13/08/2026
ဒွတ္တဘောင်ရဲ့အချစ် .. ပန်ထွာရဲ့ အမုန်းမြေ .. သရေခေတ္တရာရဲ့ မြို့တံခါးပေါက်နဲ့ နန်းတော်ရာကုန်းသို့
ဒီတစ်ခေါက်မှာတော့ လွန်ခဲ့တဲ့ နှစ် ၂၀၀၀ ကျော်က စည်ကားခဲ့မယ့် သရေခေတ္တရာပြည် ပျူနိုင်ငံကြီးရဲ့ ဝင်ပေါက် ၉ ခုထဲက ရဟန္တာဂိတ် မြို့ဝင်ပေါက်တံခါး နဲ့ ပျူမင်းအဆက်ဆက် စိုးစံခဲ့တဲ့ နန်းတော်ရာ အုတ်ပန္နက်ခုံကြီးဆီ သွားရောက်လေ့လာခဲ့ပါတယ်။
သရေခေတ္တရာမြို့ကို ဝန်းရံထားတဲ့ ဘောဘောကြီးစေတီအနီးမှာ ဒွတ္တဘောင်မင်းကြီးရဲ့ ကောင်းမှု ရဟန္တာကန်ကြီး အခုထိရှိနေပါသေးတယ်။
အဲဒီနား မြို့အဝင်ဂိတ်နားမှာ ရဟန္တာဂူဘုရားကို တည်ထားပြီး သရေခေတ္တရာကို ဝင်တဲ့အဝင်ဂိတ်တစ်ခုနားမှာ ဘုရားနဲ့ ရေကန်နဲ့ တင့်တယ်အောင် အမောပြေအောင် တည်လှူထားခဲ့ပါတယ်။ တည်ထားတဲ့ ရဟန္တာဂူဘုရားနဲ့ ရဟန္တာကန်ကို အစွဲပြုပြီး ရဟန္တာဂိတ်တံခါးလို့ ခေါ်ကြဟန်တူပါတယ်။
ဒီနေရာမှာ လွန်ခဲ့တဲ့နှစ် ၂၀၀၀ ကျော်က ပျူလူမျိူးတွေ ဖြတ်သန်းသွားလာခဲ့ကြမယ်၊ အမှုထမ်း အရာထမ်းတွေနဲ့ စည်ကားခဲ့မယ်၊ မြို့အဝင်တံတိုင်းကြီးတွေ မြို့တံခါးကြီးတွေနဲ့ အင်မတန်ခမ်းနားခဲ့မယ်လို့ စိတ်ထဲမြင်ယောင်မိပါတယ်။ အဲဒီဂိတ်တံခါးမှာ လျောက်နေရင်း ဒီနေရာမှာပဲ ပျူလူမျိူးတွေနဲ့ အတူ လျောက်နေမိတယ်၊ သူတို့နဲ့ ခြေရာတွေတထပ်ထဲကျနေမလား စိတ်ကူးယဉ်မိပါတယ်။
အဲဒီနောက်မှာတော့ ဒွတ္တဘောင်မင်းရဲ့အချစ်တွေ
အသိမ်းပိုက်ခံလာရဲ့ ပန်ထွာဘုရင်မရဲ့ အမုန်းတွေနဲ့ ပြည့်နေမယ့် ပျူမင်းအဆက်ဆက်တို့လဲ စိုးစံခဲ့ဖူးမယ့် ပျူမင်းတို့ရဲ့ နန်းတော်ရာ အုတ်ကုန်းကြီးကို သွားရောက်ခဲ့ပါတယ်။ သရေခေတ္တရာပြည်ကြီးကို ရဟန္တာတံခါးကနေ ဝင်လာခဲ့တာ လာရင်းလာရင်း နန်းတော်အထိပါ ရောက်ပြီပေါ့၊ အရင်ကဆို ဝင်ချင်တိုင်းဝင် ထွက်ချင်တိုင်းထွက်မရ အခွင့်ရှိသူတွေသာ ဝင်ထွက်လို့ရမယ့် ပျူမင်းတို့ရဲ့နန်းတော်ဆီက်ို အခုတော့ အိုးဝေလေးစီးပြီး အခြေတင်ရောက်ခဲ့ပြီ။ တားမယ့်သူမရှိ စစ်မယ့်သူမရှိ ပျက်ဆီးသွားခဲ့ပြီဖြစ်တဲ့ ပျူဘုရင်တို့ရဲ့ ပင်မနန်းဆောင်နေရာကြီး ၊ ရာဇဝင်အရဆိုရင် ဖိုးဦးတောင်က ပွေးဖိုပွေးမ ဘဝကစလို့ ချစ်ခြင်းမုန်းခြင်းတွေနဲ့ သံသရာရှည်လာခဲ့တဲ့ သရေခေတ္တရာရဲ့ဘပျူမင်း ဒွတ္တဘောင်ဘုရင်နဲ့ ဗိဿနိုးဘုရင်မ ပန်ထွာတို့ရဲ့ နေထိုင်ခဲ့ဖူးမယ့်နေရာ ၊ သံသရာအဆက်ဆက်မကုန်နိုင်တဲ့ ချစ်ခြင်းတွေနဲ့အတူ ရောယှက်နေတဲ့ မာနကြောင့် စစ်ချီရင်း ဥပါယ်တံမျဉ်သုံး ဗိဿနိုးပြည်ကို အနိုင်ပိုင်း တက်သိမ်းလာခဲ့တဲ့အခါ ယခင်ဘဝတွေက အမုန်းတွေအပြင် အခုဘဝက အမုန်းနဲ့ပါ ဆပေါင်းတိုးမုန်းလိုက်တဲ့ ပန်ထွာဘုရင်မကို သိမ်းပိုက်ပြီး ခေါ်ဆောင်လာတဲ့ နေရာ ၊ ဒီနေရာ ဒီနန်း ဒီမြေ ဒီနားမှာပါလားဆိုပြီး လွမ်းမောစွာစိတ်ကူးယဉ်မိခဲ့ပါတယ်။
#ပြည် #ရဟန္တာဂိတ် #နန်းတော်ရာ #ပျူ #ရထား #သရေခေတ္တရာ #ပျူမြို့ဟောင်း #လေ့လာရေး
