05/11/2025
🙏🙏မြင့်မြတ်စာဂီ ပါရမီ🙏🙏
ဘုရားလောင်းများ ဗျာဒိတ်မရသေးမီ ပါရမီဖြည့်ရသော ကာလနှင့်ဘုရားလောင်းများ မဖြစ်ထိုက်သော ဌာနများ
#ဘုရားလောင်းတို့၌ပြည့်စုံသော ဗုဒ္ဓဘူမိ လေးပါး
#ဘုရားလောင်းတို့၌ ပြည်စုံသော အဇ္ဈာသယ ၆-ပါး
“ကြီးသော လုံ့လရှိတော်မူသော မြတ်စွာဘုရား၊ ဗျာဒိတ်မရသေးမီ ဘုရားဆု တောင်းခြင်းအကြောင်းကို ဗုဒ္ဓအပဒါန် ပါဠိတော်၌ ဟောတော်မူသောကြောင့်ထင်ရှား သိရပါပြီ။ ထို့အတူ ဗျာဒိတ်ရပြီးမှ ဘုရားဆုကိုတောင်းခြင်းသည်လည်း ဗုဒ္ဓဝံသ ပါဠိတော်၌ ဟောတော်မူသောကြောင့် ထင်ရှားပါပြီ။ ဗျာဒိတ်ရပြီး ဘုရားလောင်း တို့သည် ဘုရားအဖြစ်သို့ ရောက်အောင် ဖြည့်ကျင့်ရသော ကမ္ဘာကာလသည်လည်း အနည်းဆုံး လေးအသင်္ချေနှင့် ကမ္ဘာတစ်သိန်းရှိကြောင်းကို ဗုဒ္ဓဝံသပါဠိတော်၌ ဟောတော်မူသောကြောင့် ထင်ရှားပါပြီ။ ယခုတဖန် ဗျာဒိတ်မရသေးမီ ပတ္ထနာ ပြုသော ဘုရားလောင်းတို့သည် အဘိနီဟာရဗျာဒိတ်ရနိုင်ရန် ဖြည့်ကျင့်ရသော ကမ္ဘာကာလသည်ကား အဘယ်မျှ ကြာပါသနည်း မြတ်စွာဘုရား” ဤသို့အရှင်အာနန္ဒာက မေးလျှောက်တော်မူပြန်သည်။ “ချစ်သားအာနန္ဒာ၊ အနည်းဆုံး လေးအသင်္ချေနှင့် ကမ္ဘာတစ်သိန်း၊ အလတ်စား ရှစ်အသင်္ချေနှင့် ကမ္ဘာတစ်သိန်း၊ အလွန်ဆုံး တစ်ဆယ့်ခြောက်အသင်္ချေနှင့် ကမ္ဘာ တစ်သိန်း ပါရမီဖြည့်ရ၏။ ဤသို့သော ကာလပတ်လုံး ပါရမီဖြည့်မှ ဉာဏ်ရင့်ခြင်းသို့ ရောက်၏။ ဤမျှလောက်ကြာအောင် ပါရမီကိုဖြည့်၍ ဉာဏ်ရင့်ခြင်းသို့ ရောက် သော်လည်း ဗျာဒိတ်မရသေးသော ဘုရားလောင်းအား နိယတဗျာဒိတ်ကို ရစေရန် လူစင်စစ်ဖြစ်ခြင်း စသော အင်္ဂါရှစ်ပါး ပြည့်စုံဖို့လိုသေးသည်ဟု ဟောပြတော်မူသည်။
ဘုရားလောင်းများ မဖြစ်ထိုက်သော ဌာနများ
နိယတဗျာဒိတ်ကို ရတော်မူကုန်သော ဘုရားအလောင်းတော်တို့သည် ဇစ္စန္ဓ = ဝမ်းတွင်းကန်း၊ ဇာတိဗဓိရ = ဝမ်းတွင်းပင်း၊ ဇစ္ခုမ္မတ္တက = ဝမ်းတွင်းရူး၊ ဇဠမူဂ = ဝမ်းတွင်းအ။ ဇာတိပီဌသမ္ပိ = ဝမ်းတွင်းဆွံ့၊ ဤကဲ့သို့သော ဘဝမျိုး တို့၌ မဖြစ်ကုန်။ မိလက္ခူ = လူရိုင်းမျိုး၊ ဒါသိပုတ္တ=အိမ်ပေါက်ကျွန်မျိုး၊ နိယတမိစ္ဆာဒိဋ္ဌိလူမျိုး ဤဆိုခဲ့သော အမျိုးတို့၌ မဖြစ်ခဲ့။ လိင်ပြန်ခြင်းမရှိ။ မိန်းမ, နပုံးပဏ္ဍုက်, ဥဘတောဗျည်းမဖြစ်။ အမိသတ်ကံ, အဖသတ်ကံ, ရဟန္တာသတ်ကံ, ဘုရားရှင်ကို သွေးစိမ်းတည် အောင်ပြုသောကံ, သံဃာသင်းခွဲသောကံ၊ ဤကံကြီးငါးပါးတို့ကို မပြုကုန်၊ ပြုမည့်သူ မဖြစ်ကုန်။လက်တို, ခြေတို, အနူအရွဲမဖြစ်၊ တိရစ္ဆာန်ဘဝတွင်လည်း ငုံးအောက်ငယ်သော တိရစ္ဆာန်, ဆင်ထက်ကြီးသော တိရစ္ဆာန်မဖြစ်။ အခါခပ်သိမ်း ရေငတ်၍ နေရသော ခုပ္ပိပါသိကပြိတ္တာ, တစ်ကိုယ်လုံး မီးလောင်ခံ၍နေရသော နိဇ္ဈာမတဏှိကပြိတ္တာမျိုး၌ မဖြစ်ကုန်။ ကိုယ်သုံးဂါဝုတ်, ခံတွင်းအပ်နဖားပေါက်မျှ, ထိပ်လယ်တည့်တည့် လယ်ပုစွန် မျက်စိကဲ့သို့ ပြူးပြူးထွက်သောမျက်စိ, အရိုး၌ အရေကပ်၍ ချောက်ကပ်သော အသားအရေရှိသော ကာလကဉ္စိက အသုရကာယ်မျိုးတို့၌လည်း မဖြစ်ကုန်။ ယူဇနာတစ်သောင်းကျယ်သော မဟာအဝီစိငရဲကြီး၌လည်း မဖြစ်။ စကြဝဠာတို့၏အကြား ဆားငန်ရေ လောကန္တရိကငရဲ၌ မဖြစ်။ ကာမဘုံတွင် မာရ်နတ်မဖြစ်။ အသညတ်ဘုံ၌ မဖြစ်။ သုဒ္ဓါဝါသငါးဘုံ, အရူပ လေးဘုံတို့၌မဖြစ်ကုန်။ ဘုရားပွင့်ရာ မဟာဗောဓိပင်ဖြင့် သတ်မှတ်အပ်သော ဤစကြဝဠာမှ တစ်ပါး အခြားသော စကြဝဠာတို့၌ မဖြစ်ကုန်။ နိယတဗျာဒိတ်ရပြီးသော ဘုရားအလောင်းတို့သည် ရှည်မြင့်စွာသော သံသရာ၌ ကမ္ဘာပေါင်းကုဋေဖြင့် မရေတွက်နိုင် သင်္ချေဖွဲ့၍ ပြရသော လေးအသင်္ချေနှင့် ကမ္ဘာတစ်သိန်း ကျင်လည်ရသော်လည်း အလွန်ကြီးကျယ်သော ဆင်းရဲမှ လွတ်ကင်း ကြရကုန်၏။
ဘုရားလောင်းတို့၌ ပြည့်စုံသော ဗုဒ္ဓဘူမိ လေးပါး
၁။ လုံ့လကောင်းမွန်ခြင်း၊
၂။ ဉာဏ်ပညာကောင်းမွန်ခြင်း၊
၃။ ပါရမီရင့်သန် အဓိဋ္ဌာန်မြဲခြင်း၊
၄။ မေတ္တာပွားများခြင်း.. စသည်တို့နှင့် ပြည့်စုံရ၏။
အဇ္ဈာသယ ၆-ပါး အဓိပ္ပာယ် (၁) အလောင်းတော်မြတ် ဗောဓိသတ်တို့သည် အိမ်ရာတည်ထောင် လူတို့ ဘောင်၌ အပြစ်ကို မြင်ကြကုန်သည်ဖြစ်၍ တောထွက်ခြင်းကို အလိုရှိကြ ခြင်း နေက္ခမ္မဇ္ဈာသယ၊ (၂) အလောင်းတော်မြတ် ဗောဓိသတ်တို့သည် အပေါင်းအဖော်၌ မွေ့လျော် ပျော်ရွှင် ဆင်ခြင်မရှိ၊ သတိပေါ့ဖျင်း ရှုပ်ထွေးခြင်း၌ အပြစ်ကို မြင်ကြ ကုန်သည် ဖြစ်၍ အဖော်မရှိ တစ်ကိုယ်တည်းသာ ဆိတ်ငြိမ်ရာကို အလိုရှိကြခြင်း ပဝိဝေကဇ္ဈာသယ၊ (၃) အလောင်းတော်မြတ် ဗောဓိသတ်တို့သည် အလိုယုတ်မာ သူ့ဥစ္စာကို ပြင်းစွာမက်မော လောဘဇော၌ အပြစ်ကို မြင်ကြကုန်သည်ဖြစ်၍ လောဘ မရှိခြင်းကို အလိုရှိကြခြင်း အလောဘ ဇ္ဈာသယ၊ (၄) အလောင်းတော်မြတ် ဗောဓိသတ်တို့သည် ယုတ်မာဆိုးသွမ်း သောင်းကျန်း ရက်စက် သတ်ဖြတ်ညှဉ်းဆဲ မိုက်မဲစွာလှ မျက်ဒေါသ၌ အပြစ်ကိုမြင်ကြ ကုန်သည်ဖြစ်၍ ဒေါသမရှိခြင်းကို အလိုရှိကြခြင်း အဒေါသဇ္ဈာသယ၊ (၅) အလောင်းတော်မြတ် ဗောဓိသတ်တို့သည် တွေဝေရောင်ဝါး ယုံမှားလွင့်ပျံ နှေးညံဖျင်းပေါ မိန်းမောနုံ့နှေးမှိုင်ငေးတွေးတော သို့လောသို့လော သဘောမသိ မသိဝိုးဝါး တရားမကျ မိုက်မောဟ၌ အပြစ်ကို မြင်ကြခြင်း အမောဟဇ္ဈာသယ၊ (၆) အလောင်းတော်မြတ် ဗောဓိသတ်တို့သည် အိုတုံသေတုံ ဖြစ်တုံပျက်တုံ အလုံးစုံသော ဘုံဘဝ၌ အပြစ်ကို မြင်ကြကုန်သည်ဖြစ်၍ ဘုံသုံးပါးမှ ကင်းလွတ်ခြင်းကို အလိုရှိကြခြင်း နိဿရဏဇ္ဈာသယ.. တို့နှင့် ပြည့်စုံကြရသည်။ ဤအဇ္ဈာသယ ခြောက်ပါးနှင့်ပြည့်စုံသော သဗ္ဗညုဘုရားလောင်းတို့သည် ဗျာဒိတ်မရမီ ပတ္ထနာကာလတွင် လေးအသင်္ချေနှင့် ကမ္ဘာတစ်သိန်း၊ ဗျာဒိတ်ရပြီး အဘိနီဟာရကာလတွင် လေးအသင်္ချေနှင့် ကမ္ဘာတစ်သိန်း အနည်းဆုံး ပါရမီဖြည့် ကြရသည်။
ဘုရားလောင်းတို့၌ ပြည်စုံသော အဇ္ဈာသယ ၆-ပါး
၁။ နေက္ခမ္မဇ္ဈာသယ၊
၂။ ပဝိဝေကဇ္ဈာသယ၊
၃။ အလောဘဇ္ဈာသယ၊ ပုံတော်စုံထေရအပဒါန်ဝတ္ထုတော်ကြီး
၄။ အဒေါသဇ္ဈာသယ၊
၅။ အမောဟဇ္ဈာသယ၊
၆။ နိဿရဏဇ္ဈာသယ၊
အဇ္ဈာသယ ၆-ပါး အဓိပ္ပာယ်
(၁) အလောင်းတော်မြတ် ဗောဓိသတ်တို့သည် အိမ်ရာတည်ထောင် လူတို့ ဘောင်၌ အပြစ်ကို မြင်ကြကုန်သည်ဖြစ်၍ တောထွက်ခြင်းကို အလိုရှိကြ ခြင်း နေက္ခမ္မဇ္ဈာသယ၊
(၂) အလောင်းတော်မြတ် ဗောဓိသတ်တို့သည် အပေါင်းအဖော်၌ မွေ့လျော် ပျော်ရွှင် ဆင်ခြင်မရှိ၊ သတိပေါ့ဖျင်း ရှုပ်ထွေးခြင်း၌ အပြစ်ကို မြင်ကြ ကုန်သည် ဖြစ်၍ အဖော်မရှိ တစ်ကိုယ်တည်းသာ ဆိတ်ငြိမ်ရာကို အလိုရှိကြခြင်း ပဝိဝေကဇ္ဈာသယ၊
(၃) အလောင်းတော်မြတ် ဗောဓိသတ်တို့သည် အလိုယုတ်မာ သူ့ဥစ္စာကို ပြင်းစွာမက်မော လောဘဇော၌ အပြစ်ကို မြင်ကြကုန်သည်ဖြစ်၍ လောဘ မရှိခြင်းကို အလိုရှိကြခြင်း အလောဘ ဇ္ဈာသယ၊
(၄) အလောင်းတော်မြတ် ဗောဓိသတ်တို့သည် ယုတ်မာဆိုးသွမ်း သောင်းကျန်း ရက်စက် သတ်ဖြတ်ညှဉ်းဆဲ မိုက်မဲစွာလှ မျက်ဒေါသ၌ အပြစ်ကိုမြင်ကြ ကုန်သည်ဖြစ်၍ ဒေါသမရှိခြင်းကို အလိုရှိကြခြင်း အဒေါသဇ္ဈာသယ၊
(၅) အလောင်းတော်မြတ် ဗောဓိသတ်တို့သည် တွေဝေရောင်ဝါး ယုံမှားလွင့်ပျံ နှေးညံဖျင်းပေါ မိန်းမောနုံ့နှေးမှိုင်ငေးတွေးတော သို့လောသို့လော သဘောမသိ မသိဝိုးဝါး တရားမကျ မိုက်မောဟ၌ အပြစ်ကို မြင်ကြခြင်း အမောဟဇ္ဈာသယ၊
(၆) အလောင်းတော်မြတ် ဗောဓိသတ်တို့သည် အိုတုံသေတုံ ဖြစ်တုံပျက်တုံ အလုံးစုံသော ဘုံဘဝ၌ အပြစ်ကို မြင်ကြကုန်သည်ဖြစ်၍ ဘုံသုံးပါးမှ ကင်းလွတ်ခြင်းကို အလိုရှိကြခြင်း နိဿရဏဇ္ဈာသယ.. တို့နှင့် ပြည့်စုံကြရသည်။ ဤအဇ္ဈာသယ ခြောက်ပါးနှင့်ပြည့်စုံသော သဗ္ဗညုဘုရားလောင်းတို့သည် ဗျာဒိတ်မရမီ ပတ္ထနာကာလတွင် လေးအသင်္ချေနှင့် ကမ္ဘာတစ်သိန်း၊ ဗျာဒိတ်ရပြီး အဘိနီဟာရကာလတွင် လေးအသင်္ချေနှင့် ကမ္ဘာတစ်သိန်း အနည်းဆုံး ပါရမီဖြည့် ကြရသည်။
(အရှင်ဓမ္မဿာမီဘိဝံသ စီရင်တော်မူခဲ့သော ပုံတော်စုံထေရအပဒါန်ဝတ္ထုတော်ကြီး)
ပစ္စေကဗုဒ္ဓါတို့ ဗျာဒိတ်မရသေးမီ ဖြည့်ကျင့်ရသောကာလ
တဖန်အရှင်အာနန္ဒာက“ကြီးသောလုံ့လ ရှိတော်မူသော မြတ်စွာဘုရား၊ သဗ္ဗညုမြတ်စွာဘုရားတို့အား ဗျာဒိတ်မရသေးမီ ပတ္ထနာဆုတောင်းဖြင့် ဖြည့်ကျင့် ရသော ကာလအပိုင်းအခြားကို လည်းကောင်း၊ ဗျာဒိတ်ရပြီးသော အဘိနီဟာရ ဆုတောင်းဖြင့် ဖြည့်ကျင့်ရသော ကမ္ဘာကာလ အပိုင်းအခြားကိုလည်းကောင်း ဟောကြားတော်မူ၍ သိရပါပြီ.. မြတ်စွာဘုရား။ ပစ္စေကဗုဒ္ဓါ တို့မှာမူကား အဘယ်မျှလောက်သော ကမ္ဘာကာလကြာအောင် ဗျာဒိတ်မရမီ ပတ္ထနာဆုတောင်း ဖြင့် ပါရမီဖြည့်၍ နေရပါသနည်း မြတ်စွာဘုရား။ ဗျာဒိတ်ရပြီး၍ အဘိနီဟာရ ဆုတောင်းဖြင့် အဘယ်မျှလောက် ကမ္ဘာကြာအောင် ပါရမီဖြည့်ရပါသနည်း မြတ်စွာဘုရား။ “ညီချစ်အာနန္ဒာ၊ ပစ္စေကဗုဒ္ဓါတို့အား ဗျာဒိတ်မရမီ နှစ်အသင်္ချေနှင့် ကမ္ဘာ တစ်သိန်း ကာလပတ်လုံး ပတ္ထနာဆုတောင်းဖြင့် ဆုတောင်းလျက် ပါရမီကို ဖြည့်ရသည်။ ဤနှစ်အသင်္ချေနှင့် ကမ္ဘာတစ်သိန်း ပတ္ထနာဆုတောင်းရှိသော ပစ္စေက ဗုဒ္ဓါလောင်းတို့သည် ဗျာဒိတ်ရနိုင်ရန် အဘိနီဟာရဆုတောင်းကိုပြုရာ၌ အင်္ဂါငါးပါး ပြည့်စုံစေရသည်"
ပစ္စေကဗုဒ္ဓါတို့ ဗျာဒိတ်ရကြောင်း အင်္ဂါငါးပါး
၁။ လူစင်စစ်ဖြစ်ခြင်း၊
၂။ ယောက်ျားစင်စစ်ဖြစ်ခြင်း၊
၃။ ဘုရား ပစ္စေကဗုဒ္ဓါ, ရဟန္တာတို့တွင် တစ်ပါးပါးကို ဖူးမြင်ရခြင်း၊
၄။ ကိုယ်ကို, အသက်ကိုစွန့်နိုင်ခြင်း၊
၅။ ပစ္စေကဗုဒ္ဓါအဖြစ်ကို အလွန်လိုချင်သော ဆန္ဒအားကြီးခြင်း၊
ဤငါးပါးသည် ပစ္စေကဗုဒ္ဓါတို့ နိယတဗျာဒိတ်ရကြောင်း အင်္ဂါငါးပါးတို့ ဖြစ်သည်။ ဤအင်္ဂါငါးပါးနှင့် ပြည့်စုံ၍ နိယတဗျာဒိတ်ရပြီးသော အဘိနီဟာရ ပစ္စေကဗုဒ္ဓါလောင်းတို့သည် နောက်ထပ် နှစ်အသင်္ချေနှင့် ကမ္ဘာတစ်သိန်း ပါရမီ ဖြည့်မှ ပစ္စေကဗုဒ္ဓါအဖြစ်သို့ ရောက်နိုင်သည်။
ပစ္စေကဗုဒ္ဓါလောင်းနှစ်မျိုး
၁။ ပတ္ထနာပစ္စေကဗုဒ္ဓါလောင်း၊
၂။ အဘိနီဟာရပစ္စေကဗုဒ္ဓါလောင်း၊
ဗျာဒိတ်မရသေးသော ပစ္စေကဗုဒ္ဓါလောင်းကို ပတ္ထနာပစ္စေကဗုဒ္ဓါလောင်း ဟုဆိုသည်။ ဗျာဒိတ်ရပြီးသော ပစ္စေကဗုဒ္ဓါလောင်းကိုမူ အဘိနီဟာရ ပစ္စေကဗုဒ္ဓါ လောင်းဟု ဆိုသည်။ ပတ္ထနာပစ္စေကဗုဒ္ဓါလောင်းသည် ဗျာဒိတ်မရမီ နှစ်အသင်္ချေနှင့် ကမ္ဘာတစ်သိန်း ပါရမီဖြည့်မှ နိယတဗျာဒိတ်ကိုရပြီး အဘိနီဟာရ ပစ္စေကဗုဒ္ဓါလောင်းအဖြစ်သို့ ရောက်သည်။ နိယတဗျာဒိတ်ရပြီးသော အဘိနီဟာရ ပစ္စေကဗုဒ္ဓါလောင်းသည် နောက်ထပ် နှစ်အသင်္ချေနှင့် ကမ္ဘာတစ်သိန်း ပါရမီဖြည့်မှ ပစ္စေကဗုဒ္ဓါအဖြစ်သို့ ရောက်သည်။ ပတ္ထနာဆုတောင်း ပစ္စေကဗုဒ္ဓါလောင်းသည် နှစ်အသင်္ချေနှင့် ကမ္ဘာတစ်သိန်း မပြည့်မီအတွင်း၌ နေ့တိုင်းနေ့တိုင်း ဝေဿန္တရာကဲ့သို့ အလှူကြီး ပေးလျှင်သော် လည်းကောင်း၊ နေ့တိုင်းနေ့တိုင်း သီလစသော ပါရမီတို့ကို ဖြည့်ကျင့်လျှင်သော် လည်းကောင်း နှစ်အသင်္ချေနှင့် ကမ္ဘာတစ်သိန်း မပြည့်မီအတွင်း၌ ဗျာဒိတ်မရနိုင်။ ထို့အတူ နှစ်အသင်္ချေနှင့် ကမ္ဘာတစ်သိန်းပါရမီဖြည့်ကျင့်ပြီး၍ အင်္ဂါငါးပါးနှင့် ပြည့်စုံသဖြင့် နိယတဗျာဒိတ်ရပြီးသော အဘိနီဟာရ ပစ္စေကဗုဒ္ဓါလောင်းသည်လည်း ရှေးနည်းအတူ ဝေဿန္တရာကဲ့သို့ ကြီးစွာသော အလှူကြီးကို နေ့တိုင်းပေးလှူ သော်လည်း နှစ်အသင်္ချေနှင့် ကမ္ဘာတစ်သိန်း မပြည့်မီအတွင်း၌ ပစ္စေကဗုဒ္ဓါ အဖြစ်သို့ မရောက်နိုင်ဟု အပဒါန်အဋ္ဌကထာ၌ ဖွင့်ဆိုသည်။
(အရှင်ဓမ္မဿာမီဘိဝံသ စီရင်တော်မူခဲ့သော ပုံတော်စုံ ထေရ အပဒါန်ဝတ္ထုတော်ကြီး)
သာဝကရဟန္တာတို့ ပါရမီဖြည့်ကျင့်ရသော ကာလ
မဟာသာဝကကြီးတို့ ပါရမီဖြည့်ရသောကာလ
မယ်တော်,ခမည်းတော်,သားတော်,အလုပ်အကျွေးတို့ပါရမီဖြည့်ရသောကာလ
“ကြီးသော လုံ့လရှိတော်မူသောမြတ်စွာဘုရား၊ သာဝကတို့၏ အဘိနီဟာရ ကမ္ဘာကာလအပိုင်းအခြားကို ထိုထိုသာဝက ရဟန္တာတို့သည် ကိုယ်စီကိုယ်စီ အသီးအသီးထုတ်ဖော်၍ ထေရအပဒါန်, ထေရီအပဒါန် ပါဠိတော်တို့၌ ဟောတော် မူကြ၍ သိရပါပြီ၊ ဗျာဒိတ်မရမီ ပါရမီဖြည့်ရသော ပတ္ထနာကာလ ကမ္ဘာအပိုင်းအခြား ကိုမူကား မသိရသေးပါဘုရား။ သာဝက ရဟန္တာတို့၏ ပတ္ထနာ ကာလသည်ကားအဘယ်မျှလောက် ကမ္ဘာကာလ ပါရမီဖြည့်မှ အဘိနီဟာရ ဗျာဒိတ် ရပါသနည်း မြတ်စွာဘုရား” ဤသို့ အရှင်အာနန္ဒာက မေးလျှောက်ဖူးသည်။
အဂ္ဂသာဝကပါရမီဖြည့်ရသော ကာလ
လက်ယာတော်ရံ အရှင်သာရိပုတ္တရာနှင့် လက်ဝဲတော်ရံ အရှင်မဟာ မောဂ္ဂလ္လာန် အဂ္ဂသာဝကကြီးနှစ်ပါးတို့သည် ဗျာဒိတ်မရမီ ဆုတောင်း၍ ပါရမီဖြည့် ရသော ပတ္ထနာကာလမှာ တစ်အသင်္ချေနှင့် ကမ္ဘာတစ်သိန်းဖြစ်သည်။ ဗျာဒိတ်ရပြီးမှ ဆုတောင်း၍ ပါရမီဖြည့်ရသော အဘိနီဟာရ ကာလသည် လည်း တစ်အသင်္ချေနှင့် ကမ္ဘာတစ်သိန်းပင် ဖြစ်သည်။ ထိုတစ်အသင်္ချေနှင့် ကမ္ဘာတစ်သိန်းအောက် ယုတ်လျော့၍ တစ်အသင်္ချေနှင့် ကမ္ဘာတစ်သိန်း မပြည့်မီအတွင်း၌ ပတ္ထနာဆုတောင်း အဂ္ဂသာဝကလောင်းသည် အဘိနီဟာရဗျာဒိတ် မရနိုင်။ ဗျာဒိတ်ရပြီးသော အဘိနီဟာရဆုတောင်း အဂ္ဂသာဝကလောင်းသည်လည်း တစ်အသင်္ချေနှင့် ကမ္ဘာတစ်သိန်း မပြည့်မီအတွင်း၌ အဂ္ဂသာဝက ရဟန္တာအဖြစ်သို့ မရောက်နိုင်။ လက်ယာတော်ရံ အဂ္ဂသာဝိကာဖြစ်ကြသော ရဟန္တာမိန်းမ ခေမာထေရီ, လက်ဝဲတော်ရံ ရဟန္တာမိန်းမ ဥပ္ပလဝဏ္ဏာထေရီတို့သည် ဗျာဒိတ်မရမီပတ္ထနာ ကာလ တစ်အသင်္ချေနှင့် ကမ္ဘာတစ်သိန်းနှင့် ဗျာဒိတ်ရပြီး အဘိနီဟာရကာလ တစ်အသင်္ချေနှင့် ကမ္ဘာတစ်သိန်း ပါရမီဖြည့်မှ အဂ္ဂသာဝိကာ ရဟန္တာမိန်းမအဖြစ်ကို ရကြကုန်၏။
မဟာသာဝကကြီးတို့ ပါရမီဖြည့်ရသောကာလ
အရှင်မဟာကဿပ, အရှင်အနုရုဒ္ဓါ အစရှိသော မဟာသာဝက ရဟန္တာ ယောက်ျား၊ ပဋာစာရီထေရီ, ဓမ္မဒိန္နာထေရီ အစရှိသော မဟာသာဝိကာ ရဟန္တာ မိန်းမတို့သည်ကား ဗျာဒိတ်မရမီ ပတ္ထနာကာလ ကမ္ဘာတစ်သိန်း၊ ဗျာဒိတ်ရပြီး အဘိနီဟာရကာလ ကမ္ဘာတစ်သိန်း ပါရမီဖြည့်ရသည်။ မယ်တော်, ခမည်းတော်, သားတော်, အလုပ်အကျွေးတို့သည်လည်း ဘုရားမယ်တော်ဖြစ်စေရန်, ဘုရားခမည်းတော်ဖြစ်စေရန်, ဘုရားသားတော်ဖြစ်စေရန်, ဘုရားအလုပ်အကျွေးဖြစ်စေရန် ဗျာဒိတ်မရသေးမီ ဆုတောင်း၍ ပါရမီဖြည့်ရ. သော ပတ္ထနာကာလမှာ ကမ္ဘာတစ်သိန်းဖြစ်ပြီး ဗျာဒိတ်ရပြီး ဆုတောင်း၍ ပါရမီ ဖြည့်ရသော အဘိနီဟာရကာလ ကမ္ဘာတစ်သိန်းပါရမီဖြည့်မှ မယ်တော်, ခမည်း တော်, သားတော်, အလုပ်အကျွေးအဖြစ်ကို ရကြကုန်၏ဟု အပဒါန်အဋ္ဌကထာ၌ ဖွင့်ဆိုသည်။
(အရှင်ဓမ္မဿာမီဘိဝံသ စီရင်တော်မူခဲ့သော ပုံတော်စုံ ထေရ အပဒါန်တော်ကြီး)ဝတ္ထုတော်
🌹🌹အမေးနှင့် အဖြေများ
Q. "ဘုရားနှင့် ပစ္စေကဗုဒ္ဓါ"တို့၏ တူပုံနှင့် ခြားနားပုံများ
ကို အသေးစိတ်လေးများ သိရှိခွင့်ရရင် သိရှိလိုပါသည်
အရှင်ဘုရား။
A. ဘုရား၊ ပစ္စေကဗုဒ္ဓတို့ရဲ့ ခြားနားချက်ကို မပြောခင် “ ဗောဓိနဲ့၊ ဗောဓိသတ္တ” အကြောင်းကို အရင်ပြောပြဖို့ လိုပါတယ်။
ဒီလို ဗောဓိအကြောင်းကို ပြောမယ်ဆိုရင် သာဝကအကြောင်းလည်း ထည့်ပြောရမှာဖြစ်လို့ မေးခွန်းထဲမှာ မပါပေမယ့် ဒီနေရာမှာ သာဝကအကြောင်းကိုပါ ထည့်သွင်းပြောကြားပေးမှာ ဖြစ်ပါတယ်။
ဗောဓိဆိုတာ မဂ်ဉာဏ်၊ ဖိုလ်ဉာဏ်၊ သဗ္ဗညုတဉာဏ်တော်တွေကို ပြောတာဖြစ်ပြီး ဒီဉာဏ်တော်တွေကို ရဖို့ကြိုးစားကာ ပါရမီဖြည့်ကြတဲ့ အလောင်းတော်တွေကို
ဗောဓိသတ္တလို့ ဆိုတာဖြစ်ပါတယ်။
★ဗောဓိသုံးမျိုးနဲ့ ဗောဓိသတ္တများ★
ဒီဗောဓိ၊ ဗောဓိသတ္တများဟာ အမျိုးအစားအနေနဲ့ သုံးမျိုးသုံးစား ရှိပါတယ်။ အဲဒါတွေကတော့
၁။ သမ္မာသမ္ဗောဓိ
၂။ ပစ္စေကဗောဓိ
၃။သာဝကဗောဓိ ဆိုတဲ့ဗောဓိသုံးမျိုးနဲ့ဒီဗောဓိဉာဏ်ကို ရရှိဖို့ ပါရမီဖြည့်ကျင့်ကြတဲ့ ဗောဓိသတ္တများဟာလည်း
သမ္မာသမ္ဗောဓိသတ္တ
ပစ္စေကဗောဓိသတ္တ
သာဝကဗောဓိသတ္တ ဆိုပြီး သုံးမျိုးသုံးစား ကွဲပြားကြပါတယ်။
ပါရမီဖြည့်ကျင့်တယ်ဆိုတာ 〝ဒါန၊ သီလ၊ နေက္ခမ၊ ပညာ၊ ဝီရိယ၊ ခန္တီ၊ သစ္စာ၊ အဓိဋ္ဌာန်၊ မေတ္တာ၊ ဥပေက္ခာ″ ဆိုတဲ့ ပါရမီဆယ်းပါးကို ဘဝအမျိုးမျိုးမှာ ပုံစံအမျိုးမျိုးနဲ့ ပြုလုပ်ဆည်းပူး ကြိုးစားအားထုတ်ခြင်းကို ဆိုတာဖြစ်ပါတယ်။
ဒီဉာဏ်တွေကိုရဖို့ ပါရမီဖြည့်ကြတဲ့ အလောင်းတော်တွေဟာ ပါရမီပြည့်မြောက်ပြီး အဲဒီဉာဏ်အသီးသီးကို ရရှိတော်မူပြီးတဲ့ အခါမှာတော့
၁။ သမ္မာသမ္ဗောဓိဉာဏ်ကို ရရှိတော်မူတဲ့ ပုဂ္ဂိုလ်သူမြတ်ကို သဗ္ဗညုမြတ်စွာဘုရား (အလုံးစုံးကို သိတော်မူတဲ့ဘုရား)
၂။ ပစ္စေကဗောဓိဉာဏ်ကို ရရှိတော်မူတဲ့ ပုဂ္ဂိုလ်သူမြတ်ကို ပေစ္စေကဗုဒ္ဓ (ဘုရားငယ်)
၃။ သာဝကဗောဓိဉာဏ်ကို ရရှိတော်မူတဲ့ ပုဂ္ဂိုလ်သူမြတ်ကို (တပည့်သားအရိယာ သာဝက) လို့ ဖြည့်ကျင့်ပြီး ရရှိတဲ့ ဗောဓိဉာဏ်အလိုက် အမည်အဆင့်အတန်း ကွဲပြားကြပါတယ်။
★အလောင်းတော်များနဲ့ ပါရမီဖြည့်ရာကာလ★
သမ္မသမ္ဗောဓိသတ္တခေါ် သဗ္ဗညုမြတ်စွာဘုရားဖြစ်ဖို့ ပါရမီဖြည့်ကျင့်တော်မူကြတဲ့ ဘုရားလောင်းတွေ အနေနဲ့ ပွင့်တော်မူပြီး ဘုရားတစ်ဆူဆူထံမှာ “ဘယ်အချိန်မှာ ဧကန်မုချ ဘုရားဖြစ်လိမ့်မယ်”လို့ နိယတဗျာဒိတ် ရရှိတော်မူပြီးတဲ့နောက်မှာ ပညာကို အဓိကထားကျင့်တဲ့
“ပညာဓိက” ဘုရားလောင်းဆိုရင် လေးအသချေင်္နဲ့ ကမ္ဘာတစ်သိန်း၊
“သဒ္ဓါ”ကို အဓိကထားကျင့်တဲ့ သဒ္ဓါဓိက ဘုရားလောင်းဆိုရင်
ရှစ်အသချေင်္နဲ့ ကမ္ဘာတစ်သိန်း၊
“ဝီရိယ”ကို အဓိကထားကျင့်တဲ့ ဝီရိယာဓိက ဘုရားလောင်းဆိုရင် တစ်ဆယ့်ခြောက်အသချေင်္နဲ့ ကမ္ဘာတစ်သိန်း
ကြာအောင်ပါရမီတော်တွေကို ဖြည့်ကျင့်တော်မူပြီး ပါရမီတော် အထွတ်အထိပ်ကို ရောက်တော်မူတဲ့ အခါမှာတော့ ဆရာမရှိဘဲ မိမိကိုယ်တိုင် ထိုးထွင်းပြီး သစ္စာလေးပါးတရားကို သိတဲ့မဂ်ဉာဏ်၊ ဘာပဲဖြစ်ဖြစ် အလုံးစုံအကုန်လုံးကို အကြွင်းမဲ့ သိမြင်တော်မူတဲ့ သဗ္ဗညုတဉာဏ်ဆိုတဲ့ သမ္မာသမ္ဗောဓိဉာဏ်တော်ကို ရရှိတော်မူပါတယ်။ အဲဒီလို သမ္မာသမ္ဗောဓိဉာဏ်ကို ရရှိတော်မူတဲ့ လောကသုံးပါးမှာ အတုမရှိ၊ အတူမရှိတဲ့ ပုဂ္ဂိုလ်သူမြတ်ကို “သမ္မာသမ္ဗုဒ္ဓ ”(သဗ္ဗညုမြတ်စွာဘုရား)လို့ ခေါ်ဆိုတာ ဖြစ်ပါတယ်။
“ပစ္စေကဗောဓိသတ္တ”ခေါ် ပစ္စေကဗုဒ္ဓါ အလောင်းအလျာတွေ အနေနဲ့ “နှစ်သချေင်္နဲ့ ကမ္ဘာတစ်သိန်း” ကာလကြာအောင် ပါရမီတွေကို ဖြည့်ကျင့်တော်မူပြီး ပါရမီပြည့်မြောက် အထွတ်အထိတ်ကို ရောက်တဲ့အခါမှာတော့ ဆရာမရှိဘဲ မိမိကိုယ်တိုင် ထိုးထွင်းပြီး သစ္စာလေးပါးကိုသိတဲ့ မဂ်ဉာဏ်လို့ခေါ်တဲ့ ပစ္စေကဗောဓိဉာဏ်ကို ရရှိတော်မူပါတယ်။ အဲဒီလို ပစ္စေကဗောဓိဉာဏ်ကို ရရှိတော်မူတဲ့ ပုဂ္ဂိုလ်သူမြတ်ကို ပစ္စေကဗုဒ္ဓ (ဘုရားငယ်)လို့ ခေါ်ဆိုတာ ဖြစ်ပါတယ်။
“သာဝကဗောဓိသတ္တ”ခေါ် သာဝက အလျောင်းအလျာတွေ အနေနဲ့ “အဂ္ဂသာဝကလောင်း” (အရှင်သာရိပုတ္တရာ၊ အရှင်မဟာမေဂ္ဂလာန်တို့လိုမျိုး) ဆိုရင် “တစ်သချေင်္နဲ့ ကမ္ဘာတစ်သိန်း”၊
“မဟာသာဝကလောင်း” (အရှင်ကောဏ္ဍည၊ အရှင်အာနန္ဒာစတဲ့ ရဟန္တာမထေရ်ကြီးတွေလိုမျိုး) ဆိုရင် “ကမ္ဘာတစ်သိန်း”၊
“ပကတိသာဝက” (သာမန်အရိယာ သာဝကမျိုး) ဆိုရင် “ကမ္ဘာတစ်ရာ၊ ကမ္ဘာတစ်ထောင်”
စတဲ့ ကာလကြာအောင် ပါရမီတွေကို ဖြည့်ကျင့်ပြီး ပါရမီပြည့်မြောက်တဲ့ အခါမှာတော့ မြတ်စွာဘုရားလို့ခေါ်တဲ့ ဆရာရှိမှ သစ္စလေးပါးကိုသိတဲ့ မဂ်ဉာဏ်လို့ခေါ်တဲ့ “သာဝကဗောဓိဉာဏ်”ကို ရရှိတော်မူပါတယ်။ အဲဒီလို သာဝကဗောဓိဉာဏ်ကို ရရှိတော်မူတဲ့ ပုဂ္ဂိုလ်သူမြတ်များကို အဆင့်အတန်းအလိုက် “အဂ္ဂသာဝက၊ မဟာသာဝက၊ ပကတိသာဝက”ဆိုတဲ့ အမည်အသီးသီးနဲ့ သာဝကဗုဒ္ဓလို့ ခေါ်ဆိုတာ ဖြစ်ပါတယ်။
ဒါက ဆုပန်ပြီး ပါရမီဖြည့်ကျင့်ကြတဲ့ သာဝကတွေအတွက် ပြောတာဖြစ်ပါတယ်။ ဆုမပန်ဘဲ သာမာန်ကိလေသာကုန်ခမ်း ရဟန္တာဖြစ်ကာ နိဗ္ဗာန်ဝင်ဖို့အတွက်တော့ သီးသန့်သတ်မှတ်ချက်နဲ့ ပါရမီဖြည့်ကျင့်ရာကာလ အတိအကျ မရှိပါဘူး။
“ဗုဒ္ဓ၊ ပစ္စေကဗုဒ္ဓ၊ သာဝက” တွေရဲ့ လုပ်ငန်းစဉ်အထက်မှာ ပြောခဲ့သလို ပါရမီတွေကို အသီးသီးဖြည့်ကျင့်ပြီး
သမ္မာသမ္ဗုဒ္ဓလို့ခေါ်တဲ့ သဗ္ဗညုမြတ်စွာဘုရားအဖြစ်၊
ပစ္စေကဗုဒ္ဓလို့ခေါ်တဲ့ ပစ္စေကဗုဒ္ဓါအဖြစ်၊
တပည့် အရိယာသာဝကလို့ခေါ်တဲ့ သာဝကဗုဒ္ဓအဖြစ်ကို ရရှိတော်မူကြတဲ့ ပုဂ္ဂိုလ်သူမြတ်များထဲမှာ
သဗ္ဗညု မြတ်စွာဘုရားရှင်တို့ကို တာရယိတုပုဂ္ဂိုလ် (ကိုယ်တိုင်လည်း သံသရာမှ ကူးမြောက်ပြီး ဝေနေယျတို့ကိုလည်း သံသရာမှ ထုတ်ဆောင်ကယ်တင်တော်မူတဲ့ အမြတ်ဆုံးပုဂ္ဂိုလ်)လို့ ခေါ်ဆိုပါတယ်။ မှန်ပါတယ်။ အလုံးစုံကို အကြွင်းအကျန်မရှိ အကုန်အစင် သိတော်မူတဲ့ သဗ္ဗညုတဉာဏ်ကို ရရှိတော်မူတဲ့ မြတ်စွာဘုရားရှင်ဟာ သစ္စာလေးပါးတရားတော်ကို ကိုယ်တော်တိုင်လည်း ထိုးထွင်းပြီး သိတော်မူသလို ကိုယ်တော်မြတ် သိတော်မူတဲ့ အတိုင်းလည်း ကျွတ်ထိုက်တဲ့ သတ္တဝါဝေနေယျတွေကို သူတို့ရဲ့ အလိုဆန္ဒကိုလိုက်ပြီး သစ္စာတရားကို သိအောင်ဟောပြော ချေချွတ်တော်မူနိုင်တဲ့အတွက် အတုမရှိ တာရယိတုပုဂ္ဂိုလ်မြတ် ဖြစ်ပါတယ်။ ဒီလို သတ္တဝါ ဝေနေယျတွေရဲ့ အလိုကိုသိပြီး သစ္စာတရားကို ဟောကြားပေးနိုင်မှုဟာ သဗ္ဗညုတ ဘုရားရှင်တွေပဲ စွမ်းဆောင်နိုင်တာ ဖြစ်ပါတယ်။ ဒါကြောင့်လည်း အနှိုင်းမဲ့ဗုဒ္ဓ၊ အလုံးစုံကို အကုန်အစင်သိတော်မူတဲ့ ဘုရား၊ အတုမရှိမြတ်စွာလို့ ဆိုခြင်း ဖြစ်ပါတယ်။
“ပစ္စေကဗုဒ္ဓါ”တို့ကိုတော့ စာလို တရိတပုဂ္ဂိုလ် (မိမိကိုယ်တိုင်သာ သံသရာမှ ကိုယ်စွမ်းဖြင့် ကူးမြောက်နိုင်ပြီး သူတပါးတို့ကို သံသရာမှ ထုတ်ဆောင်ကယ်တင်မှု မပြုနိုင်တဲ့ ပုဂ္ဂိုလ်) လို့ ခေါ်ဆိုပါတယ်။ မှန်ပါတယ်။ ပစ္စေကဗုဒ္ဓါ အရှင်မြတ်တွေဟာ သဗ္ဗညုမြတ်စွာဘုရားရှင်များ ဖြစ်ပွင့်တော်မူတဲ့ အခါကာလမျိုးမှာ ဖြစ်ပွင့်ခြင်းမရှိဘဲ ဘုရားရှင်တစ်ဆူဆူတို့ရဲ့ ကြားကာလဖြစ်တဲ့ သာသနာပကာလမှာပဲ ပွင့်တော်မူကြပါတယ်။ ပစ္စေကဗုဒ္ဓါ အရှင်မြတ်တွေဟာ သဗ္ဗညုဘုရားရှင်တွေလို သစ္စာတရားကို ကိုယ်တိုင်လည်းသိ၊ သူတပါးကိုလည်း သိစေနိုင်တာမျိုး မဟုတ်ဘဲ ကိုယ်ကိုယ်တိုင်သာ ဆရာမကူဘဲ သစ္စာတရားကို ထိုးထွင်းသိမြင်နိုင်ပြီး သူတပါးတွေကို သိအောင်ဟောပြနိုင်ခြင်း မရှိပါဘူး။ မဂ်ဖိုလ်နိဗ္ဗာန်ဆိုတဲ့ ပဋိဝေဓတရား အနက်သဘောကို ကိုယ်တိုင်သိမြင်ပေမယ့် အဲဒီမဂ်ဖိုလ်နိဗ္ဗာန်ဆိုတဲ့ လောကုတ္တရာ တရားကို နာမပညတ်တင်ကာ သူတပါးတို့သိအောင် ဟောပြောနိုင်စွမ်း မရှိပါဘူး။ ဒါကြောင့် အဋ္ဌကထာ ဆရာတွေက “ပစ္စေကဗုဒ္ဓါ အရှင်မြတ်တို့ရဲ့ သစ္စာလေးပါး တရားကို သိမြင်ခြင်းဆိုတဲ့ ဓမ္မာဘိသမယကို စကားမပြောတတ်သူ အိမ်မက်မက်ခြင်းနဲ့တူကြောင်း ဥပမာပေး ပြောဆိုကြခြင်း ဖြစ်ပါတယ်။ ပစ္စေကဗုဒ္ဓါ အရှင်သူမြတ်တွေဟာ ရဟန်းပြုချင်ကြတဲ့ သူတပါးတို့ကို ရဟန်းပြုပေးပြီး “ဒီလိုသွား၊ ဒီလိုနေ၊ ဒီလိုထိုင်၊ ဒီလိုပြော” စသဖြင့် အာဘိသမာစရိက ကျင့်ဝတ်ကို သင်ကြားပေးတော်မူနိုင်ပေမယ့် “ဒီလိုရုပ်နာမ်ကို ခွဲခြားပြီး လက္ခဏာယဉ် တင်ရမည်၊ ဒီလို ရှုမှတ်ရမည်” စသဖြင့် နာကြားသူတွေကို မဂ်ဖိုလ်ရောက်လောက်အောင် တရားဓမ္မ ဟောပြောပြသတော် မမူနိုင်ကြပါဘူး။ ဒါကြောင့် ပစ္စေက ဗုဒ္ဓအရှင်သူမြတ်တွေကို ကိုယ်တိုင်သာသိပြီး သူတပါးကို သိစေတော်မမူနိုင်တဲ့ အငယ်စားဘုရား၊ ဘုရားငယ်လို့ ခေါ်ဆိုတော်မူခြင်း ဖြစ်ပါတယ်။
သာဝကဗုဒ္ဓဖြစ်တော်မူကြတဲ့ တပည့်သား “အရိယာသာဝက”တွေကို တာရိတပုဂ္ဂိုလ် (အထုတ်အဆယ် အကယ်အတင်ခံပုဂ္ဂိုလ်) လို့ ခေါ်ပါတယ်။ ဒီနေရာမှာ သာဝကဗုဒ္ဓလို့ သုံးလိုက်တဲ့အတွက် ဗုဒ္ဓဆိုတဲ့ စကားလုံးကို မြတ်စွာဘုရားရှင်လိုမျိုး ဘုရားလို့ အဓိပ္ပါယ် အမှတ်မလွဲဖို့လိုပါတယ်။ ဒီမှာပြောတဲ့ ဗုဒ္ဓဆိုတာ သစ္စာတရားကို သိမြင်ခြင်းဆိုတဲ့ အဓိပ္ပါယ်နဲ့ သုံးတဲ့စကားလုံး ဖြစ်ပြီး တပည့်သာဝကအနေနဲ့ သစ္စာတရားကို သိခြင်းလို့ ဆိုလိုတာ ဖြစ်ပါတယ်။ အချို့က အရှင်သာရိပုတ္တရာလောင်း ဥပတိဿပရိဗိုဇ်ဟာ အရှင်အဿဇိ မထေရ်ထံမှ တရားတော်ကို နာယူပြီး သောတာပတ္တိမဂ်ဖိုလ်၌ တည်တော်မူတဲ့ အချက်ကိုထောက်ပြီး တပည့်သား အရိယာသာဝကတို့ကို ကိုယ်တိုင်လည်း အကယ်တင်ခံ၍ သူတပါးတို့ကိုလည်း ကယ်တင်တော်မူတတ်တဲ့ (တာရယိတု)ပုဂ္ဂိုလ်လို့ ထင်မှတ်တတ်ပါတယ်။ တကယ်တော့ တပည့်သား အရိယာ သာဝကတို့ ဟောကြားကြတဲ့ တရားများဟာ မြတ်စွာဘုရားရှင်ထံမှ စတင်ဖြစ်ပေါ်တော်မူခဲ့တဲ့အပြင် ဘုရားရှင်၏ လမ်းညွှန်မပါဘဲ ကိုယ်တိုင်သီးခြား နည်းတပါးနဲ့ ဟောကြားခြင်း မဟုတ်တဲ့အတွက် တပည့်သား အရိယာသာဝကတွေကို တာရယိတုပုဂ္ဂိုလ်လို့ မခေါ်နိုင်ပါဘူး။ ဒါကြောင့် တပည့်သာဝက အရိယာတွေကို ဆရာမရှိဘဲ သစ္စာလေးပါးကို မသိနိုင်ဘဲ ဆရာအကူအညီ ရမှသာ သစ္စာလေးပါးကို ဟောကြားနိုင်၊ မဂ်ဉာဏ်ဖိုလ်ဉာဏ်တို့ကို ရနိုင်တဲ့အတွက် တာရိတပုဂ္ဂိုလ်လို့ပဲ ခေါ်ဆိုနိုင်တာ ဖြစ်ပါတယ်။
ဒီလောက်ဆိုရင်တော့ လူတော်တော်များများ မရှင်းဘဲ ဖြစ်နေကြတဲ့ “ဗုဒ္ဓ၊ ပစ္စေကဗုဒ္ဓ၊ သာဝက”တို့ရဲ့ ခြားနားချက်လေးတွေကို အထိုက်အလျောက် နားလည်သဘောပေါက်နိုင်မယ်လို့ ထင်ပါတယ်။
မေးခွန်းရှင် မေးထားသလို ဘုရားနဲ့ ပစ္စေကဗုဒ္ဓတို့ရဲ့ တူညီချက် ခြားနားချက်ကိုပဲ သီးသန့်ထုတ်ပြောပါဆိုရင်တော့ ဘုရားနဲ့ ပေစ္စကဗုဒ္ဓတွေဟာ
ဖြည့်ကျင့်တော်မူကြတဲ့ ပါရမီ အရေအတွက်၊
ဖြည့်ကျင့်ပုံ တူညီခြင်း၊
သစ္စာလေးပါး တရားတော်ကို ဆရာမကူဘဲ ကိုယ်တော်တိုင် ထိုးထွင်း၍ သိမြင်တော်မူခြင်း
ဆိုတဲ့ အချက်တွေလောက်တော့ တူညီတယ်လို့ ပြောလို့ရနိုင်ပြီး
မတူညီတဲ့ အချက်တွေဆိုရင်တော့
ပါရမီဖြည့်ကျင့်တဲ့ ကာလမတူညီခြင်း၊
သစ္စာလေးပါးကို သူတပါးသိအောင် ဟောပြောနိုင်မှု မတူညီခြင်း၊
ရရှိတော်မူတဲ့ ဉာဏ်တော်မတူညီခြင်း၊
ပွင့်တော်မူတဲ့ အချိန်ကာလ မတူညီခြင်းစတဲ့ အချက်တွေပဲလို့ အကြမ်းဖျင်း နားလည်ထားရင်လည်း လုံလောက်မယ်ထင်ပါတယ်။
မိမိတို့အနေနဲ့ကတော့ ပါရမီဖြည့်ပြီး ပါရမီအစဉ်အတိုင်းပဲ နိဗ္ဗာန်ကို သွားမှာလား၊
ဒါမှမဟုတ် သံသရာ တစ်လျှောက်မှာ ဖြည့်ခဲ့ဖူးတဲ့ မမြင်နိုင်တဲ့ ပါရမီအားကိုယူပြီး ဒီဘဝမှာပဲ ဘဝနာအလုပ် အားထုတ်ရင်း ကိလေသာကင်းရာ နိဗ္ဗာန်ကို ယူကြမှာလားဆိုတာကိုတော့ ကိုယ်ပိုင်ရွေးချယ်မှုနဲ့ ကိုယ်တိုင်ပဲ အားထုတ်ကြည့်ကြဖို့ပဲ ဖြစ်ပါကြောင်း အကြံပြုလိုက်ရပါတယ်။
ကျမ်းကိုး = မဟာဗုဒ္ဓဝင် (ပထမတွဲ၊ ပထမပိုင်း)၊ မင်းကွန်းတိပိဋကဓရ ဆရာတော်
Credit to🙏
မျှဝေသူ ဓမ္မပါရဂူ
Ven Dr RevataDhamma
(Buddha Dhammaschool)
