලිවෙලකට ශීතකරණයට දමන්න .හැකිනම් අසුරී තබන පෙට්ටි වල හෝ බෑගයෙහි දවස සදහන් කරන්න .මෙවැනි දේ මුලින්ම හදාගන්න ඔබට කාලය ගත වුවද එවැනි දේ තුළින් ඔබගේ වැඩකටයුතු ඉතාමත් පහසු වන බව ඔබට මෙම ක්‍රමය අනුගමනය කරන විට වැටහේවි .
05. ගෙදර ට අත්‍යවශ්‍යයම ද්‍රව්‍ය හැම විටම අතිරේකව තබා ගන්න .
සාමාන්‍යයෙන් ගෙදර ට අවශ්‍ය වන දත්බෙහෙත්, දත් බුරුසු, සබන්, ෂැම්පු , බොඩිවොෂ්, සැමන් ටින් , ගිනිපෙට්ටි, ආදී එදිනෙදා ජීවිතයේ දී නිතරම අවශ්‍ය වන ද්‍රව්‍ය අමතර එකක් හෝ කිහිපයක් නිතරම ගෙදර තියාගන්න .අපේ ගෙදර මෙවැනි දේවල් අසුරා තබන වෙනමම ස්ථානයක් තියෙනවා . අපි හැමවිටම ගෙදර භාවිතයට ගන්න එක අවසන් වී එනවිට ගෙදර නැවතත් ගෙන ඒමට අවශ්‍ය බඩු පිලිබඳව ලියන ලැයිස්තුවේ එය සදහන් කරනවා. එවිට බඩු ගෙන එන දවසේ එම ද්‍රව්‍ය ගෙනවිත් අමතර බඩු අසුරා තබන ස්ථානයෙහි තබා එහි ඇති එක ප්‍රයෝජනයට ගන්නවා .මම ත් මහත්තයත් කොයිතරම් කාර්යබහුල වුනත් ගෙදර හදීසියේ බඩු ඉවරවෙලා කඩයට දුවන්න අවශ්‍ය වන්නේනෑ. මේ ක්‍රමය ට හුරුපුරුදු වීම කාර්යබහුල ඔබට ඉතාමත් පහසුවක් වෙනවා.
06 ගෙදර ශීතකරණයේ කොල රැදවිය හැකි කාන්දම් උපකරණයක් මගින් A4 කොලයක් රදවා නිවසේ අවසන් වී යන සියලුම ආහාර පාන ඇතුලු සියලු ද්‍රව්‍ය පිලිබඳ විස්තර ඒ මොහොතේදී ලියන්න. උදාහරණයක් ලෙස ඔබ රාත්‍රී ආහාර පිසීමට සූදානම් වන විට ගෙදර ලුනු අවසන් වී යනබව වැටහුනු විට ශීතකරණයේ එල්ලා ඇති කොලයෙහි එය සටහන් කරන්න . එවිට සති අන්තයෙහි බඩු ගෙන ඒමට යනවිට අලුතින් බඩු ලැයිස්තු සකස්කිරීම අනවශ්‍ය අතර එම කොලය ගලවාගෙන ගෙනයාමට හැකි අත මෙය ඉතාමත් සාර්ථක ක්‍රමයක් වේ. එවිට එක බඩුවක් හෝ මග නොහැරෙනු ඇත.
07, නිවසින් බැහැර වන හැම විටම කුඩා සටහන් පොතක් ඔබගේ බෑගයෙහි තබාගන්න .අත්‍යවශ්‍යයම කරුණු සටහන් කරගන්න .ගෙදර ඇවිත් කැලැන්ඩරයට දමන්න .
08 . මුලු නිවසම 5s සංකල්පයට අනුව හදාගන්න උත්සාහ ගන්න .එය කාර්යබහුල ඔබගේ වැඩකටයුතු ඉතාමත් පහසු කරවන්න උදව් කරනවා.
මේ මම මගේ වැඩ පහසු කරගන්න කරන දේවල් වලින් වැදගත් කියලා හිතුන වගේම අත්දැකීමෙන්ම මට මහත් පහසුවක් ගෙන ආ පොඩි පොඩි ක්‍රියාකාරකම් වෙනවා. කාර්යබහුල ඔබත් කරලා බලන්න .හරිම පහසුවෙන්ම කරන්න පුලුවන් වගේම සාර්ථක ප්‍රතිඵල තියෙනවා . මම ටිකෙන් ටික ලිපි වලින් ඉදිරිපත් කරන්නම් .ඒවගේම ඔයාලා කරන මීට වෙනස් දේවල් තියෙනවා නම් පහතින් ලියන්න. ඒ වගේම අනිත් අයත් එක්කත් මේ වගේ දේවල් බෙදා ගන්න අමතක කරන්න එපා. ඒක මට වගේම අනිත් කාන්තාවන්ට බොහොම ප්‍රයෝජනවත් වේවී..
