03/02/2026
ဆိုက်ဘေးရီးယားရဲ့ -71.2°C က ဘယ်လိုရာသီဥတုမျိုးလဲ.. လူတွေ ဘယ်လို ရှင်သန်နေထိုင်ကြလဲ...
ဆိုက်ဘေးရီးယား အရှေ့မြောက်ဒေသမှာနေတဲ့ လူတစ်စုဟာ လူအများ မတွေးတတ်တဲ့ အစွန်းရောက်အခြေအနေတစ်ခုမှာ ရှင်သန်နေထိုင်နေကြပါတယ်။ အဲဒီနေရာကတော့ "ကမ္ဘာပေါ်မှာ အအေးဆုံးနေရာ" လို့ လူသိများပြီး အနိမ့်ဆုံး အပူချိန်ဟာ သုညအောက် ၇၁.၂ ဒီဂရီစင်တီဂရိတ်ရှိတဲ့ အွိုင်မယာကွန် (Oymyakon) ဒေသဖြစ်ပါတယ်။
အဲဒီဒေသမှာ ရှင်သန်နေထိုင်ဖို့က ပင်ကိုဗီဇနဲ့ မဆိုင်တော့ဘဲ မျိုးဆက်အလိုက် လက်ဆင့်ကမ်းဖို့လိုအပ်တဲ့ ခိုင်မာတဲ့ အသိပညာတစ်ခုဖြစ်ပါတယ်။
❄️ ဇီဝကမ္မဆိုင်ရာ လိုအပ်ချက်- အသက်အန္တရာယ် စိန်ခေါ်မှုတစ်ခု
ဒေသခံအမျိုးသမီးတွေအတွက် သာမန်ဇီဝကမ္မအလုပ် အများစုက အအေးဒဏ်ကို တွန်းလှန်ဖို့ဖြစ်တယ်။
အဲဒီဒေသရဲ့ အိမ်သာအများစုက အိမ်ပြင်ပမှာ ဆောက်ထားတဲ့ သစ်သားအိမ်သာဖြစ်တာကြောင့် ညအပေါ့သွားနှုန်း နည်းအောင် အမျိုးသမီးတွေဟာ တစ်နေ့ကို ရေ ၈၀၀ မီလီလီတာထက် ပိုမသောက်တဲ့ ရှင်သန်မှုစည်းမျဉ်းကို တီထွင်ခဲ့ကြပါတယ်။
ဓမ္မတာသုံး ပစ္စည်းတွေက အနိမ့်ဆုံးအပူချိန်အောက်မှာ "ကြွပ်ဆတ်" သွားပါတယ်။ အသုံးပြုပြီးသား ပစ္စည်းကို ချက်ချင်း မစွန့်ပစ်ရင် ချက်ချင်း ကျောက်ခဲ ဖြစ်သွားပါတယ်။ ဒါကြောင့် အမျိုးသမီးအများစုက ကိုယ်တိုင်ထွင်တဲ့
အပူပေး pad တွေကို အသုံးပြုကြပါတယ်။
🏠
အဲဒီဒေသက ဘာလို့ သိပ်အေးနေလဲဆိုရင် အွိုင်မယာကွန်ရဲ့ ဘေးပတ်လည်ဟာ တောင်တွေနဲ့ ဝန်းရံထားပြီး မြေမျက်နှာသွင်ပြင်က ရေခဲပန်းကန်လုံးကြီးနဲ့ တူပြီး အာတိတ်သမုဒ္ဒရာရဲ့ တောင်ဘက်စီးဆင်းတဲ့ လေအေးထုကို ခွက်ထဲ ထည့်ထားသလို ဖြစ်နေတာကြောင့် ဖြစ်ပါတယ်။
မြေပြင်ရဲ့ အေးခဲမြေက မီတာ ၁၀၀ အောက် နက်တာမို့ အိမ်ကို မြေပေါ် တိုက်ရိုက်ဆောက်လို့ မရပါဘူး။ ဒေသခံတွေက သစ်သားတွေကို မြေကြီးထဲမြှုပ်ပြီး မြေပြင်နဲ့အိမ် တစ်မီတာလောက်ခြားတဲ့ "ခြေမြင့်အိမ်" တွေ ဆောက်လုပ်ကြပါတယ်။
ဒါဟာ အိမ်တွင်း အပူချိန်ကို ထိန်းပေးသလို အေးခဲမြေ ပြိုကျတာကိုလည်း ကာကွယ်ပေးပါတယ်။
ဒီဒေသမှာ ခေါင်းလျှော်တာဟာလည်း အလုပ်တစ်ခုပါ။ မီးဖိုဘေး အမြန်လျှော်ပြီး ရေနွေးငွေ့နဲ့ အမြန် အခြောက်ခံရပါတယ်။ ၂ မိနစ်လောက် နောက်ကျတာနဲ့ ဆံပင်က မာခဲသွားနိုင်ပါတယ်။
🏥 ဆေးရုံသုံး ကိရိယာတွေကိုလည်း ဆီလီကွန်အစွပ် စွပ်ထားရပါတယ်။ အေးခဲပြီး လူနာအသားမှာ ကပ်မနေအောင်ပါ။
ကလေးမွေးပြီး ပထမသုံးရက်က အသက်အန္တရာယ်စိုးရိမ်ရတဲ့ ရက်တွေဖြစ်ပါတယ်။ အသန်မာဆုံးကလေးလောက်ပဲ အသက်ရှင်နိုင်ပါတယ်။ မိခင်အများစုက မမွေးခင် နှစ်လအလိုထဲက ကလေးမီးဖွားဖို့ မြို့တက်ကြပါတယ်။
🦌 အအေးဒဏ်ခံနိုင်အောင် ဒေသခံတွေဟာ သမင် ဆီးအိတ်နဲ့ ရေနွေးအိတ် လုပ်ပြီး ပင်လယ်ဖျံသားရေနဲ့ လက်အိတ်ချုပ်ပါတယ်။
ကယ်လိုရီမြင့်အောင် မြင်းသားနဲ့ သမင်သားကို အစိမ်းစားကြပါတယ်။ ငါးကို အအေးရိုက်ပြီး အစိမ်းလိုက် လှီးစားကြပါတယ်။
🌊 ကမ္ဘာကြီး ပူနွေးလာတာနဲ့အမျှ အေးခဲမြေတွေ အရည်ပျော်လာတာကြောင့် အဲဒီဒေသက အိမ်တွေ စယိုင်လာပါပြီ။ ခရီးသွားတွေက အဲဒီဒေသမှာ "မျက်တောင်မွေးရေခဲ" ပုံတွေ လာရိုက်ကူးကြချိန် ဒေသခံတွေက အဲဒီဒေသကို စွန့်ခွာဖို့ ကြိုးစားနေကြပါပြီ။
ဘဝနေထိုင်မှု ခက်ခဲကြမ်းတမ်းလည်း အွိုင်မယာကွန်က နာမည်ကြီး သက်ရှည်ဒေသတစ်ခုဖြစ်ပါတယ်။ အေးလွန်းလို့ အချိန်တွေတောင် နှေးသွားပုံရလို့ ဖြစ်ပါလိမ့်မယ်။
***
လူတွေဟာ ဘယ်လို ပတ်ဝန်းကျင်မှာဖြစ်ဖြစ်၊ ဘယ်လို အခက်အခဲမျိုးမဆို ရှင်သန် ကျော်လွှားနိုင်စွမ်းရှိတဲ့ အတွေးအခေါ်၊ အရည်အချင်း၊ ဉာဏ်ရည်ဉာဏ်သွေးတွေ ပိုင်ဆိုင်ထားကြပါတယ်။ ပတ်ဝန်းကျင်အလိုက် ရှင်သန်နည်းတွေ ရှိကြပါတယ်။
ခက်ခဲကြမ်းတမ်းတဲ့ အခြေအနေမျိုးမှာ ငါသေမှာပဲလို့ တွေးမယ့်အစား ငါ ဘယ်လို ရှင်မလဲလို့ တွေးခေါ်နိုင်တဲ့ ပင်ကိုဗီဇတွေ ရှိကြပါတယ်။
ဗဟုသုတအလို့ငှာ ဖတ်မိတာကို ဘာသာပြန်မျှဝေပါတယ်။
#နိုင်းနိုင်းစနေ
💌
#နိုင်းနိုင်းစနေ
