20/08/2026
කොවිඩ් වසංගතයේ අඳුර මකා පෑයූ රිදී ඉර - 7th new chapter - සත් වැනි නැවුම් පරිච්චේදයට .......................
මීට සය වසරකට පෙර එනම් පළමු කොවිඩ් වසංගත රැල්ල හේතුවෙන් මුළු රටම නිවෙස් වලට සීමා වී සිරවී සිටි දිනවල අප පවුලේ සාකච්ඡා වට කිහිපයකින් අනතුරුව අප වැනිම වූ සිංහල සහ ඉංග්‍රීසි පාඨකයන් නොඑසේ නම් පොත්ගුල්ලන් වෙනුවෙන් ප්‍රබන්ධ නොවන (NON-FICTION) අන්තර්ජාල පොත් අලෙවිසැලක් ඇරඹීමට තීරණය කළෙමු. ඉන් දින කිහිපයකට පසුව වෙබ් අඩවිය ගොඩනැගීමේ කටයුතු ඉදිරියට යද්දී අපගේ තවත් දැඩි ඇබ්බැහි කමක් වූ ගීත තැටි සහ සංයුක්ත තැටි ද අප වැනිම වූ ගීත ලෝලීන් නැතහොත් සිංදු පිස්සන් වෙනුවෙන් මේ වෙබ් අඩවියට ඇතුල් කිරීමට අප ගත් තීරණය එක්තරා ආකාරයක අභියෝගයක් විය. ඊට ප්‍රධානතම හේතුව වූයේ ඒ වන විට මෙරට ගීත ලෝලීන් ගෙන් බහුතරයක් අන්තර්ජාලය ඔස්සේ පමණක් ගීත ශ්‍රවණය කිරීමට පුරුදු වී සිටීම නිසා ගීත කැසට්, සංයුක්ත තැටි (CD) සහ LP තැටි වෙළඳපොල සම්පුර්ණයෙන් ම වියැකී අළෙවිය ද සැලකිය යුතු ලෙස පහත යාම නිසා බහුතරයක් නිෂ්පාදන සමාගම් වැසී ගොස් තිබීම සහ ක්‍රියාකාරී ව පැවති සමාගම් ද මන්දෝත්සාහී ව තිබීමයි.
එය එසේ වුවත් අපගත් තීරණය නිවැරදි බව අදින් හරියටම සය වසරකට පෙර එනම් 2020 අගෝස්තු මස 20 දින අප වෙබ් අඩවිය එළිදක්වා දින කිහිපයක් ගතවන විට අපට පසක් විය. ඒ ඇරඹි ගමනට එදා සිට අද දක්වා අප කෙරෙහි විශ්වාසය තබා අප වෙතින් ගීත ඇල්බම් සහ පොත් මිලදී ගනිමින් මල්පොකුරු, සුභ පැතුම් එක් කර අප දිරිමත් කල අපගේ ගනුදෙනුකාර රසික රසිකාවියන් සහ පාඨකයන් සැම දෙනා වෙනුවෙන් මෙන් ම ගල් මුගුරු විසි කර පරිභව කරමින් අපට පන්නරයක් ලබා දුන් අයටද අපගේ අවංක ආදර ස්තුතිය පිරිනමමු.
මේ ගමන ඇරඹීමට ඉමහත් පිටුවහලක් වෙමින් අපට අවශ්‍ය නෛතික උපදෙස් ලබාදීමට අමතරව SINGLANKA සමාගම සහ අප අතර සම්බන්ධීකරණය සිදු කල SINGLANKA සමාගම ද ඇතුලත් වූ TRANSLANKA සමූහ ව්‍යාපාරයේ හිටපු නීති නිලධාරිනී නීතීඥ සරෝජා දුල්ලෑව මැතිණියට අපගේ ගෞරව පූර්ව ස්තුතිය පුද කරමු. එමෙන් ම සිංහල සුභාවිත ගීතයට නිහඬව විසල් මෙහෙයක් සිදු කල SINGLANKA සමාගමේ නිර්මාතෘ සහ සභාපති ආනන්ද ගනේගොඩ මැතිතුමාටත්, කුලරත්න ආරියවංශ මැතිඳුන්ටත් තිරය පිටුපස සිටිමින් ඒ සමාගම වෙනුවෙන් අපට සුවිශේෂී සහයෝගයක් ලබා දුන් තාමරෂි ආරියවංශ මහත්මියටත් අපගේ ස්තුතිය නැවතත් මෙසේ පල කරමු.
එමෙන්ම අනෙකුත් මෙහි පුද්ගලිකව නම් සඳහන් නොකළ SOORIYA, THARANGA, KND, LALSIRI. VIMIRA, STANLEYS, TORANA, STARLANKA, NILWALA සහ RANSILU ඇතුළු සියලු නිෂ්පාදන සමාගම් වල අධිපතිවරුන්ට සහ කාර්ය මණ්ඩලයන්ට ද අපගේ ස්තුතිය පුද කිරීමට මෙය අවස්ථාවක් කර ගනිමු. මහාචාර්ය දයා රෝහණ අතුකෝරළ මහතාටත් අනෙකුත් සියලුම දෙස් විදෙස් ග්‍රන්ථ ප්‍රකාශන සහ ආනයන සමාගම් වලටත් ස්තුති කිරීමට මෙය අවස්ථාවක් කර ගන්නෙමු.
එමෙන් ම මේ වෙබ් අඩවිය නිර්මාණයට මග පෙන් වූ නිශාන් ද සිල්වා මහතාටත් (Nishan De Silva , Jump Sri Lanka) අපගේ විශේෂ ස්තුතිය පුද කරමු.
ගත වූ සය වසර තුල අපට නන් අයුරින් සහාය වූ මෙහි නම් සඳහන් නොකළ කුරියර් සේවා සමාගම් වලටත් අනෙකුත් සියලු දෙනාටත් newchater.lk ආයතනයේ ස්තූතිය පල කරමු. අවසාන වශයෙන් ගත වූ කාලය තුල අප වෙත ලබා දුන් සහයෝගය ඉදිරියත් එලෙසින්ම ලබා දෙන ලෙස ඔබ සැමගෙන් ස්තුති පූර්වකව ඉල්ලා සිටිමු.
