15/04/2026
I vinter har me hatt periodar med mykje frost.❄️ I slike tider ser me gjerne at vassforbruket aukar noko, då mange let vatnet renne for å førebygge frost i røyra. For å unngå unødvendig vassbruk oppmodar me kundane våre til å vurdere montering av varmekabel i vassleidninga.
Ta gjerne kontakt med røyrleggar for gode løysingar – dette er ei investering som kan førebygge utfordringar neste vinter.
Då mildvêret kom, registrerte me også periodar med auka vassforbruk. Dette heng ofte saman med lekkasjar frå røyr, ventilar og koplingar som har blitt påverka av frosten. Det er difor svært positivt å sjå at vassforbruket går ned att etter kvart som desse lekkasjane vert utbetra.😀
Den siste tida har fleire lekkasjar blitt reparerte eller stengde, mellom anna i områda Kolbeinsvik, Haukanes, Haugland/Birkeland og Bakka. Me set stor pris på innsatsen frå alle som bidreg til å redusere vassforbruket – dette er viktig både for miljøet og for vassforsyninga vår.
Samtidig vil me oppmode alle som oppdagar eller utbetrar lekkasjar om å gi oss beskjed. Det gjer arbeidet vårt med lekkasjesøk enklare og gir oss verdifull oversikt over leidningsnettet.
Tusen takk til alle som bidreg – saman tek me vare på vassressursane våre!
