13/10/2022
විරාමයක ගමනක් | 43 ...✍🏻
__________________________
අත්ලාන්තික් දඩයම - THE HUNT FOR ATLANTIS | Andy McDermott
( පරිවර්තනය - මංජුල දිසානායක ) 📚
| '... තම අත්ලාන්තික් දඩයම තමාට මරණය කැඳවනු ඇත ' |
අතීතය පටන් පෘථිවි තලය මත ඇති වී, විවිධ බලපෑම් ඔස්සේ මැකී ගිය ශිෂ්ටාචාර පිළිබඳව අප දනිමු. තවද ඉන් එපිටින් අප තවමත් නොදන්නාවූත්, යම් කඩතුරාවකින් වැසී ගිය හෙයින් අපැහැදිව දිස්වන්නාවූත්, එහෙයින් තහවුරු කිරීමට නොහැකිවූත්, නමුත් කවුරුන් හෝ විසින් ලියා තැබූ බැවින්, ඉතිහාසයට එක් වූ ශිෂ්ටාචාරයන් පිළිබඳව වූ පුරාවෘත්තද පවතින බව අප දනිමු. එලෙසින් ඒවා රිසි සේ ලියා තැබූ හෙයින් යම් යම් දේ කඩතුරාවකින් වසා දමන්නට ඇති ඉඩකඩ බොහෝ බවද අප දනිමු. එහෙයින්ම ඒවා පිළිබඳව වූ සත්ය අසත්යතාවය තහවුරු කිරීමට නොහැකිව කලින් කලට අලුත් වන විවිධ වූ මතවාද නිර්මාණය කරමින්, සිද්ධාන්ත ගොඩනගමින්, ගවේෂණය කරමින්, එකී පුරාවෘත්ත සැබෑවක් වනතුරු අප බලාපොරොත්තුවෙන් සිටින්නෙමු. එලෙස ඉතිහාසයේ වඩාත් කල්පැවතුණු සහ විවාදාපන්න පුරාවෘත්ත අතරින් එකක් වනුයේ අත්ලාන්තික් හි අතුරුදහන් නගරය නැතහොත් 'Atlantis - අත්ලාන්තිසය ' පිළිබඳව වන පුරාවෘත්තයයි.
අත්ලාන්තිස පිළිබඳව කතිකාවක් මුලින්ම ඇති කරනුයේ ග්රීක දාර්ශනික ප්ලේටෝය. ඒ ප්ලේටෝ විසින්ම නිර්මාණය කල ' ටිමේයස් ' සහ ' ක්රිටියස් ' මගිනි. ප්ලේටෝ ඉදිරිපත් කල තමන්ගේ දර්ශනය තුළ නිරන්තරයෙන්ම මනුශ්ය ජීවිතය පිළිබඳව සත්යම ප්රකට වූ බැවින් සියවස් ගණනාවක් ගෙවී ගිය පසුත් ඔහුගේ නාමය අදටත් කතාබහට හසු කෙරේ. ඔහු මීට වසර දෙදහසට පමණ පෙර ඉදිරිපත් කල අත්ලාන්තිසය පිළිබඳව වූ කතාව හුදෙක් සැබෑවක් ද? නැතහොත් ප්රබන්ධයක් ද ?, මිත්යාවක් ද ? නැතහොත් එය සැබැවින්ම යථාර්ථයක් දැයි අදටත් ගැටලු සහගතය. සත්ය වශයෙන්ම එය අතුරුදහන් වූයේ කෙසේද ?, තහවුරු කල හැකි සාධක අදටත් හමුනොවන්නට හේතු කවරේද ? යන්න තවමත් පිළිතුරු නොමැති ගැටලුය. මෙලෙසින් නිශ්චිත සාධක හමුවේ තහවුරු වී නොමැති වුවද සියවස් ගණනාවක් මුළුල්ලේම මිනිසා විශ්වාස කරනුයේ මුහුදු පත්ලේ සැඟව ගිය සොඳුරු අත්ලාන්තිසය කෙදිනක හෝ ලෝකයා විසින් එළිඳරව් කෙරෙනු ඇති බවයි. කෙසේ නමුත් වර්තමානය වන විට බොහෝ ප්රබන්ධ ලේඛකයින් මෙම අත්ලාන්තිසය පිළිබඳව වන පුරාවෘත්තයෙන් සහ ඒ පිළිබඳව ව මතවාදයන්ගෙන් අභාසය ලත් නවකතා රාශියක් රචනා කර ඇති අතර තවමත් එවන් කෘති බිහි වෙමින් පවතී.
ශූර ලේඛකයකු වූ Andy McDermott ගේ ' The Hunt for Atlantis ', එක කෘති අතරට එක් වූ, අතුරුදහන් අත්ලාන්තිසය පිළිබඳව ලියැවුණු, අතිශය ක්රියාදාමයන්ගෙන් යුතු වූ නවකතාවකි.
නීනා වයිල්ඩ්, අත්ලාන්තිසය සොයා යාමේ බියකරු ගවේශණයෙන් මිය ගිය, පුරාවිද්යා ගවේශකයින් වන හෙන්රි වයිල්ඩ් සහ ඔහුගේ බිරිඳ ලෝරා ගෙ එකම දියණියයි. වයස අවුරුදු 28 ක් පමණ වූ ඇයද පුරාවිද්යාඥවරියක් වූ අතර අතුරුදහන් අත්ලාන්තිසය කොහේදැයි යන ප්රෙහෙලිකාව තමාට නිසැකවම විසඳිය හැකි බවට තමන් කෙරෙහි වූ ප්රබල ආත්ම විශ්වාසයකින් ඇය පෙළුනාය. ඇයට තම මවුපියන්ගේ මරණයට හේතු අවැසි වූවා සේම පුරාවෘත්තයක්ව පැවති අත්ලාන්තිසයට එලෙසින්ම මියැදීමට ඉඩ නොතැබීමේ අදිටනයක්ද ඇය සතු විය. නමුත් අත්ලාන්තිසයේ පිහිටුම හා එහි පැවැත්ම පිළිබඳව ඇය සතු වූ සියලුම සිද්ධාන්තයන් සහ ඇගේ න්යායන්, බාහිර ලෝකයා විසින් තදබල ලෙස ප්රතික්ෂේප කළේ, අත්ලන්තිසය සොයා ගැනීමට කිසිවෙකුගෙන් ඇයට සහයක් නොලැබෙන බවට පසක් කරමිනි. නමුත් 'වාසනාව' ඇය සමඟ විය. එය වඩ වඩාත් තහවුරු කරමින්, හුදෙකලා බිලියනපතියකු වන ' ක්රිස්ටියන් ෆ්රොස්ට් ' ගේ අනුග්රහය, සියවස් ගණනක අතීතයේ එතෙක් මෙතෙක් සිදු කෙරෙන ලොව වැදගත්ම ගවේෂණය වෙනුවෙන් ඇය වෙත ලැබෙනුයේ ඇයවද මහත් පුදුමයට පත් කරමිනි. ඇය, ඔහුගෙ එකම දියණිය වන ' කාරි ෆ්රොස්ට් ' සහ නීනාගෙ පෞද්ගලික ශරීරාක්ෂක ලෙස ෆ්රොස්ට් විසින් නියුක්ති කරනු ලබන හිටපු SAS ආරක්ෂකයකු වන ' එඩී චේස් ' සමඟින් එක්ව, අත්ලාන්තිසය සොයා ගැනීමට සියලුම ආකාරයේ බාධා හරහා යාමට ගමන් ඇරඹීය. මුළු කතාව පුරාවටම එඩීගෙ චරිතය George Walton Lucas විසින් නිර්මාණය කල, පසුව James Rollins ගේ කෘති වලින්ද පණ පෙවූ ' Indiana Jones - ඉන්ඩියානා ජෝන්ස් ' ව සිහිපත් කළේය
ලෝකයේ සැමගේම අපේක්ෂාව සැඟව ගිය පුරාවෘත්ත හෙළිදරව් වීමම නොවෙයි. සමහරෙක් එම පුරාවෘත්ත පිළිබඳව වූ සියලුම හෙළිදරව් කිරීම් විනාශ කරමින් එය කාලයේ වැලිතලාව ඔස්සේ එලෙසින්ම තැබීම අපේක්ෂා කරයි. ඒ අනුව යමින්, නීනා වයිල්ඩ් ඇතුළු ගවේෂණ කණ්ඩායම, අත්ලාන්තිසය සොයා යාමේ ගවේෂණයට හරස් කපමින්, එයට බාධා පමුණුවමින්, අත්ලාන්තිසය පිළිබඳව හෙළිදරව් වීම වැළැක්වීමට, ප්රබල සහ අබිරහස්මය සංවිධානයක් වන 'සෙලස්පෝරස් සහෝදරත්වය ' විසින් දැඩි ලෙස කටයුතු කිරීම අරඹන්නේය. අතීතයේ පටන් අත්ලාන්තිසය රහස හඹා ගිය සියල්ලන්ටම 'සහෝදරත්වය' විසින් අත්කර දෙනු ලැබුවේ මරණය පමණක්මය. එම අභියෝගයන්ට අභියෝගයක් වෙමින් මෑන්හැට්න් සිට බ්රසීල ඝන වනාන්තර දක්වාත්, ටිබෙටයේ කඳුකරයේ සිට අත්ලාන්තික් සාගරයේ පතුල දක්වාත් නීනා ඇතුළු පිරිස ගමනේ යෙදෙන්නේය. නමුත් මෙම ගමන පුරාවටම, තමා හඹා යන රහස හෙළිදරව් වීම මත, වත්මන් මිනිස් ශිෂ්ටාචාරයට සිදුවන්නට යන භයානක ඉරණම පිළිබඳව නීනා වයිල්ඩ් කිසි විටෙකත් දැන සිටියේ නැත.
' The Hunt for Atlantis ', Andy McDermott විසින් 2007 වසරේදී එළිදක්වන ලද කොටස් 17 කින් සමන්විත ' Nina Wild & Eddie Chase ' කතාමාලාවේ පළමු කොටසයි. වර්ශ 1974 එංගලන්තයේ දී උපත ලැබූ Andy McDermott, ත්රාසජනක කතා රචකයකු ලෙසින් සාහිත්ය ලොව ජනප්රියත්වයට පත් වූ ශූර ලේඛකයකි. ඔහු Staffordshire හි Keele විශ්වවිද්යාලයෙන් උපාධිය ලබා දැනට Bournemouth හි ජීවත් වන අතර එහිදී ඔහු පූර්ණ කාලීන ලේඛකයෙකු ලෙස කටයුතු කරමින් සිටියි. කතුවරයෙකු වීමට පෙර ඔහු Hotdog සඟරාව සහ DVD Review වැනි සඟරාවල මාධ්යවේදියෙකු සහ සංස්කාරකවරයෙකු විය. එමෙන්ම ඔහු කාටූන් ශිල්පියෙකු, ග්රැෆික් නිර්මාණකරුවෙකු සහ වීඩියෝ ගේම් විචාරකයකු ලෙසද කටයුතු කර ඇත.
' The Hunt for Atlantis ' අතිශය ක්රියාදාමයන්ගෙන් යුතු කෘතියකි. පාඨකයකු ලෙසින් මා මෙතෙක් කියවා ඇති පොත් අතුරින් පාඨකයාට හුස්මක් ගැනීමට හෝ නිදහසක් නොදී තුවක්කුවකින් නොනවත්වා නිකුත් වන වෙඩි උණ්ඩ මෙන්, එකපෙළට වූ ක්රියාදාමන් රැසක අත්දැකීමක් ලබා දුන් පළමු පොත නිරායාසයෙන්ම මෙය විය යුතුය. පොත කියවූ කාලය පුරාවටම අත්ලාන්තිසය සොයා යාමේ බිහිසුණු ගමනේ වූ අතිශය පීඩාකාරී බව, වෙහෙස බව, කරදරකාරී බව මා අත්වින්දේය. එම ගමන තුළ කිසිදු ආකාරයක සැහැල්ලුවක් නොවීය. මීළඟ තත්පරයෙන් දහයෙන් එකක වූ කාලයේදී පවා කුමක් සිදුවේදැයි මාරාන්තික රහසක් විය. මා පාඨකයකු ලෙසින් කතාවේ කුතුහලයට වඩා කුතුහලයත් සමඟ එය සන්සිඳවීමෙන් පසු ක්ෂණයේදී අත්වන මාරාන්තික ප්රතිඵලය අත්වින්දේය. එය තවත් වෙඩි තැබීමක්, පිහි ඇනුමක්, පිපිරවීමක් ආදී ඕනෑම දෙයක් විය හැකිව තිබිණි. ' The Hunt for Atlantis ' තුළින් අප ඇසුරු කරන්නන් සතුව පවතින දෙබිඩි චරිත කොයිතරම් නම් හොඳින් අප තේරුම් ගත යුතු දැයි පසක් කරවයි. විටෙක අපට සිටින විරුද්ධවාදීන් අපගේ සතුරන් යැයි පිළිගන්නට පෙළඹුණද එය එසේ නොවන බවත් අපට සිටින පක්ෂපාතීන් අපගේ මිතුරන් යැයි පිළිගන්නට පෙළඹුණද එයද එසේ නොවන බවත් කතාවේ වූ චරිත තුළින්ම කතුවරයා විසින් පාඨකයාට 'ටොකු අනිමින්' ම කියාදෙයි.
Andy McDermott, කතාව තුළින් තම චරිත පිළිබඳව ගැඹුරු විශ්ලේෂණයක් කරන්නේය. ඔහු, බලය පිළිබඳව වූ තණ්හාව හමුවේ අතිමහත් මානව සංහාරයක් වුවද සිදු කිරීමට මිනිසා පෙළඹෙන අයුරුත්, එම හැඟීම් සඟවා ගනිමින් තම අරමුණ වෙනුවෙන් අන්යන් යොදාගෙන, ඔවුන්ගේ ශ්රමය දරුණු ලෙස සූරාකන අයුරුත්, එතුලින් නොසිතූ ලෙස තමාගේද පැවැත්මට හානි කරගනිමින් තමා විසින්ම විනාශ වී යන අයුරුත් මනාවට පෙන්වාදෙයි. බාහිර ලෝකයේ එවන් මිනිසුන් හමුවේ නිනා වයිල්ඩ්, හුදෙක්ම ආධුනිකයකු වන්නේය. එම කරුණ හමුවේ ඇය තම ගවේෂණය අවසානයේදී වික්ෂිප්ත වනුයේ පාඨකයාද ඒ හා සමානව වික්ෂිප්ත වෙමිනි.
' The Hunt for Atlantis ' අතිශය වේගවත් නමුත් සිත්ගන්නා සුළුය. යට කී පරිදි ක්රියාදාමයන්ගේන් අනූන වූ මේ කතාව තුළින්, පාඨකයකු ලෙස ප්රහාරක අවි සහ ඒවායේ ක්රියාකාරිත්වය පිළිබඳවද බහුලව අධ්යනයක යෙදෙන්නට හැකි විය. එමෙන්ම ගවේෂණයේ යෙදීම සඳහාත්, ගවේෂණය නවතා දැමීම සඳහාත් ඔවුනොවුන් විසින් යොදාගන්නා තාක්ෂණයේ ඇති ප්රබලත්වය අතිමහත්ය. මේ සියල්ල සමඟින් කතාවේ සක්රීයතාවය කෙතරම් දැයි ඔබටම වැටහෙනු ඇත. නමුත් කතාවේ අවසන් ජවනිකාවේ, ගුවන් යානය සහ මෝටර් සයිකලය පාදක කරගනිමින් එඩී සහ නීනා එක්ව ගෙනයන ක්රියාදාමයේ යම්කිසි අතාත්වික, විය නොහැකි, කෘතිම ස්වභාවයක් පෙන්නුම් කරයි. කෙසේ නමුත් වෙනත්, ක්රියාදාමයන්ගෙන් සමන්විත ප්රබන්ධ ස්පර්ශ නොකල, කිසිවකු නොසිතන කෝණ ස්පර්ශ කිරීමට Andy McDermott පසුබට වී නැත. එබැවින් ජවයෙන් පිරි සිනමානාත්මක ස්වරූපය නිරායාසයෙන්ම මෙම කතාවට ආරෝපණය වී ඇති බවට ඔබටද හැඟී යනු ඇත.
ඵෙතිහාසික කරුණු, නිර්මාණ, පුරාවෘත ආදිය විශ්ලේෂණය කරමින් ඒවා මතින් කතා ගොඩනැගීමට හපන්කම් පෙන්වන Dan Brown, James Rollins, Paul Sussman ආදි ශූර ලේඛකයින්ගේ ලැයිස්තුවට මෙතැන් පටන් Andy McDermott ද ඇතුලත් වනුයේ අපේ ආදරණීය ලේඛක මංජුල දිසානායක - Manjula Dissanayake මහතා නිසාමය. 'Amazonia - ඇමසෝනියා' , 'Excavation - එක්ස්කැවේෂන්' යන පරිවර්තන තුළින් James Rollins නම් සාහිත්යධරයාව සිංහල පාඨකයාට හඳුන්වා දුන් ඔහුගේ මීළඟ තේරීම වී ඇත්තේ Andy McDermott ය. 'The Hunt for Atlantis' , 'අත්ලාන්තික් දඩයම' ලෙස පරිවර්තනය කරමින් ඔහු එම හඳුන්වා දීමට උර දී ඇත. මංජුල දිසානායක මහතා මෙම පරිවර්තන කාර්යයේදී කතාවේ පසුබිම පිළිබඳව හොඳ බාහිර අධ්යනයක යෙදී ඇති බවට පසක් වෙයි. සත්තකින්ම ඔහුගේ පෙර පරිවර්තන වලට වඩා 'අත්ලාන්තික් දඩයම' හි පරිවර්තන භාෂාවේ යම්කිසි සරලත්වයක් අත්නොදුටුවාම නොවෙයි. එය ද එක්ව සාමාන්ය ව්යවහාරයේදී භාවිතයට ගැනෙන වචනද සුදුසු පරිදි, පරිවර්තනයේදී එක් කිරීම, සුමට කියවීමකට කොයිතරම් නම් බලපා ඇත්දැයි පාඨක ඔබටත් පෙනී යනු ඇත.
මෙය, අත්ලාන්තිසය පිළිබඳව කෙරෙන වෙනස්ම ආකාරයක අර්ථ දැක්වීමක් ද වනු නිසැකය.
.............................................................................................................
✍🏻 | දුල්ශාන් සංජය වන්ද්රසිරි ꧂
𝑃𝑢𝑏𝑙𝑖𝑠𝒉𝑒𝑟 - Muses Publishing House - Pvt Ltd
𝑁𝑜 𝑜𝑓 𝑃𝑎𝑔𝑒𝑠 - 560 pgs
( 📷 credits - Dulshan )
