28/09/2025
Faly miarahaba antsika rehetra,
Ninia izao mihitsy vao miteny satria ny fo ranomafana sao hananan-tsiny ny teny solafaka raha miteny anaty fihetsehampo be loatra.
🛑Voalohany aloha maneho ny fiaraha-miory amin’ireo fianakaviana namoy havana, maneho ny firaisankina amin’ireo rava fananana noho ny hetraketraka sy fandrobana niniana andian’olona efa voairaka ho amin’izany natao, miombom-po tanteraka amin’izy ireo ary mankahery ny Malagasy rehetra.
Ny tahotra sy ny fialana tamin’izao « chaos » izao indrindra no namerimberenana teto hoe tsy vahaolana ny korontana, tsy ilaina ny korontana.
Efa fantatra hatrany am-piandohana fa izao no notadiavina matoa novoizina teto ny hoe Népal, Népal. Ny hanao ny firenena ho potika tahaka izao, « à feu et à sang » no nokendrena ary efa tetika voaomana ilay izy, niantsoantso ny tena hoe aza manaiky ho voatarika amin’izany, namerimberina hoe tsy ho zakantsika intsony ny korontana, fa indrisy moa nomena tsiny hoe ka « ianareo tsy mahita ny fahoriam-bahoaka » na dia miara-miaina izany delestazy sy olan’ny rano izany isan’andro tahaka ny rehetra aza ary efa nandray ny andraikitra tandrify foana tamin’ny fanairana sy ny « interpellation » tandrify ny asan’ny tena.
Kanefa efa hita indrindra fa ho mafy lavitra ny zavatra hisy raha omena vahana ny mpanakorontana efa nizara vola hanaovana izany efa andro maromaro talohan’iny Alakamisy iny.
Niezaka niteny, nampitandrina, nampilaza mialoha hoe aza manaiky miditra ao anatin’ny velam-pandriky politikan’ny sasany. Fa indrisy moa, ireny ny zava-nisy 😭😭😭
Miaraka mangirifiry sy mandatsa-dranomaso isika ankehitriny satria nandaitra ny tetikadin’ireo mpanakorontana nandravarava ny firenena😭😭😭
Mankahery antsika rehetra, mitolona am-bavaka mafy ho an’ny firenena koa.
Miantso ho an’ny FITONIANA fa efa hitantsika izao fa tena zava-doza no ateraky ny famporisihana fankahalana sy famotehana eto amin’ity firenentsika ity.
🛑🛑Faharoa, ho ahy manokana dia misaotra an’Andriamanitra lehibe, ny zavatra rehetra mitranga amin’ny fiainantsika olombelona dia misy planin’Andriamanitra avokoa, ary Izy efa nilaza hoe izaho mahalala ny hevitra iheverako anareo, izay hitondra fiadanana fa tsy loza.
Ny ao ambadiky ny sedra rehetra dia fahasoavana avokoa, koa izany indrindra no isaorana Azy.
🛑🛑🛑Fahatelo, eto koa aho dia misaotra antsika rehetra havana namana olom-pantatra eny na olo-tsy fantatra koa aza izay nankahery sy naneho firaisankina hatry ny Alakamisy ka hatramin’izao.
Nanontany koa hoe manahoana ianareo ao? Salama tsara izahay na izaho na ny ankizy sy ny olona akaiky rehetra ka dia mankasitraka indrindra.
🛑🛑🛑🛑Fahaefatra, io tranoko eo Ampasanimalo io dia efa tamin’ny 2010 no nahazoako azy, ary fanampiana avy tamin’Itplk Herizo Razafimahaleo izay azo lazaina hoe ray nitaiza ahy ara-politika, « mentor-ko » no nahazoako azy.
Mbola tany sy biriky kely no nitsangana teo amin’izany. Tena asan’ny tanako hatsemboako 100% no nananganako azy na ny anatiny na ny ivelany ary tamin’ny 2016 izy io vao vitako sy nanomboka azo nipetrahana. Tsy mbola tao anaty fitondram-panjakana akory aho tamin’izany.
Misaotra ireo rehetra nifanome tanana tamin’ny famonoana ny afo fa tena nasehonareo tamin’ny fihetsika ny hoe « voin-kava-mahatratra » ary isaorana an’Andriamanitra lehibe vetivety dia voafehy ny afo.
Tsy nisy volam-bahoaka nangalariko akory na ariary aza ka hoe nanamboarako an’io tranoko io ary eto koa aho manararaotra fa tsy manana ankoatra an’io, ialako tsiny amin’ny tompon’ny trano izay notonotononina teto amin’ny tambajotra fa hoe ahy, appartements atsy e, trano be gratte-ciel eroa e, tany be ery Imeritsiatosika e, Analamahitsy e, Ambohimalaza e, Malaza Golf e, Amoron’Akona e tsy tsy haiko aiza aby koa, Bordeaux e sns TSY MISY AHY IRENY NA IRAY AZA, asa mety hitantsika amin’izay ny fiantraikan’ny tsaho iniana aely noho ny fankahalana tsisy dikany?
Izaho tsy nangalatra na Ariary aza tamin’ny volam-panjakana, fa izay fananako rehetra dia azoko tamin’ny herimpoko sy ny herintsaiko daholo amin’ny fitahian’Andriamanitra.
Te hiteny fotsiny za hoe azo arenina tsara ny simba, tsy hitarai-tanamiempaka amin’izany izaho. Ny lavo mbola miarina dia tsy mba resy fa ny lavo tsy tafarina intsony no tena resy tanteraka. Izaho tsy milavo lefona fa mijoro foana amin’ny faharesen-dahatro.
🛑🛑🛑🛑🛑Efa nanaiky hanao politika, ny ahy io antso, vocation, tsy nataoko nampanankarena ahy hatrizay ka hatrizao, tsy nahazoako tombony manokana ihany koa fa izay zavatra rehetra azoko tamin’ny fiainako dia vokatry ny asako avokoa ary tena azoko tamin’ny fomba madio tanteraka avokoa, raha misy afaka manaporofo ny mifanohitra amin’izay dia iangaviako mihitsy mba porofoy ary iaraha-mahita.
Efa firifiry izay adversaires politika izay no hoe mitady dossiers momba ahy fa tsy mbola nahita mihitsy hatreto, ny ahy io efa safidim-piainana natao noho ny fitiavan-tanindrazana dia iantsorohana hatramin’ny farany.
Ianareo ve dia mihevitra fa tsy mba efa nandalo tao an-tsaiko hoe adaboko any ity politika ity, fa tsy hananako fiainana ohatran’ny olon-drehetra, miaritra anie ny fianakaviako, ny olon-tiako, ny namako ny olona akaiky ahy sy izay mpiara-dia amiko rehetra noho izay izaho manao politika izay e, maloto loatra ilay izy, vitsy ny olona tena « intègres » sy « droits » sy hoe manao amin’ny fo, mandeha amin’ny « conviction », be loatra ny « coups bas », efa imbetsaka aho no mba te hiala tao anatin’ity fanaovana politika ity fa tsy nety e, antso io, na idifianao tahaka ny inona aza, dia tsy afa-bela ianao fa dia tsy maintsy tafaverina ao ihany, efa izay no nanirahan’Andriamanitra anao, ka na odianao tsy henoina toy inona aza tsy maintsy miantefa aminao foana ny antso ary tsy maintsy mamaly izany ianao.
Izay ilay fitiavan-tanindrazana miboiboika ao anaty, nanao izay tandrifiko aho, niezaka foana ny ho integre, droite, niaina araka ny soatoavina sy ny fotokevitra nijoroako.
Niasa namono tena aho tamin’ireo andraikitra rehetra nosahaniko, tsy mbola nitady ny tombontsoa manokana ho ahy aho raha nanao politika, nanampy foana ireo izay nila fanampiana tamiko aho raha mbola azoko nataoko koa ka tratry ny heriko, fa izao moa ilay fanaovana politika mihitsy no hoe izay mahitsy ihany no darohana, izay manao ihany no enjehina, izay mandeha am marina ihany no tsy tiana dia tsy maninona akory fa efa izay ilay « revy » hoy ny tanora dia ekena e!
🛑🛑🛑🛑🛑🛑Mino koa aho fa hitan’Andriamanitra ny zavatra rehetra e, Izy no aoka no vavolombeloko fa tsy mitady sitraka na dera aman’olona aho, tsy mitady hotiavina aho, tsy te hi-prouver na inona na inona amin’iza na amin’iza koa fa mandry sy madio tsara ny conscience-ko.
Fa te hisaotra manokana an’ireo rehetra efa naneho fahavononana sahady hoe hanampy amin’ny fanarenana ny simba koa aho. Maro be ianareo ary tena namana tokoa, ka dia misaotra mankasitraka feno fa nasehonareo tokoa fa tsy manary ianareo.
❌❌❌❌❌❌❌Farany, ianareo tanora aza manaiky ataon’olona fitaovana politika, fa lasa nanampy tsy fidiny ny mpanao politika te hitady seza fotsiny, namporisihana ianareo, izy ireo misintona lakolosy eto amin’ny tambajotra eto fotsiny. Dia tonga tamin’ny tanjony izy ireo, lasa fitaovana nanampy azy tsy satry ianareo. Samia mandanjalanja sy mandinika fa samy olon-dehibe tompon’andraikitra.
Dia samia hotsarain’Andriamanitra amin’ny asany fa Andriamanitra tsy miangatra io Andriamanitra io, mamaly ny tsirairay araka ny asany avy Izy, mahita ny miafina rehetra, mahita ny ao an-tsaina sy ao am-po lalina ao.
✍️📸Lalatiana Henriette Rakotondrazafy, Loholona
