Илика

15/08/2026

🏝Нешто ново во нашата книжарница: Попладневен остров. Работилница за споделено читање. (22.8., 19 часот)

👓Среде скопската бетонска обездрвена жега здогледав остров. Место питомо и пристапно, со разговор и добра мисла во центарот, а наоколу љубопитни луѓе, желни и смели преку книжевни приказни да откријат што има од другата страна на градската шир.

📖Ве покануваме на попладневна работилница за споделено читање каде заедно ќе читаме едно избрано книжевно дело во опуштена, спокојна атмосфера. Во текот на 1 час ќе читаме и разговараме со намера да се дружиме, да размениме светогледишта, да размислиме и да се предомислиме.

Работилницата ќе ја води Магда Ориѓанска, преведувачка и библиотекарка. Не е потребно никакво предзнаење за учество во работилницата.

Работилницата ќе трае околу 1 час, а бројот на учесници е ограничен на 10. (first come, first served) Пријавете се со кратка порака на [email protected]

Котизација: 300 денари

Магда Ориѓанска е преведувачка, истражувачка по скандинавистика и библиотекарка која живее и работи во Упсала, Шведска. Во моментов е на магистерски студии по библиотекарство и информатички науки на Универзитетот во Упсала, а истовремено работи како асистентка во најстарата шведска библиотека „Каролина Редивива“.
Нејзиниот професионален и истражувачки интерес е насочен кон скандинавистиката и преведувањето скандинавска книжевност, како и начинот на кој библиотеките ги поврзуваат луѓето, знаењето и културното наследство во физичкиот и дигиталниот простор. Во фокусот на нејзините истражувања се и практиките на читање како активности што придонесуваат за продлабочена социјализација, градење заедници и создавање простори за дијалог, споделување и заедничко учење.

13/08/2026

🥁Повик до сите фанови на Мери Шели: Ви го претставуваме нашето најново издание „Мери“ од холандската авторка Ане Екут, возбудлив спој на готски роман и фикционална биографија.

📝 Во 1816 година, вулканска експлозија во Индонезија ќе го натера поетот Перси Биш Шели да се задржи во близина на Женева, кај својот пријател Џорџ Гордон Бајрон. Двајцата поети и нивните придружници го исполнуваат времето со пишување и читање поезија, сѐ додека некој не предложи да напишат страшни приказни. Со оваа книжевна задача ќе се зафати и Мери, љубовницата на Перси Шели, која ја оплакува смртта на својата мала ќерка. Потсетувајќи се на низа необични настани од својата младост, Мери полека почнува да смислува приказна за едно чудовиште што ќе ја промени историјата на светската книжевност.

🌼Преводот на романот е на Ацо Пероски, лектурата на Оливера Јовеска, а графичката обработка и дизајнот на Ема Велковска и Марија Смилевска.

Книгата е достапна во нашата кафе-книжарница, а наскоро и во други книжарници низ Скопје.

11/08/2026

📚Книжевен кружок за нашето најново издание: во понеделник, 17.8. во 19 часот ќе зборуваме за „Забранета тетратка“ од Алба де Сеспедес!

Повелете на книжевен разговор за прекрасниот роман „Забранета тетратка“ од Алба де Сеспедес. Оваа е прв превод на кубанско-италијанската авторка на македонски јазик - искрено сме воодушевени од убавите пораки од првите читатели кои споделија со нас колку се воодушевени од приказната на главниот лик, Валерија, и нејзините дневнички записи. Придружете ни се во понеделник во 19 часот и споделете ги со групата и вашите впечатоци.

💌Ќе ви бидеме благодарни ако го најавите присуството со испраќање на кратка порака, тука или по мејл.

Се гледаме!

06/08/2026

Во понеделник, на 10 август, повторно ќе се дружиме во дворчето на нашата кафе-книжарница и ќе измислуваме приказни заедно со Ана.

Може ли да измислиме приказна само со неколку зборови? Како да ја разбудиме креативноста кога немаме инспирација? Како да ги видиме нештата од поинаков агол? Во јуни и јули си поминавме супер, па едвај чекаме да видиме какви приказни ќе измислиме и овој месец!

Работилницата трае два часа, од 19 до 21 часот. Не е потребно никакво предзнаење, само желба да се учествува. Пријавете се со кратка порака на [email protected]

Котизација: 300 денари

04/08/2026

Програмата за август пристигна!🥳

📝На 10.8. повторно ќе се дружиме со Ана Тодоровска и ќе ја вежбаме нашата вештина да раскажуваме приказни.

📚 Книгата за којашто ќе зборуваме овој месец е нашето најново издание, романот „Забранета тетратка“ од Алба де Сеспедес. Кружокот ќе се одржи на 17.8.

🌱 Наташа Атанасова од Blen.mk овој месец ќе модерира одлична дискусија за нефикциски книги на тема екологија. Заокружете го 21 за овој важен настан! 💚

🏝 Да читаме заедно? Зошто да не! На 22.8. Магда Ориѓанска ќе нѐ води низ работилницата за споделено читање.

⚒️ Уредувачката работилница месецов ја преместуваме во пладневен термин - одлична можност за сите ноќни птици што не успеваа да дојдат на саботната утринска средба.

🚃 Илика оди за Гевгелија на крајот на август! Со Стефан Алијевиќ ќе бидеме на BOSH Festival и ќе ја претставиме неговата најнова збирка раскази, „Наназад“.

💌Пријавете се за учество во работилниците и кружокот на следниов мејл: [email protected]

Се гледаме наскоро во Илика!

31/07/2026

🌞 Во Скопје станува жешко, а многумина веќе заминаа на годишен одмор на море или на планина. Решивме и ние да направиме кратка пауза за одмор.🌊🌊🌊

📚 Книжарницата ќе работи уште денес, а потоа ќе биде затворена од 1 до 9 август. Се гледаме вечерва или по одморите во август!🫶🏻

П.С. Ќе се сетите ли од која сликовница е илустрацијата на дизајнот? 🦒

29/07/2026

Полека се ситни и месец јули кој ни беше исполнет со многу моменти на радост. Ајде, да се потсетиме на некои од нив! 🥰

📝Помина уште една одлична креативна работилница со Ана Тодоровска која овојпат го разбуди вампирот во нас (кој беше - знае).🦇

📚 Од печат излезе „Забранета тетратка“ од Алба де Сеспедес, а многумина веќе ни споделија дека се воодушевени од романот. Наскоро закажуваме и термин за кружок! 🤓

💐 Трипати добивме подарок цвеќе - без никаков повод! А особено нѐ израдува овој мајсторски направен венец од лаванда.

🗓Работиме до петок, а потоа повторно заминуваме на кратка пауза. Посетете нѐ дотогаш и искористете го сезонскиот попуст. Наскоро ќе ја објавиме и програмата за август (ќе биде супер!).

24/07/2026

🥳 Почнува нашата летна акција: 20% попуст на изданија од повеќе издавачки куќи!

📚 Од петок до петок (24.7. до 31.7.) посетете на нашата кафе-кножарница и набавете си изданија на Илика, Бегемот, Сказнувалка, Сигмапрес и Слово по намалена цена (20% попуст). Возбудливи романи, колоритни сликовници, теориски расправи - меѓу изданијата од сите пет издавачи ќе најдете по нешто за сечиј вкус, а тука сме и ние да ви помогнеме при изборот.😉

☕️ Со купени пет книги следува гратис кафе или книга.

Се гледаме во Илика!

21/07/2026

Преведувачката на романот „Забранета тетратка“ од исклучителната кубанско-италијанска писателка Алба де Сеспедес напиша одличен поговор кој од денес е достапен и онлајн. Благодарност до Медуза за објавата и на преведувачката Ирина Талевска која во поговорот на читателите/ките им го приближува овој прекрасен роман, прв превод од авторката Алба де Сеспедес на македонски јазик.

Предговор кон романот „Забранета тетратка“ на Алба де Сеспедес

17/07/2026

❤️Нашето најново издание е романот „Забранета тетратка“ од италијанската писателка Алба де Сеспедес - од денес достапно во нашата кафе-кножарница!

📚Романот првично е објавен во 1952 година и е напишан во форма на дневник пишуван од Валерија Косати, жена што припаѓа во средната класа и води вообичаен семеен живот исполнет со секојдневни одговорности. Пресвртот во нејзиниот класно и родово определен животен стил се случува токму со купувањето на тетратката – бидејќи, штом ќе почне да пишува, Валерија сфаќа колку е несреќна. Низ записите на Валерија авторката успева да го отслика комплексниот внатрешен живот на својот главен лик, да ја поттикне нејзината потреба да ја согледува (и кажува) вистината, да ја доведе до точка во која таа целосно го преиспитува својот живот и сè што мисли дека е однапред зададено во него – грижата, љубовта, удобноста, сигурноста. На овој начин, пред читателот полека се разложува процес на градење на женската субјективност и се открива создавањето на еден личен, интимен простор во кој слободно може да се открива сопствениот глас.

📖„Забранета тетратка“ е втората книгата во нашата едиција „Класици“. Преводот од италијански јазик е на Ирина Талевска, а лектурата на Софија Чолаковска-Поповска, додека за графичкото обликување на книгата се погрижија Ема Велковска и Марија Смилевска.