15/10/2026
حوت الليلة هو حوت شعبي .. حوت المطبخ الليبي .. الحوت الإقتصادي والرخيص والغني بالحديد ..
سردينة كوالي بوقة ......
أكيدة واحني راقدين في الضحا الساعة 10 الصبح تخطم هاديكا العكاري سردينااااا كواليييي بوقااااااا وتبعتني أمي باش ناخدلها حارة للمقلي .... بوي يوم الجمعة لما يخش للميناء أول حاجة يتلفتلها السردينة والكوالي والبوقا لأنهم رخاص ومفيدات جداً جداً.
لكن للسن هذه مانعرفش نفرق بينهم زي مانعرفش نفرق بين المعدنوس والكسبر والشبت .....
نخش للمطبخ نلقا أمي تنظف في الكوالي ندير روحي فالح ونقوللها شني سردينا الغدي اليوم ؟؟ علي اساس زابيطة ..
تتلفت وتركلي هاديكا الشبحة وتقولي هذا كوالي يا بو العريف ... 😲
طبعاً وجهي يتعوج وندير روحي ندف في الفريز لانه مش عالحيط بالزبط 😒
الفرق بينهم كالآتي : ...
1- السردين جسمها فضي لامع عالازرق ومذبب.... ظهرها أزرق غامق ضارب عالأخضر ،، وراسها وفمها صغار .
2- الكوالي جسمه مذبب فضي لامع عالأزرق ... وظهره مخطط بالأزرق شبيه بتخطيط الرزام .. وزعنفة ظهره كبيرة وراسه وفمه كبار وأعرض من راس السردين .
3- البوقا جسمها قريب عالبيضاوي من الطويل .. عيونها كبار وفمها صغير وشوكات تاجية ذهبية عالظهر ... ظهرها لونه ذهبي وفيها خطوط ذهبية رقيقة عالجنب شبيها بتخطيط الشلبة.
وهكي نكونوا نقدروا نميزوا بين ال 3 أصناف هذه ومعاش نتلخبطوا بينهم.
الأخطبوط الليبي 🐙
منقول من صفحة الاخطبوط الليبي للغوص ومعدات الصيد.
