17/06/2026
श्रीहरि के.सी.को यात्रा-संस्मरणात्मक निवन्ध कृति ‘मिसन’ ( दुवाकोटदेखि देश दुनियां ) पुस्तक विमोचनः
प्रहरी वरिष्ठ नायव निरीक्षक श्रीहरि के.सी.द्वारा लिखित ‘मिसन’ ( दुवाकोटदेखि देश दुनियां ) नामक यात्रा-संस्मरणात्मक निवन्ध कृति मिति २०८३/०२/०५ गते सार्वजनिक गरिएको छ ।
नेपाल प्रहरी प्रधान कार्यालय, नक्सालमा आयोजित विशेष समारोहमा प्रहरी महानिरीक्षक दान बहादुर कार्कीको प्रमुख आतिथ्यतामा उक्त कृतिको विमोचन गरिएको हो ।
‘मिसन’ कृतिमा लेखक के.सी.ले प्रहरी सेवामा रहँदा देशका विभिन्न स्थान तथा स्वदेश-विदेश यात्राका क्रममा देखेका, भोगेका, सुनेका र आफैले संकलन गरेका अनुभूति र अनुभवलाई नियात्रात्मक साथै कलात्मक शैलीमा प्रस्तुत गर्नुभएको छ । कृतिमा पेशागत जीवनका उतारचढाव, यात्राका अनुभूति र सामाजिक यथार्थलाई चित्रण गरि मौलिक ढंगमा उजागर गरिएको छ ।
समारोहमा प्रहरी महानिरीक्षक कार्कीले नागरिक सहायता तथा गुनासो व्यवस्थापन अनलाइन प्रणालीको समेत शुभारम्भ गर्नुभएको थियो । सो प्रणालीमार्फत सेवाग्राहीका निवेदन तथा गुनासाहरूलाई डिजिटल माध्यमबाट सहज रूपमा दर्ता र व्यवस्थापन गर्न सकिने अपेक्षा गरिएको छ ।
कार्यक्रममा बोल्दै प्रमनि कार्कीले व्यस्त प्रहरी जीवनका बीच सिर्जनात्मक लेखनमा सक्रिय रहनु प्रशंसिय र सराहनीय रहेको उल्लेख गर्दै यस्ता साहित्यिक कृतिले नेपाली समाज र प्रहरी संगठनभित्र अध्ययन र लेखन संस्कृतिलाई प्रोत्साहन गर्ने विश्वास व्यक्त गर्नुभयो ।
कार्यक्रममा प्रहरी उच्च अधिकृत, सञ्चारकर्मी तथा आमन्त्रित अतिथिहरूको उल्लेखनीय उपस्थिति रहेको थियो । ‘मिसन’ कृतिले प्रहरी जीवनका अनुभव र यात्रालाई साहित्यिक ढंगले प्रस्तुत गर्दै पाठकमाझ नयाँ अनुभूति दिने अपेक्षा गरिएको छ ।
पुस्तकको मुल मर्मः
नेपाल प्रहरीप्रतिको आम मान्छेको बुझाइ र आकर्षण कुनै स्थिर चित्र होइन— यो त समय, अनुभव र विश्वासका रेखाले कोरिएको जीवित आकृति हो। यही संवेदनशील आकृतिलाई “मिसन” ( दुवाकोटदेखि देश दुनियां ) नामक यात्रा-संस्मरणात्मक निवन्ध कृतिले शब्दरूपी सूक्ष्म कुचीले छुँदै गएको छ। नेपालका पहाडी छेउबाट उठेको एक साधारण प्रहरी जवान, जब क्यारिबियन मुलुक हाइटीको अपरिचित भूगोलमा टेक्छ, ऊ केवल एउटा व्यक्ति रहँदैन— ऊ शान्तिको दूत, भरोसाको दीपक र अनुशासनको मौन सङ्गीत बनेर उभिन्छ। उसको उपस्थितिले त्यहाँको सरकारको संरचना, अव्यवस्थित समय र त्रस्त जनजीवनबिच एउटा नदेखिने तर अनुभूत हुने सुरक्षा–वृत्त कोर्छ। यसै क्रममा, अफ्रिकी मुलुक सुडानका धूलाम्मे गल्ली, हबुबको साम्राज्य, बहुरङ्गी संस्कृतिह र राज्य–व्यवस्थाका जटिल तहलाई लेखकले मिहिन दृष्टिले केलाएका छन् । साथै, आफ्नो मातृभूमी छोडेर विदेशको यात्रामा निस्कॅंदा पल पल र पाइला पाइलामा देशको सम्झना, माया, मोह बल्झिरहने यथार्थ पनि यस कृतिले पाठकवर्गलाई प्रवाह गर्दछ । — जसले पाठकलाई केवल तथ्य मात्र होइन, अनुभूतिको गहिराइसम्म डुबाउँछ। अनि यात्रा केवल दूरीको नाप मात्र होइन भन्ने अनुभूति दिलाउँदै अमेरिका, युरोप, यू.कें, क्यानाडा, डोमिनिकन रिपब्लिका, सिङ्गापुर, थाइल्याण्ड, मलेसिया र चिन- भारतजस्ता देशहरूको कला, संस्कृति, भेष-भुषा र भाषालाई एक यात्रु–मनले कसरी टिप्छ, कसरी आत्मसात् गर्छ र अन्ततः शब्दमा रूपान्तरण गर्छ— त्यो सबै “मिसन” भित्र सजीव भएर बोलिरहेको छ।
लेखकः श्रीहरि के.सी.
यात्रा-संस्मरणात्मक निवन्ध कृति
‘मिसन’ ( दुवाकोटदेखि देश दुनियां )
