30/09/2025
🍀ဘဝရဲ့စာမေးပွဲများ🍀
ကျွန်မက လောကဓံတစ်ခုခုနဲ့ ကြုံတွေ့ရတိုင်း စာမေးပွဲတစ်ခါဖြေရတယ်လို့ သဘောထားတတ်ပါတယ်။ ကိုယ်မျှော်လင့်မထားတဲ့ ပျော်
ရွှင်စရာကောင်းတဲ့ လောကဓံပဲဖြစ်စေ.. အဆင်မပြေစရာ အဆိုးလောကဓံပဲဖြစ်စေ.. ကြုံလာတာနဲ့ ဒီလောကဓံကို ကိုယ်ဘယ်လိုစိတ်နေသဘောထားနဲ့ တုံ့ပြန်သလဲဆိုတာကို အမြဲပြန်ဆန်းစစ်ပါတယ်..။ ပျော်ရွှင်တက်ကြွစရာလောကဓံနဲ့ကြုံရတဲ့အခါ… စိတ်ထဲမှာ လိုချင်မက်မောတဲ့လောဘလေးတွေ ငါဆိုတဲ့မာနလေးတွေဖြစ်လာရင်.. အဆိုးလောကဓံနဲ့ကြုံရတဲ့အခါ စိတ်ပူပန်သောကတွေဖြစ်လာရင် စာမေးပွဲကျတယ်လို့ ခံယူပါတယ်..။
ကိုယ်ထင်မထားလောက်အောင် အဆင်ပြေကံကောင်းတာတွေနဲ့ကြုံရလည်း..ဒါလည်းလောကဓံပဲ.. ခဏလေးပဲ အဆင်ပြေကောင်းမွန်နေတာလေးကို အကြာကြီးမြဲမြံနေလိမ့်မယ်လို့ ခံစားမနေနဲ့နော်.. ခဏလေးပဲ.. ဒါလည်းပြီးသွားမှာပဲ လို့ သတိလေးနဲ့ ဆင်ခြင်နိုင်ရင် စာမေးပွဲအောင်ပါတယ်..။
စိတ်ပင်ပန်းစရာ ပူပန်သောကရောက်စရာ အဖြစ်အပျက်လေးတွေနဲ့ ရင်ဆိုင်ရတဲ့အခါ.. ဒါ အဆိုးလောကဓံပဲ… ဖြစ်စရာရှိလို့ဖြစ်တာ.. သူလည်းမမြဲဘူး ..ခဏလေးပဲ… ပြီးသွားမှာပဲလို့ သတိလေးနဲ့ ဆင်ခြင်ပြီး သောကမများအောင် စိတ်နှလုံးအေးဆေးတည်ငြိမ်စွာနဲ့ ကိုယ်လုပ်စရာရှိတာလေးတွေကို တည်တည်ငြိမ်ငြိမ်လုပ်နေနိုင်တယ်ဆိုရင် စာမေးပွဲအောင်ပါတယ်..။
ဘဝမှာ ဖြေဆိုရသမျှ စာမေးပွဲတွေထဲမှာ အခက်ခဲဆုံးနဲ့ အရေးအကြီးဆုံးနောက်ဆုံးစာမေးပွဲကတော့ သေခြင်းတရားကို ရင်ဆိုင်ရမယ့်စာမေးပွဲဖြစ်ပါတယ်..။ သေခြင်းတရားကို ကြောက်ရွံ့တုန်လှုပ်စွာနဲ့ ဘာမှပြင်ဆင်ထားခြင်းမရှိဘဲ တုန်လှုပ်ချောက်ချားစွာနဲ့ ရင်ဆိုင်ရမယ်ဆိုရင် စာမေးပွဲကျပါလိမ့်မယ်..။
နေ့စဉ်နဲ့အမျှ ဒါန.. သီလ ..ဘာဝနာ.. ဝိပဿနာတရားတွေကို လေ့ကျင့်ပြင်ဆင်ရင်း… သေခြင်းတရားကို ကြောက်ရွံ့ခြင်းမရှိဘဲ တည်ငြိမ်အေးချမ်းစွာနဲ့ ပြုံးပြုံးလေးရင်ဆိုင်နိုင်မယ်ဆိုရင် စာမေးပွဲကို ဂုဏ်ထူးနဲ့အောင်မြင်ပါလိမ့်မယ်…။ ဆရာကြီးဦးဂိုအင်ကာရဲ့ Discourse တွေထဲမှာ.. သေခြင်းတရားဟာ တရားရှိသူတွေအတွက်ဆိုရင် ပရိုမိုးရှင်းဖြစ်တာ.. ဘာကြောက်စရာရှိသလဲ.. ပြုံးပြုံးလေးနဲ့ ရင်ဆိုင်လိုက်ရုံပဲလို့ဆိုပါတယ်..။
ဘဝရဲ့နောက်ဆုံးစာမေးပွဲကို အေးအေးဆေးဆေး ရင်ဆိုင်ဖြေဆိုနိုင်ဖို့အတွက်ဆို ကျွန်မတို့ ရှင်သန်နေစဉ်ကာလတွေမှာ..နေ့စဉ်ပုံမှန်လေ့ကျင့်ပြင်ဆင်ထားဖို့ အရေးကြီးပါတယ်။ စာမေးပွဲဖြေရသလိုပဲ နေ့တိုင်းစာပုံမှန်ကျက်ထားသူနဲ့ စာမေးပွဲနီးမှ ဘာမှပြင်ဆင်မထားသူနဲ့ စာမေးပွဲဖြေကြပုံချင်းမတူညီနိုင်ပါဘူး…။
နေ့စဉ်..ကိုယ့်ခန္ဓာရဲ့ မမြဲတဲ့သဘောတရားတွေ.. ဆင်းရဲခြင်းဒုက္ခတွေ.. ငါဆိုတာမရှိ.. အစိုးမရ.. ကိုယ့်အလိုအတိုင်းမဖြစ်တဲ့ သဘောတရားတွေကို အလွတ်ပိုင်နိုင်ကျွမ်းကျင်နေအောင် ပြင်ဆင်ထားနိုင်ရင်.. သေခြင်းတရားစာမေးပွဲကို သဘာဝတရားတစ်ခုလို အေးအေးဆေးဆေးတည်တည်ငြိမ်ငြိမ် ရင်ဆိုင်ဖြေဆိုနိုင်ပါလိမ့်မယ်..။ နောက်ဆုံးစာမေးပွဲအောင်မြင်ပါလိမ့်မယ်..။
အသေတတ်ဖို့အတွက်ဆိုရင် အနေတတ်ဖို့လည်း လိုပါသေးတယ်..။ အနေတတ်ဖို့ဆိုရင် နေ့စဉ် မမေ့မလျော့ သတိတရားလေးနဲ့ မမြဲတဲ့သဘောတရားလေးတွေကို နှလုံးသွင်းဆင်ခြင်ပြီး ရင်ဆိုင်ရသမျှ ကောင်းတဲ့အတွေ့အကြုံတွေအပေါ်… လိုချင်တောင့်တမှုလောဘတွေ..မကောင်းတဲ့ အတွေ့အကြုံတွေအပေါ် မလိုချင်မုန်းတီးမှုတွေနဲ့ တုံ့ပြန်မှုတွေမလုပ်ဘဲ ဥပေက္ခာကျကျလေးနေတတ်အောင် လေ့ကျင့်ပြင်ဆင်နေခြင်းဟာ အနေတတ်ခြင်းလည်းဖြစ်ပါတယ်..။ အနေတတ်ခြင်းဟာ အသေတတ်အောင် လေ့ကျင့်ပြင်ဆင်နေခြင်းလည်းဖြစ်ပါတယ်…။
ဘဝရဲ့နောက်ဆုံးစာမေးပွဲကို အောင်မြင်စွာဖြေဆိုနိုင်ကြပါစေ…။
#လွန်းထားထား
#ဘဝရဲ့စာမေးပွဲများ
