16/07/2021
Janang Ensuring : Penerima Anugerah Litaricha Nengeri Sarawak Ke-10 Kategori Jaku Iban
by Indun Silong
July 15, 2021
KUCHING: Dua kali bejurut nerima Anugerah (Perais) Litaricha Nengeri Sarawak Kategori Jaku Iban, Janang Ensiring berasai gaga sereta temegah laban asil karang iya dalam dunya ngarang nerima basa ke chukup tinggi.
Janang ti tebilang agi dikangau Pengajar Janang madahka, anugerah tu besai reti ba iya laban andalka asil karang iya jemah ulih meri penemu ti menyana ngagai bala pemacha.
“Nyangka enda mayuh, tang aku andal nyema seleka dua karang ti digaga aku nya ulih ditemu sida nembiak rebak baru diatu.
“Pia mega, aku gaga laban udah bendar ngasah enggau ngilir penau dalam dunya nulis enggau nyurat ngichaka ulih ngasilka buah penemu dalam bup ti bemutu tinggi,” ku iya.
Ex-pengajar Janang madah munyi nya lebuh dirandau pemberita Ruai, apin lama ke udah.
Janang lebuh nerima Pemesai Bintang Sarawak 2019 ari Tuai Pemegai Menua Tun Pehin Sri Abdul Taib Mahmud.
Ngaku diri agi bisi pengurang, Janang gaga laban udah ulih narit ati bala pemacha enti dibanding enggau bup bukai ti tebilang sereta bekualiti.
“Aku bechunto ba sebuah bup ‘Uncle Tom’s Cabin (1952)’ ke dikarang Harriet Beecher Stowe ke udah mujur ngapi pengeringat orang kulit chelum di Amerika Syarikat bekaul kisah sida ti diperinsa nyadi ulun orang maya nya.
“Leka karang iya udah nyadi senyata orang kulit chelum di Amerika Syarikat ngepunka American Civil War ngujungka Presiden Abraham Lincoln ngangau sereta alit ati meda iya siku indu mit ti udah ngepunka perang nya,” ku iya.
Iya mega mega meri terima kasih ngagai Perintah Sarawak kelebih agi Librari Nengeri Sarawak laban udah meri basa ti besai ngagai asil karang iya berengkah taun 1964 kelia.
“Lebuh bepun ngarang suba kami nulis ngena jari ba dalam keretas.
“Keterubah aku enggau pekit ngarang, aku lalu bulih lumur tiga, ari nya ati aku teperansang sereta bisi pengerindu ngarang enggau nyurat,” ku iya.
Janang mega madahka, kenyau udah ngaul diri dalam dunya ngarang iya udah ngasilka 20 buah bup ti dikarang kediri, 13 buah bup dikarang begulai enggau pengarang bukai, sebuah jurnal Ngingit ti dikeluarka dua kali setaun nyengkaum dua buah diksionari iya nya Bup Sereba Reti Jaku Iban enggau A Comprehensive Iban-English Dictionary.
“Keterubah aku nerima anugerah tu ba taun 1996, seminggu sebedau aku bekejang ke Amerika Syarikat laban ti deka nampung pelajar.
“Aku mega kala enggau pekit ngarang novel baka Emperan Assam Panas bulih champion enggau ngambi pekit baruh Opis Pemadah baka nulis esei.
“Aku ukai semina ngarang dalam Jaku Iban aja, tang aku mega bisi nulis bup dalam jaku English baka ‘Iban Boy’ ti dichelak ba taun 2013 ngujungka bup nya dibeli Librari Malaysia,” ku iya.
Iya madahka pangku pengawa diri diatu gawa nyadi Tuai Editor Jurnal ba Tun Jugah Faundation lalu deka ngeluarka dua isu dalam setaun.
“Pemadu baru, aku udah nyelak dua bup, siti novel Anak Periman enggau siti agi ensera tuai ‘Sangkuh Agung’ tang bedau dikeluarka laban penanggul pengerekai penyakit Covid-19,” ku iya.
MERANSANG REBAK BARU
Iya ngarapka nembiak rebak baru ulih ngansah sereta ngilir penemu dalam dunya karang.
“Iya ke dipeda aku diatu, nembiak rebak baru nadai siku udah tepansutka nama ngasilka novel dalam Sarawak tu, kelebih agi nembiak ke indu.
“Enda baka menyadi kitai Melayu, kitai Iban nadai kala mansutka asil karang.
“Orang ti suah mansutka karang semina orang ke tuai baka kami enggau Pengajar Jantan Umbat enggau ke bukai aja,” ku iya.
Nya alai, iya meransang nembiak mayuh agi macha bup awakka ulih ngasah penemu sereta enda mantul ati.
“Kitai Iban diatu bedau ulih ngemansutka nama laban apin teasilka bup ti bekualiti, nya kebuah aku mai rebak baru macha bup laban penemu nya meh kuasa.
“Aku lebuh agi rebak baru suba berasai nesal laban nadai macha bup, ukai ketegal aku enggai, tang ketegal kelia mar ngulihka bup,” ku iya.
Nangkan nya, iya mega merensang nembiak rebak baru nguji ngarang bup ti ulih meri asil ngagai orang ti macha baka bup penemu.
“Nyema nuan Iban, pengidup nuan patut ngena jaku Iban tauka belajarka adat asal diri.
“Kenyau ari mit, aku udah nemu enggau orang nyampi, berengung, bepantun enggau main asal bukai.
“Baka nya mega, kitai ti bisi penemu anang enggai bekunsi penemu ngagai orang bukai, penemu nya mesti dibagi awakka terus meruan,” ku iya.
LANDIK… Janang mega bisi nyaup ngaduka bup diksionari Iban.
TURAI PENGIDUP
Janang ada kena 21 Januari 1949 di Disso, Saratok. Iya kala besekula ba Sekula St. Peter, Saratok (1957-1962) sebedau nampung sekula sekondari ba Sekula Sekondari Saratok.
Udah nya, ba taun 1969 enggau 1975 iya lalu ngambi peresa ‘Senior Cambridge Certificate’ enggau ‘Higher School Certificate’.
Ba taun 1996, iya mujur bulih sekularship penuh dipelanja Tun Jugah Foundation nyambung sekula ba Asbury College, Kentucky enggau Indiana University, Bloomington, U.S.A.
Tiga taun udah nya, iya pulai ke Sarawak mai BA enggau MBA Degree ngepunka pengawa nyadi Penulung Kanan 1 ba SMK Bau, Sarawak tang badu semilan bulan nangkan nya.
Ba taun 2001, iya lalu diambi Tun Jugah Foundation nyadi Pemesai Pemansik (Research Officer).
Sebedau nya, Janang kala nyadi pengajar temporari Grade IIIB sepengelama setaun lebih di SRK Engkilili No.1.
Iya lalu dilatih ba Palan Ngelatih Pengajar Rajang (1967-1968). Udah tembu dilatih dia iya lalu ngajar baru ba SRK Engkilili No.1 ngujungka iya nyadi kepala pengajar ba sekula nya.
Udah nya, iya dipindahka ngagai SMK Lubok Antu, Engkilili (1972-1973), sebedau mindah ngagai SMK Simanggang.
Iya gawa dalam servis ngajar manggai 33 taun semilan bulan tang chakah ngaul diri dalam dunya ngarang.
Entara pengawa ti kala pegai iya sepengelama dalam servis tu iya nya, Penerbit TV Pelajar Sektor Servis Media Pelajar di Indu Opis Pelajar Nengeri Sarawak (1974-1977), Prinsipal SMK Debak (1978-1981), Pemesai Opis Pelajar Bagi Menua Lubuk Antu (1981-1983), Pemesai Opis Pelajar Bagi Menua Betong (1983-1985), Prinsipal SMK Kalaka Roban (1985-1991), Pematau Tim (Gerup) Sekula Indu Opis Pelajar Kuching (1991-1993), Penyelia Kurikulum Sekula Primari Begian Pemansang Kurikulum Indu Opis Pelajar, Sarawak (1993-1996) enggau Penulung Kanan 1 SMK Bau (2000).
Entara novel, cherita pandak enggau ‘poems’ ti kala dikarang Pengajar Janang iya nya An Iban Boy: Reminiscences of My Childhood (2013), Ai ditetak Enda Putus (2013), Dunya Tu Panggau Pengelulu (2010), Serebana Antu Pala (2012), Senawah di Ujung Pemetang (2013), Miga Kelabu (1966), Emperan Assam Panas (1975), Tanah Belimpah (1976), Bumi Bertuah (1991), Jeman Gelana (1999), Langit Serepan di Wung Akah (1998), Endu Kunci Hari (1999 – dalam Jaku Malayu), Sebaginda Bujang dan Anak Cuik Keramat (2006- dalam Jaku Melayu), Dunya Aku (1995), Ungkapan Bahasa IBAN Bahasa MALAYSIA (1995), Dr. Ida (1992), Aram Bedindang (2006), Gempung Ensera Nembiak 1-8 (8 buah bup), Sangkuh Agung (2020) enggau Anak Periman (2021).
Pengajar Janang mega chakah ngetanka main asal kitai Iban nengah bup ti dichelak ba baruh Tun Jugah Foundation enggau Dayak Cultural Foundation baka Sampi enggau Biau (2001), Renung Adat (2001), Renung Semain (2001), Ripih Pengawa Gawai Antu (2004), Pelian (2002), Tiga Ensera (2009), Entelah (2009), Jaku Dalam (2002), Bup Sereba Reti Jaku Iban (2011) enggau A Comprehensive Iban-English Dictionary (2016).
Janang Ensiring : Penerima Anugerah Litaricha Nengeri Sarawak Ke-10 Kategori Jaku Iban dari Suara Sarawak
