08/09/2026
اليوم بغيت نهضر معاكم على موضوع شوية حساس، ولكن مهم بزاف فالتجارة:
الشراكة.
كاين بزاف ديال الناس كيدخلو فشي مشروع مع شي واحد غير حيث صاحبهم، ولا قريبهم، ولا كيعرفوه مزيان.
كيقولو:
"هدغ صاحبي، عمري ما نختلف معاه."
ولا:
"هاد ولد عمي، راه بحال خويا."
ولا:
"حنا بيناتنا الثقة، علاش غادي نديرو الوراق؟"
وهنايا خاصك توقف شوية.
حيت المعرفة والثقة حاجة زوينة، ولكن التجارة حاجة أخرى.
راه ممكن تكون كتحب شي واحد وتحترمو، ولكن فالتجارة يكون بيناتكم اختلاف.
واحد كيبغي يغامر، والآخر كيبغي يحتاط.
واحد كيبغي ياخد الربح، والآخر كيبغي يخليه فالمشروع.
واحد كيشوف السلعة زوينة، والآخر ما مقتانعش بيها.
وهنا إلى ما كانش كولشي واضح من الأول، كيبدا الصداع.
وأخطر حاجة هي داك الجملة ديال:
"من بعد نتفاهمو."
لا خويا.
لي خاصو يتفاهم عليه، خاصو يتفاهم عليه قبل ما تدخل الفلوس.
شكون غادي يدير شنو؟
شكون مسؤول على الشراء؟
شكون مسؤول على البيع؟
شكون كيشد الفلوس؟
كيفاش غادي يتحسب الربح؟
وإلى وقعات خسارة، شكون غادي يتحملها؟
وإلى شي واحد بغا يخرج من المشروع، كيفاش غادي يدير؟
هاد الأمور خاصها تكون واضحة.
ماشي حيث كتشك فالشريك ديالك.
ولكن حيث الوضوح كيحمي العلاقة.
كاينين بزاف ديال الشراكات لي بداو بجملة:
"حنا خووت."
وسالاو بـ:
"ما بقيتش باغي نشوف وجهك."
والمشكل ماشي ديما فالفلوس.
مرات المشكل كيكون غير حيث كل واحد كان فاهم الشراكة بطريقة مختلفة.
واحد حاسب راسو خدام أكثر.
واحد حاسب راسو حط فلوس أكثر.
واحد كيقول:
"أنا لي جبت الكليان."
والآخر كيقول:
"ولكن أنا لي كنخدم فالنهار كامل."
ومن هنا كيبدا الحساب ديال:
"أنا درت."
"لا، أنا درت أكثر."
لهذا من الأول، ما تخلي حتى حاجة ضبابية.
تكلمو بصراحة.
وكتبو كلشي.
حتى إلا كان الشريك خوك.
بل خصوصاً إلا كان خوك ولا صاحبك.
حيت إلا كانت الأمور واضحة، كتقل المشاكل.
والشراكة الناجحة ماشي معناها أنك تلقى شي واحد كيشبه ليك فكولشي.
بالعكس.
مرات أحسن شريك هو لي كيكمل النقص لي عندك.
إلى نتا مزيان فالبيع، يمكن هو يكون مزيان فالحساب.
إلى نتا كتعرف تشري، يمكن هو يعرف يسير.
المهم كل واحد يعرف الدور ديالو.
ولكن واحد الحاجة ضرورية:
ما تدخلش فالشراكة وانت غير كتعتمد على الهضرة.
الثقة مهمة.
ولكن التنظيم مهم حتى هو.
والورقة ما كتقتلش الثقة.
بالعكس، مرات الورقة هي لي كتحمي الثقة.
حيت ملي كولشي مكتوب، ما كيبقاش واحد يقول:
"أنا ما فهمتش هكا."
ولا:
"ما اتفقناش على هادشي."
كلشي كيرجع للاتفاق.
وحتى الربح، ما تخليوهش غامض.
من الأول عرفو:
واش الربح غادي يتقسم بالنص؟
ولا على حساب رأس المال؟
ولا على حساب الخدمة؟
كولشي خاصو يكون مفهوم.
وحاجة أخرى:
ما تدخلش الشراكة وانت محتاج غير الفلوس ديال الشخص الآخر.
حيت الفلوس بوحدها ما كتصنعش شراكة ناجحة.
خاص تكون طريقة العمل، والمسؤوليات، والقرارات واضحة.
الشراكة بحال الطوموبيل بجوج ديال سائقين.
إلى كل واحد شد كيدون وبغا يمشي فطريق ديالو ، غادي توقع كارتة 😂
خاص كل واحد يعرف شنو الدور ديالو، وفين غاديين، وكيفاش غادي يوصلو.
وفالأخير، الشراكة تقدر تكون سبب باش المشروع يكبر بسرعة.
وتقدر حتى تكون السبب لي يخسر المشروع والعلاقة.
والفرق ماشي غير فالشريك.
الفرق كاين فـ الوضوح من الأول.
ما تدخلش مع شي واحد فالتجارة غير حيث كتيق فيه… دخل حيث عارفين بجوج شنو غادي تديرو، وكيفاش غادي تديروه.
الله يبعد علينا المشاكل، ويوفق كل شريك مع شريكو، ويرزق الجميع المعقول والوضوح فالتجارة.
خوكم موسيو جملة 🤝
#التجارة
#الشراكة
