روايات طارق اللبيب

Call Directions Contact the business

روايات طارق اللبيب قصص وروايات سودانية من تاليف طارق اللبيب

14/12/2022

الحلقة 26 الاخيرة .
بقلم طارق اللبيب
بعد طلع خدر الصباح من البيت .. خلودي قعد يبكي .. زي كل يوم .. وقال ليهو سوقني معاك .. خدر حنسو .. وقال ليهو انا بعدين بجي بدري و بسوقك معاي .. وامشي افثحك ..
بعد طلع من البيت .. خالدة كانت في قلق شديد .. ومشت شالت قطعة الكرتونة الكتبت فيها الرقم بي فحمة .. وبقت تعاين للرقم ياربي الرقم ده حق منو ؟ .. ده ابدا مارقم هند .. رقم هند نهايتو 223
وده نهايتو 307.. ياربي هسي اتصل عليها؟ .. واقول ليها شنو؟ ولو خدر عرف؟ .. حيزعل مني .. وانا اهون لي اموت .. ولا خدر يزعل مني .. ياربي اسكت ..؟؟ مابقدر لكن ..
قالت انا لازم اتصل علي الرقم ده.. واشوفها دي منو؟ .. لكن ماهسي .. ياخبر النهار ده بفلوس .. بكرة يبقى ببلاش .. بس انا عندي يقين جووووة في قلبي .. انو خدر مستحيل يكون بخوني ماممكن .. والله لو ماسمعت بي اضاني وشفت بي عيني مابصدق ..
باختصار ياجماعة .. كانت خالدة عايشة في حالة من الاضطراب والتفكير .. قرب يجيب ليها انهيار عصبي .. هسي الان الزواج ده .. مرا عليهو قريب التلاتة شهور .. والامور كانت ماشة في افضل حال ..
اهااا .. تعال شوف الحل الليلة ..
في نفس اليوم ده جاها اتصال من هندوية قالت ليها ..قالت ليها ازييك يا خالدة .. والله انا زهجانة وقرفانة .. ومعتز حيطلع زي الساعة 11 .. ممكن يجيبني ليك.. ازورك في بيتك اصلا ماشفتو .. واتونس معاك لغاية المساء .. انتي ذاتك بتكوني قاعدة براك ..
قالت ليها جدا تعالي طوالي .. انا ذاتي نفســــــي اتكلم معاك ..
قالت ليها مالو صوتك ده كدا ياخالدة؟؟ .. خدر مقلبها معاك ولاشنو؟
قالت ليها ابدا والله.. مافي حاجة زي كدا .. انتي تعالي ونحكي امكن لمن اشوفك.. انعنش شوية ..
هند وصلت بره .. ودقت الباب .. وجات زهرة فتحت ليها .. طبعا" بتعرفها شديد .. قالت ليها زهرة؟؟؟؟.. انتي كيف ؟؟ ولسسسه مع خالدة؟
قالت ليها (ايوه انا ماما مابمشي منو. الا هو يقول امشي). قالت ليها ياسلام عليك ياوفيه .. وهي ماشة داخلة.. لاقتها خالدة قالت ليها .. مرحب هندوية .. هليتي ونورتي .. عاينو السماحة دي .. عان هند زينة البنوت .. ماشاء الله ..شكلك مرتااااحه يافلانة .. هند قالت ليها والله اخيرا استقريت ياخالده .. ومعتز يادوب عرف الله واحد ..وبقى شغال قدر قدرته .. وبمد رجلينو على قدر لحافو .. يعني الحمد لله عيشتنا بسيطة.. بس مستورة والله ..
خالدة قعدتها في الهول .. الكبير الجميل .. وكراسي الجلوس الماخمج .. والطرابيز الزجاجية المشجرة ..غايتو هند دي تعاين وتتعجب . لامن دايرة تجيها صدمة عصبية ..
وشغالة ماشاء الله تبارك الله .. تستاهلي ياخالدة .. قالو اي زول ربنا بديهو على قدر نيتو .. ربنا يسعدك ويزيدك ..
خالدة قالت ليها الله يبارك فيك يا هندوية.. اهم حاجة في الدنيا راحة البال يا حبيبتي .. البيوت والعفش مابتجيب السعادة .. في ناس قاعدين في عشة .. وعايشين في سعادة .. وفي ناس ساكنين القصور واهم اتعس الناس .. وقامت خالدة دخلت المطبخ عشان تجيب ليها حاجة لي هند تشربها ..
هند قعدت تتلفت في البيت.. طبعا لاول مرة .. تشوف بيت خدر وخالدة .. وبتقول جواها .. هسي انا كان صبرت و.. قبلت بي خدر بي فلسو الزمان .. كان ده يكون بيتي .. لكن طمعي وطمع امي .. وخالتي سمية ..
كانو السبب الله يسامحهم .. لكن ربنا قادر .. خالدة كانت راضية بي عبدو بي وضعو .. وحامدة وشاكرة .. حتى بعد مات كانت راضية وشاكره .. وربنا ابدا ماخذلها .. وعايشة زي الترتيب.. وهسي عان العز الجاها .. انا والله ماحاسداها .. والله تستاهل .. خالدة تستاهل .. لانها زولة طيبة من جوة .. انا الكنت كعبة .. لكن فهمت بعد فوات الاوان.. الحمد لله .. ان شاء الله ربنا يوفق معتز حبيبي .. وبعد الحال .. يبقى مليان بالقروش.. والبلزو مايرميهو ..
خالدة جات طالعة من المطبع على الهول .. لقتها سارحة .. قالت ليها هلا والله بي هندوية.. والله نورتي وشرفتي .. قالت ليها ربنا يزيد شرفك ياخالدة ..
قالت ليها .. اها ماقلتي لي كيف معتز معاك؟ .. قالت ليها والله معتز طيب .. لدرجة بعيدة .. لامن مرات بقول شخصيتو ضعيفة .. وزمان كان عندو طموحات مستحيلة.. يقول ليك انا عايز اكون من رجال الاعمال المعدودين في البلد دي .. ومرات يقول لي انا عايز اشتري قناة فضائية .. ومرات يقول لي انا عايز اعمل شركة اتصالات .. وانافس ناس زين وسوداني .. هههاايا ..
لكن هسي عرف الله واحد وبقى متواضع ..
خالدة قالت ليها كدا احسن .. الطموح الفايت الحد .. مرات بجيب الاحباط .. احسن الزول يطمح في حاجة ممكن ينالها بالطريق الصحيح .. و الغنى السريع وكتير ذاتو محسود ..
هند قالت ليها اها وانتي خدر كيف معاك؟ .. قالت ليها والله الحمد لله في امن وامان .. ونستو في البيت اغلبيتها مع خالد ..
خدر زول خجاااال ياهند .. كان داير يقول لي كلمة حلوة .. بقولها لي خلودي ..
قالت ليها كيف يعني؟؟ مافاهمة ..
قالت ليها مرات يكون عايز يقول لي كلام كلام حلو .. يقول لي خلودي .. يا خالد انا بحب زول شديد .. وبشتاق ليهو شديد.. ولمن اكون في الشغل اتمنى يكون معاي .. وبتمنى اني اشوفو في كل لحظة .. بتعرفو ده منو؟؟
خلووودي يقول ليهو اناااااا؟؟ يقول ليهو ايوة ياخلووودي ..
وهو بكون بعاين لي بي طرف عينو ..
قالت ليها والله ياخالدة ده احلا تعبير .. وبالمناسبة خدر اصلا مابخجل .. بعرفو انا .. بس بكون بحترمك وبقدرك انتي .. ومرات الاحترام الشديد بلجم اللسان من التعبير عن الاشواق .. بس انتي ابدي ليهو وبتلقيهو انداح ..
خالدة قالت ليها والله اتاريك فهاااامة يا انتي .. ياربي يكون كدا؟؟
بالاختصار الونسة كانت جميلة .. بس انا ماعايز اسمع ونسة الحريم كلها .. نمشي ..
خدر في مكان الشغل اتصل عليهو ابراهيم .. وقال ليهو تعال اتغدى معانا .. جاييني عادل حسين .. وعاطف بكري .. و منو منو كدا ماعارف ..
وانا ح اتصل على عبد المجيد صحبك يجينا برضو ..
قال ليهو حاضر ابشر ..
خدراتصل تلفون علي خالدة .. كيفك يا الغالية 😊 ..
قالت ليهو والله الحمد لله .. تمام.. انت كيف والشغل كيف .. ان شاء الله كلو في محلو ..
قال ليها كلو حاجة تمام بوجودك ...
قالت ليهو اتخيل الليلة المعاي منو ؟ اصلو ما بتتخيل قال ليها اها؟؟ منوووو؟؟
قالت ليهو هندووووويه .. والله ..
قال ليها ماشاء الله.. والله الليلة بختك تشبعي شمارات .. اها هي كيف صحتها عليك الله.. ؟؟ سلمي لي عليها .. قالت ليهو يبلغ ان شاء الله ..
شكلك عايز تقول لي كلام ..
قال ليها ايوة بس الليلة متغدي برة .. انا بتأخر شوية ..وانتي تتهني مع صاحبتك .. قالت ليهو بي سلامتك وخلي بالك من نفسك ..
طبعا ياجماعة خالدة عندها شك غير مؤكد انو الكانت بتتكلم مع خدر البارح هي هندوية .. وهسي جية هندوية ليها في البيت.. زادت الشكوك .. بقت تقول ياربي .. هند دي من يوم انا رحلت هنا.. ما جاتني .. يعني بعد تلفون البارح بالذات طوالي الليلة تجي؟؟ .. انا لازم الليلة احاول اتأكد منها .. قامت فاجأتها بي سؤال .. قالت ليها انتي ياهند؟ اخر مرة اتكلمتي مع خدر متين؟ .. قالت ليها والله مابتذكر ليه؟ ياهو يومنا الاتلاقينا كلنا في الاسكيلا .. تاني ماشفتو من اليوم داك ..
قالت ليها ولاتلفون؟ قالت ليها ابدا والله .. مالو؟
قالت ليها لالا مافي حاجة والله .. كنت عايزة اسألك اذا خدر ده صوتو اتغير ولا انا بتخيل ساي ..
قالت ليها ياخالدة عليك الله ماتجننيني .. انتي وضعك ماطبيعي .. وماعاجبني .. وخالد بقت تطشش ليها في الكلام .. وتقول ليها في كلام ما مرتب .. عشان هندوية ماتشك فيها .. انها متهماها بي خدر ولاشي ..
المهم يازول المساء .. معتز جا برة ودق البوري لي هند سايق اتوس حقة عمو .. هند ودعت خالده .. وطلعت.. وكان اجمل يوم واجمل ونسة .. بس خالدة كانت من جواها ما مرتاحة ..
بعد هند ومعتز فاتو خالدة تاني رجعت للتفكير .. وفكرت تفكير كتير
فكرت في خطة اولى .. تعرف بيها خدر ده بالليل بخش الغرفة يتكلم مع منو ؟
دخلت غرفتو.. وغيرت وضع الكراسي والسراير .. بحيث انو السرير البرقد فيهو خدر يكون قريب للشباك ..
وفتحت الشباك الفاتح على الهول.. فتحة بسيطة غير ملحوظة .. يعني الزول الواقف بي بره في الهول .ممكن يشوف الجوة بعمل في شنو .. ويسمعو بقول في شنو ؟؟
اها بعد المغرب بشوية كدا خدر جا .. اول من دخل وسلم عليها ..قال ليها عليك الله ياخالدة .. طلعي لي خلودي .. انا وعدتو اطلعو افسحو .. قالت ليهو والله ناااايم وتاني مابصحى بي هينة ..
قال ليها اها باكر من الصباح يقول لي انت ماقلت ح تطلعني..
قالت ليهو مامشكلة حبيبي .. طلعو مرة تانية ..
خالدة كانت كايسة ليها راس خيت تمسكو .. اثبات او براءة .. المهم ..
وسبحان الله على حظها الكويس .. الليلة خدر دخل الغرفة.. زي عادتوالكل مرة .. في الاسبوع بعملا مرتين تلاتة ..
اول من دخل .. هي قامت جات وقفت في الهول.. وبتعاين ليهو بي
فتحة الشباك الفتحتها قبل مايجي ..وهو ماجيب ليها خبر.. لقتو رسل رصيد من تلفونو لزول .. ورجع ليهو بالتلفون وقال ليهو اسمعي ياخالة .. انا رسلت ليك مصاريف الايتام .. بتاعة الشهر ده .. في نفس الرقم ده شوفيها لووصلت؟؟.. بس عايز اتاكد .. سكت مسافة .. وقال ليها خلاص تمام مع السلامة ..
تاني رسل رصيد .. واتصل .. الو السلام عليكم .. انا خدر كيف حالكم؟ .. انا رسلت ليكم المصاريف وصلت ؟؟ .. خلاص تمام .. عمل العملية دي تلات اواربعة مرات .. يعني رسل رصيد لاربعة جيهات ..
خالدة مشت طوالي .. خلتو شغال في شغلو ده ..يازول خالدة دي دخلت المطبخ بكت بكا .. لامن عيونها ديل اتورمن .. وبقت تقول بالله شوف .. انا بفكر في شنو؟ وخدر بعمل في شنو؟؟ ..
ياربي تغفر لي.. ياربي تغفر لي ..
قالت والله ما اسكت كان اقول ليهو الحقيقة .. والله كدا مابرتاح نفسيا" .. انا فعلا" ظالمة ..
بعد طلع .. قالت ليهو .. ياخدر انا عايزة اسألك سؤال .. انت امبارح طلعت بالليل مشيت وين؟.. قال ليها انتي صحيتي بي؟
قالت ليهو ايوة صاحية.. سامعة الزول الاتصل عليك وانت طلعت ..
قال ليها والله طلعتي داهية ياخالدة .. طيب ليه ماوريتيني؟؟ .
قالت ليهو عقلي الناقص .. طوالي فكرت بانك عملت ليك دريبات ..
كدي ولا كدا ..احكي لي وانا بتم ليك باقي الكلام ..
قال ليها انتي عيونك دي مورمة كدا.. شكلك كنتي بتبكي . قالت ليهو.. قلت ليك احكي يا حبيبي عليك الله ..
قال ليها معليش حبيبتي ..اعفيني .. ده شغل انا مصر انو يكون.. سر بيني وبين الله ..عليك الله ماتضغطي علي .. قالت ليهو بس كلمني انا وانا بكتم سرك .. قال ليها ماسمعتي بما انفق بيمينه مالاتعلم شماله ؟؟
لكن بحكي ليك عشان الشك من جواك يروح .. الطلعت ليها دي ياستي .. مراة مغلوب على امرها.. زوجها طافش سنين ..وخلا ليها طفلتين .. وانا اتكفلت بيهم .. والبارح البت الكبيرة تعبت عليها .. ومالقت البوديها الدكتور .. لانها هي بتخاف من الضلام .. والوقت كان اتاخر .. قالت لي تعال وديها لي المستشفى.. خايفاها تموت .. قلت ليها هسي هي كيف ؟
قالت لي احسن .. قلت ليها خلاص اصبري للصباح بجيك ..
بعد شوية البت تعبت زيادة .. وبقت تقطع في الزبد .. قامت تاني امها اتصلت علي تاني .. انا مشيت ليها شلناها زي الميتة .. وديناها المستشفى .. وادوها دربات .. لقينا عندها هبوط .. بس ادوها دربين وقامت زي الحصان .. وجبتهم راجعين البيت ..
خالده قالت ليهو ربي يحفظك يا حبيب قلبي .. وعليك الله تعفي لي .. والله انا ابليس لعب بي راسي لعب .. لامن نفسي انقطع .. حتى دخولك الاوضة ده شكيت فيهو .. بقيت لافة في البيت زي المجنونة ..
خدر قعد يضحك .. ويسكت وتاني يضحك ..وقال ليها عافي ليك يا خالدة.. مافرقت انتي في النهاية زوجتي.. ومن حقك تحافظي على بيتك .. وتتحسبي لاي غلط يحصل مني .. نحن مامعصومين من الغلط ... ولو لقيتيني في اي حاله .. ما ارضتك بس كلميني ..
انا ما متكبر .. وبسمع النصيحة وبحب التوجيه .. لكن انا بعد لقيتك انتي تاني محال افتش غيرك ..
خالدة قامت قعدت قدامو في الارض .. ومسكت في رجليهو وقالت ليهو والله انت نعمة من رب العالمين علي ..
ان شاء الله ربنا مايحرمني منك .. والله انا مابستاهل اكون خدامة ليك .. قام رفعها مت الارض .. وقال ليها لالا ..انت ملكتي واميرة حياتي ماتقولي كدا .. ومادام نحن مع ربنا.. ربنا ماحيفرقنا ..
ياسلاااااااااام .. يا خدر حسيب الله .. ربنا يكرمك ياخي .. ربنا يكثر من امثالك .. مثلك من الرجال هم الذين ينزل الله الرحمة بسببهم ..
اللهم احفظ خدر.. وكل من سار على نهج الصدق.. متل خدر ..
كم في الرجال جوهر .. متل الدهب والماس ..
كم من حريم رايعات .. كالشهدي والانناس ..
ياربي يا غفـــار .. اغســــلنا من ادناس..
طهر قلوبنا وزيد .. مافيها مــن اخلاص..
لكم التحايا والاجلال .. واسأل الله ان يلهمني واياكم الصدق في القول والعمل .. وان يقودنا الى البر .. وان ياخذ بنواصينا الى الخير
ويملا قلوبنا بالتسامح .. وخالص شكري لارواحكم التي تجولت
في رياض حروفي .. وسافرت معي في رحلة السعادة ..
محبكم طارق اللبيب ..

14/12/2022

25
بقلم طارق اللبيب
الناس في بيت ناس هند.. كانو في توتر شديد.. واكتر زول متوتر في الناس ديل ام هند.. لانها بتخاف من كلام الناس ..
يعني الزول الاسمو معتز ده .. اصلا لمن جا للمرة التانية.. بعد شرد ورجع .. كل اهل هند ماكانو موافقين.. بس هند وامها كانو الاقوى .. وقدرو سيطرو بي رايهم والموضوع مشى .. وهسي نظرات الناس الشمتانة بقت تقول كلام غير مسموع .. لكن مفهوم .كانهم بقولو . اها ياهندوية وامها ..خمن وصرن .. الراجل شرد تاني.. وخلاكن في بحر الاحزان .. تشربن ماترون ..
الناس بدو يتململو.. دايرين يطلعو .. بس في عربية وقفت بره .. ودخلو شباب زي تلاتة كدا .. والناس في بيت ناس هند كانو مالين الحتة ..
سلمو على الناس.. و قالو ليهم ياجماعة نحن اسفين.. والله نحن مرسلين ليكم من معتز .. نحن اولاد عمو .. وكنا نحن مستعدين كل الاسرة ونجيكم .. بس والدة معتز.. وقعت في الحمام.. وهسي في غيبوبة .. في المستشفى وانزعجنا انزعاج شديد .. ومعتز لمن وصل المستشفى.. اكتشف انو تلفونو في البيت.. وبدق في رقم هند عشان يكلمها . وهند تلفونها مقفول .. بس اظنو بدق غلط ..
لانو قال لينا.. انا الظاهر ماحافظ الرقم كويس .. لانو مستحيل تلفونها يكون مقفول .. والرقم مسجل في تلفونو في البيت .. المهم ياجماعة ..
معتز بعتزر ليكم عن الحضور.. لانو حصل ليهو ظرف خارج عن الارادة ..
وقال ليكم ان شاء الله مواعيدنا يوم الاتنين .. بنجي نتغدا معاكم .. اها هند عندها عمها زول متسلط وراجل ضو وكلمتو زي السيف .. قال لي الناس القاعدين اسمعو ياجماعة مافي زول يتحرك .. اسمع ياولد معتز ده هسي هناك جنبو تلفون ؟
قال ليهو نعم تلفون اخوهو الكبير ..
قال ليهو جيب الرقم .. ملاهو الرقم .. اتصل عليهو قال ليهو الف سلامة للوالدة .. معتز جنبك ؟ قال ليهو نعم يهودا هاك ليهو .
استلمو قال ليهو يامعتز .. سلام عليك.. اول حاجة الف سلامة على الوالدة .. نحن طبعا منتظرينكم من صلاة المغرب.. والناس دي كلها ملمومة ومكسرة راجياكم .. والماذون قاعد نعس لمن نام قاعد علي حيلو .. واولاد عمك يهديل وصلونا وكلمونا بالحاصل ..
لكن ياخوي .. نحن تاني مابنقدر نتلم يوم الاتنين.. نحن بنعقد ليك هسسسي .. ويوم الاتنين تعال سوق مراتك .. نحن بعد بنعقد جايين عليكم في المستشفى ..
معتز قال ليهو احسن ماعملت.. اتصرف ولاتشاور زول .. انا اديتك الاذن ..
عمها جا داخل قال ليهو يامولانا خلاص الزوج قال وافق على العقد .. اعقدو .. اعقد وخلاص .. ودعمو الجا بقى وكيل .. وعقدو ليهو وانتهى الموضوع على سلام ..
لغاية ماتم العقد .. والناس قعدو يباركو .. هند جوا قافلة الباب ماعندها خبر ..
امها دقت ليها الباب ..وهي تبكي .. ماعايزة تفتح الباب .. امها قالت ليها مبروك ياهندوية .. عقدو ليك مبروك يابتي ..
تمممم .. صوت البكا بتاع هندوية سكت .. زي التلفزيون الكهربتو قطعت . سيو كدا ههه
المهم الناس باركو .. واتناولو الكوكتيل .. وكل زول مشى على اهلو .. واكتر زول فرحان بالعقد ده خدر ونسرين . وخالدة طبعا" ..
خدر وهو طالع من ناس العقد .. وقبل مايجوهو ناس نسرين وعبدالمجيد .. اتكل على عربيتو كدا .. واتصل على خالدة .. وخالدة لسه جوة مع هند .. قال ليها مبروك على صاحبتك .. قالت ليهو الله يبارك فيك .. قال ليها ومبروك علينا نحن..
قالت ليهو الله يبارك فيك برضو .. لكن في حاجة مهمة لازم نعملا قبل مانخطو اي خطوة عشان ربنا يوفقنا ..
قال ليها اللهي شنو ؟ .. قالت ليهو عايزاك تطعم لي عشرة مساكين . عشان انا كنت حالفة .. قال ليها يعني غالبك الصيام ياجرسية.؟؟
قالت ليها يا ابو الفهيم الاطعام اول .. اذا الزول ما بستطيع الاطعام بعد داك الصيام .. (ود كلام صاح من خالدة طبعا") ..
قال ليها ممكن اتصل عليك بعدين اتونس معاك شوية .. ؟؟ قالت ليهو انا والله تعبانة ..وشكلي كدا بعد اصل البيت بي دقيقتين بنوم .. اصبر قدامنا ونسة كتيرة.. وحكاوي لا ليها اول ولا ليها اخر.. وعندي كلام كتير دايرة اقولو ليك .. بس انت شيل الصبر.. الحمد لله هانت ..
خدر ده ياجماعة بدون مبالغة.. لامن برجف من الفرحة.. وحاسي بانو الفرحة دي اكبر من طاقتو ..
اها نسرين طلعت وعبدالمجيد من جا من جوة .. وركبو مشو ..
مشو غشو ناس المستشفى .. والمراة ام معتز مازالت في غيبوبة .. ربنا يرفعها ان شاء الله .. خدر مشى البيت وماكلم ناس البيت بالتطورات..
باكر الصباح بدري وال*سيب وغالية وميمي .. (مدينة الصغيرة) قاعدين بشربو في الشاي .. خدر استغلا الفرصة وحكى ليهم قال ليهو يا ابوي امبارح بالليل تمت الموافقة ان شاء الله انا قدامي اسبوع س وبعقد على خالدة واجيبها بيتها .. امو دايرة تزغرد ..
قال ليها لالا ياحجة اصبري الله يرضى عليك .. الناس بجو هسي وانا عندي شغل قدر سبيب راسي ..
خدرجاب عمال وبعمل في اللمسات الاخيرة للبيت .. وخلاهو جاهز
لغاية البخور وملطفات الجو اشتراها ..
عادل حسين .. اتبرع بي شيلة من دبي وابراهيم اتبرع بالصالة
والامور مشت معاهو زي التقول في توصية عليهو .. وانا بقول دي الاستخارة سهلت الامور ..وكل العوارض بدت تتبخر وتزول معناها زواج خالدة فيهو خير كبير لي خدر.. وده الشي المفروض يحصل ..
طبعا ياجماعة الرؤيا الشافها خدر وفسرها ليهو الامام خدر اخد الموضوع بي جدية غريبة .. لكن هل الرؤيا دي هي حقيقية وكدا تفسيرها ؟ الله اعلم ..ولاتزال الرؤى والاحلام عبارة عن ظنون غير يقينية .. ولايستطيع الانسان ان يبني عليها احكاما" .. ولكن نقول انها رؤيا طيبة ان شاء الله .. ونتمنى ان تكون كما فسرها امام المسجد والله اعلم طبعا" .. (ده راي الكاتب)..
مرت عشرة ايام .. وطيلة الايام دي خدر ماقطع تلفونو من خالدة .. واتطورت المحبة تطور غريب .. والعرس كبس خلاص .. ولبنى جات وطلبت من زوجها يوديها لي خالدة في البيت .. ونسرين برضو مشت ليهم .. وهند .. وكل صديقاتها المقربات .. وبدو في تجهيزها للزواج بعد بكرة ..
ووالدة معتز في صحة وعافية والان في بيتها .. عملت لينا ربكة يوم العقد ساي غايتو ..
وخدر اصحابو عملو ليهة حنة في الصالة الشنو كدا ماعارف ..
والناس ديل وقفو معاهو وقفة غريبة .. حتى العمال شغالين في زواج خدر زي الكانو حقهم .. ومافي عامل اتخلف ..
ودي حاجة طبيعية الزول البزرع الخير لازم يحصد مازرع عاجلا ام اجلا" .. وخدر كان صادق .. والصدق يهدي الى البر والبر يهدي الى الجنة ..
عشان كدا ربنا هداهو للبر وكفالة اليتيم بي سبب صدقو في القول والوعد .. وبالتالي ياجماعة ان الكذب يهدي الى الفجور وان الفجور يهدي الى النار .. والكلام ده طبعا حديث عن سيدنا رسول الله صلى الله عليه وسلم . قال عليكم بالصدق فان الصدق يهدي الى البر وان البر يهدي الى الجنة ولا يزال الرجل يصدق ويتحرى الصدق حتى يكتب عند الله صديقا"
واياكم والكذب فان الكذب يهدي الى الفجور وانا الفجور يهدي الى النار ولايزال الرجل يكذب ويتحرى الكذب حتى يكتب عند الله كذابا"
صدق الرسول العظيم عليه الصلاة والسلام ..
وبحمد الله في يوم الجمعة يوم تم عقد القران بين خالدة وخدر ود حسيب .. تحت فرحة عظيمة .. وربنا تم ليهم المراد .. وكانت فرحة خدر بي كفالة الايتام لاتقل من فرحتو بي .. حصوله على خالدة ومستغرب كيف ربنا فتح قلبو وحباها حب عجيب .. ود كلو تسهيل للانسان الصادق الامين انو ربنا يديه فرصة لعمل الخير ..
خالدة نزلت في بيتها جيران ناس عالية .. وخدر اصرا انو زهرة الشغالة تنتقل معاهم .. وتواصل عملها في خدمة خالدة ..
بالنسبة للشغل الكان ماسكو خدر لي ابراهيم كان ماشي في امن وامان .. واتباعت زي عشرة مساكن وخدر كسب منها كسب كويس بيوت .. وفي سنة 2014 حصل هبوط في اسعار الاراضي بطريقة غريبة .. حاجة كدا مامبررة .. وخدر كان معاهو كاش اشترى 15 قطعة سكنية في منطقة في شرق النيل . وسبحان الله من قبل 50 سنة ماحصل هبوط في سعر الاراضي في السودان الا في السنة دي
وحتى التجار والراسماليين ماعارفين السبب .. بس كانت من حظ خدر .. ربنا داير يرفعو بي سبب الايتام .. وخدر فعلا حسة انو ارزاق الايتام دي مباركة .. وشعر بمعني الاية البتقول وما انفقتم من شي فهو يخلفه وهو خير الرازقين ..
بعد الزواج بي اسبوعين تلاتة .. يوم كان طالع الصباح .. عاين لي خالدة كدا لقاها مشرقة .. زي التقول الحيطان مضويات بي نورها ..
قال ليها ماشء الله تبارك الله والله الزول اصلو مايقول عندك طفلين .. قالت ليهو انت عارف خلودي بقى يقول ليك بابا .. خلاها عمووو.. ديك .. معناها انت ذاتك عندك طفلين ماتفرح كتير .. قال ليها ربنا يخليهم لي .. قالت ليهو ويخليك ليهم ولي انا ..
انا ياخدر عشت سنين من عمري من اسوء ايام حياتي .. والله لمن اتذكر ايامي مع عبدو .. وحات الله بخاف رغم انو ميت بتجيني خوفة .. وبدعي في صلواتي انو ربنا مايبتلي مسلمة بي واحد زي عبدو .. عبدو غرس جواي رعب مافي زول قدر يقلعو من جواي غيرك ياحبيب عمري .. خدر قال ليها عليك الله اكان ما زول ساطل
والبنقو ل*س مخو .. الجمال القدامي الزول بقدر ياذيهو بي كلمة شينة؟ خلي يمد ايدو عليهو .. لكن الفهم اقسام ولعنة الله على البنقو.. وربنا يرحمو ويغفر ليهو ..
عليك الله يا خالدة اعفي ليهو وسامحيهو الزول بقى في يد ربنا .. ومرت الايام جميلة جدا بينهم وكانت اروع مايمكن الانسان ان يتخيلو .. من السعادة الحاساها خالدة مع خدر .. والحاسيها خدر مع خالدة .. وعندهم كلمة بقولو الاتنين كلما خدر يجي طالع خالدة بتمسكو من يديهو الاتنين وبتقول ليهو ان شاء الله ربنا مايفرقنا ياخدر ..
وهو بقول ليها ان شاء الله ربنا مايفرقنا ..
بس زي ما بقولو من المحال دوام الحال .. والايام حبلى بالمحن ..
مع مرور الايام خالدة بدت تلاحظ على خدر حركات مريبه .. ومالاقيه ليها تفسير ..
مرات كتيرة خدر يدخل الاوضة بتاعتو بالليل ويقفلا بالمفتاح من جوة ويقعد جوة بالساعات .. وبتكلم في التلفون كلام براحة مامسموع ..
وكلام متقطع .. يتكلم كلمات بسيطة ..ويسكت قريب الخمسة دقايق .. وتاني يتكلم بسيط .. بس خالدة من بره ماعارفة خدر ده بتكلم مع منو؟؟ ولو كانت حاجة عديلة ليه داسيها منها؟؟ ..
لغاية ما جاء يوم الفاصلة .. والمشكلة الكبيرة .. وخدر عملها وااااضحة مادايرة تفسير ..
يوم من ذات الايام .. خالدة صحت نص الليل لقت خدر بتكلم مع واحدة بالوسوسة .. وبقول ليها انا تحت امرك .. هسي خالدة نايمة جنبي.. وماعايزها تصحى تسمعني .. باكر الصباح ارجعي لي بي تلفون انا بجيك .. باكر الصباح انا بجيك .. طبعا" خالدة .. خالدة عملت نايمة
وسامعة صوت البت الفي التلفون ضعيف وماواضح .. لانو بالسماعة الداخلية .. بس واضح انها بتتكلم بسرعة نفس الطريقة البتتكلم بيها هندوية .. خالده ماحسستو انها صاحية .
عشان تسألو اي سؤال .. ماعارف ليه ؟؟ خايفة من حقيقة معينة .. خايفة من تعكر الجو ... خايفة على السعادة الهي فيها تتلخبط ..
المهم قالت احسن انا ما استعجل... الامور براها بتتضح لي ..
خدر بعد خلص كلامو قفل الخط وعايز ينوم ..
بعد عشرة دقايق .. اتصلت البت تاني علي خدر .. واتكلمت مع خدر واظنها اصرت انها تلاقي خدر بالليل ده ..
خدر قال ليها تمام خير انا هسي بجيك .. بس لحظات .. خدر انسلا براااحة من السرير.. عشان خالدة ماتصحى.. وشال مفتاحو براحة عشان مايكشكش .. وطلع .. فتح الباب برااااحة .. وقفل الباب من برة .. ودور العربية وفات .. وخالدة قامت قعدت على حيلا ومستغربة .. ياربي معقول خدر ده يكون عندو دريبات جاي وجاي .. مستحيل ..
ياربي هل قسمتي كل ما اتزوج لي انسان طيب .. الايام تغيره ؟؟ خدر ده عندو علاقة مع منو ياربي ..و دي منو المشى ليها في الوقت ده يعني قريب الساعة 12 ..
والافكار بقت تمشي وتجيها واتضايقت .. وخافت خوف شديد انو يكون البتفكر فيهو صحيح .. وبقت مترددة تسألو ولا لا ..
المهم فضلت انها تكون مراقبة تحركاته عشان تتأكد في شنو بالضبط .. الزول ده طلع جا قريب الساعة 2 صباحا" براحة رقد
وقايل خالدة ماصحت شافتو ..
خالدة ظبطت زمن المكالمة كان الساعة 11:57 pm يعني اطناشر الا تلاته دقايق ..
اها باكر الصباح قالت ليهو خدر عليك اديني تلفونك ده لو سمحت دقيقتين ..
مدا ليها التلفون بدون مايقول ليها عايزة بيهو شنو؟ .. وهو كان بلبس .. دخلت المطبخ ..زي كانها دايرة تعمل مكالمة .. وفتحت سجل المكالمات الواردة في الزمن 11:57 ونقلت الرقم سريع بي فحمة
وجابت ليهو التلفون راجع.. زي الكانو مافي شي ..
ودي صراحه ياجماعة .بداية الانهيار في العلاقات الزوجية .. الخيانة .. الشكوك والتجسس .. عدم الثقة .. زعزعة الامان .. من اي جانب .. بس ماعارف هسي ..هل غلط من خالدة انها تتصرف كدا؟.. ولا ده من حقها كونها زوجته.؟
ولا الغلط اصلا بداهو خدر بالخيانة ؟؟تفكروا الغلط بدا من وين ؟ من خدر؟ ولا من خالدة .. ولا الاتنين مشتركين ؟؟.. االله يجيب العواقب سليمة ..

14/12/2022

24
بقلم طارق اللبيب
هند نوت على موضوع عجيب جدا .. وما متوقع .. نوت انها ..
تمشي لي خالدة تقول ليها انا خليت خدر .. وتحنسها انها تقبل بيهو .. وخلاص نوت النية الطيبة .. وبدت تغير في افكارها السوداء ..
في لحظة كدا هند سمعت طق كواريك في الحلة.. قالو في شافع غرق .. والناس ديل كلهم مرقو عليهو.. وهند طلعت مع الناس .. الولد كان ولد صاحبتها عمرو 13 سنة .. واثر في الناس تاثير شديد خلاص .. تلات يوم الناس ديل كايسين للولد .. وهند كانت قاعدة في بيت ناس العزاء لغاية ما اتلقى الولد.. قالو قبضوهو قريب البسابير ..
هند رجعت البيت تالت يوم .. اول ما وصلت البيت جاها تلفون ..
الو قالت ليهو مرحبا معاي منو؟ قال ليها انا معتز ياهند .. انا معتز ..
قالت ليهو معتز؟؟ انت متاكد انت متعتز؟؟؟؟؟
انت وين يامعتز؟؟ قال ليها انا جيت السودان ..
وسلمت نفسي .. لانو اعمامي رسلو لي قالو لي تعال عايزين نعمل تسوية .. مع الناس الطالبين منك قروش .. ياهند والله انا مظلوم .. الناس الكانو شغالين معاي هم الغدرو بي.. وكتبو المستندات بي اسمي .. انا محتاج ليك تقيفي معاي حبيبتي ..
ومعتز المسكين ماعارف انها طلقتو بالمحكمة ..
قالت ليهو طيب انت ليه مابتتصل علي؟؟ .. ولمن تتكلم معاي كلمتين تقفل مني الخط .. ليه ليه ؟؟؟ .. قال ليها لاني مراقب من البوليس الدولي ياهند .. ما بقدر اتكلم بي راحتي .. انا امي مابقدر اتكلم معاها .. انا كل يوم بتعذب بي شوقك وفراقك .. وحاسي بيك وبي معاناتك بي وراي .. ياريت تعفي لي وان شاء الله اموري تتحلا واعوضك عن كل لحظة راحت منا في السنوات دي ..
طبعا" هندوية مبهوتة بهتان غريب .. فرحت وخافت وارتبكت .. وماكانت متوقعة ابدا" انها تسمع بي صوتو قريب لانو قالو مطالب 3 ميار .. ومستحيل يقدر يسددها ..
طبعا فرحت انها اخيرا ح تلقا ليها راجل تتلم عليهو .. وخافت لانو معتز ماعارف انها اطلقت منو.. وارتبكت وامورها اتلخبطت فوق تحت .. لكن في النهاية استقرت انها تقيف معاهو سواء .. رجع ليها ولالا..
قالت ليهو هسي انت وين؟ .. قال ليها انا في سجن ام درمان .. لي يومين .. قالت ليهو انا بكرة الصباح بجيك .. وفعلا الصباح مشت ليهو .. وباعتبار انها زوجته دخلوها ليهو في غرفة براهو .. ولقتو ليك شكلو ذاتو اتغير من الطشيش والمطارده .. سلم عليها بالاحضان .. وهي طبعا" جسمها كاشي .. لانها عارفة روحها مطلقة .. وماعايزة تقول ليهو هسي .. وهو يسلم وماسك يديها الاتنين وبقول ليها عليك الله تعفي لي ..
قالت ليهو انت ذاتك اعفي لي .. قال ليها اعفي ليك في شنو؟
قالت ليهو امي وخالاتي ضغطوني يامعتز .. اطلب الطلاق بالمحكمة وقالو لي تاني معتز مابجي .. وانت وكت ابت تتصل علي وتفهمني حاجة طاوعتهم واطلقت بالمحكمة .. لكن يامعز مافي اي مشكلة مادام جيت .. انا ماعندي غيرك الموضوع ما مهم شديد المهم انت تطلع من الانت فيهو وانا زي ما انتظرتك ..و رفضت اي زول اتقدم لي ..
اهو ربنا رحمني وجابك لي راجع .. لكن بالجد ندمانة على التصرف ده ياريت تسامحني ..
قال ليها مسامحك حبيبتي انتي اصلا معذورة ده قدرنا كدا .. وانا فعلا كنت شغال بون تحسب .. وكل شي يرجع ماتندمي انا جيتك ..
بس الحمد لله اعمامي اتكلمو مع السعودي.. واتنازل ليهم من تلتي المبلغ المطلوب .. واعمامي دفعوليهو .. وهسي اعمامي شغالين جلسات مع الناس وبسددو ليهم في الديون.. واساسا مافضل كتير ..
بس في واحد عايز مننا 120 مليون حالف ماينقص تعريفة ..
لكن صراحة بقية الناس اتعاملوالناس اتعاملو معانا كويس .. الحمد لله يا هند ان شاء الله هانت وح نبدا حياتنا بالصدق .. وعمي طبعا" مورد حديد .. وقال ح يمسكني الشغل يعني ان شاء الله امورنا تاني ح تتسهل بس ربنا يفكنا من الزول ده ..اسمو الفاتح هارون .. وزول معصلج عصلجة شديدة خلاص قال معتز كان عفن في السجن ما بنقص ليهو جنيه ..
المهم اطمأنت عليهو ورجعت البيت وابت تكلم امها بالموضوع لانها خايفة تدق ليها جرس وتقيف في طريقها تاني ..
قالت مافي زول بديني الراي السديد الا خالدة انا امشي ليها ومرة واحدة اثبت لي سلامة النية واقول ليها خليت ليك خدر ان شاء الله بخيت وسعيد عليك .. هههه
خالدة طبعا استخارت قبل 4 يوم وما اتوصلت لاي قرار وبقت ساكتة .... اها باكر الصباح كدا .. خالدة بابها دقه .. الكلام ده بعدقبل الفطور تاني يوم من زيارة هند لي معتز .. مشت خالدة فتحت الباب لقتها دي هندوية ..
سلمت عليها وقعدت .. قالت ليها ياخالدة انا عارفة انك كارهاني ومتضايقة مني .. لكن انا جيتك في موضوع ضروري شديد .. قالت ليها قولي .. قالت ليها انا اول حاجة عايزة اكون اختك ..
وصديقتك.. وبعتذر ليك عن كل اخطائي .. خالدة قالت ليها العفو يا هند .. والله ماشايلة في قلبي ليك الا الخير ..
هند قالت ليها وطالبة منك طلب تاني وبانية كل امالي تلبيهو لي .. لو خدر اتقدم ليك ماترفضيهو عشاني انا .. لاني انا خلاص راجلي جا وح ياخالدة .. معتز جا يا خالدة احمد الله ..ارجع ليهو .. وخدر انا تاني لو بقى اخر راجل في الدنيا ماعايزاهو.. ولو بقى عايز يموت دواهو في هند تاني مافي ليهو ..
خالدة قعدت تضحك قالت ليها .. وقالت ليها دقيقة يا هند ..
ما تزحميني بالكلام .. انتي برضو بتغشي علي انو راجلك جا ..عشان قنعتي من خدر صح؟؟
قالت ليها ابدا والله معتز جا.. وانا مشيت ليهو امبارح في السجن .. وباقي عليهو قروش بسيطة وحاصل حاصل ..
خالدة صدقتها طبعا وقالت ليها اول حاجة حمدلله على سلامتو ياهند ان شاء الله ربنا يفك كربتو .. موضوع خدر هسي خليهو ..
قالت ليها انا اساسا" جيتك عشان الموضوع ده .. اولا دايرة ابشرك بي جية معتز..
وجاياك توعديني انك تقبلي بي خدر .. لانو انا خدر اتصل علي وقال لي انو يا اما يتزوجك انتي يا انو ح يقعد عزابي لي يوم الدين .. وانا عاهدت نفسي اني ح اقيف معاهو عشان كدا .. ومن نويت النية الطيبة جاتني البشارة بي معتز .. ماعايزاك تخذليني .. ههههه اها شفتي العكس ده كيف ياخالدة .. والدنيا دي كيف غريبة؟؟
اول رسلتك ليهو تقنعيهو لي .. هسي انا جاية اقنعك انتي ليهو هو ..قالت ليها انا اساسا يا هند خدر ما رافضاهو خصوصا انو اولادي متعلقين بيهو وخالد ولدي روحو معلقة في خدر .. هند قالت ليها وانتي ذاتك بقت روحك معلقة فيهو اعترفي ..
قالت ليها النصيحة لله صاح والله .. قالت ليها خلاص بس في حاجتين حبيبتي .. اناعايزاك تكلمي خدر يساعدنا .. ويساعد معتز ..هو زول ماشاء الله شغلو واسع .. بس ان شاء الله يساهم معانا عشان خدر يطلع من الزنقة دي ..
قالت ليها الحقيقة يا هند انا مابقدر اقول ليهو .. كدا لكن بوعدك اتصرف ..
هند قالت ليها طيب ياخالدة انا لسع ماكلمت امي.. وخايفة اكلمها تقيف في طريقي ..وانا والله عايزة معتز باي طريقة ده راجل عرفتو وعشت معاهو اربعة شهور ..
اها انتي رايك شنو؟ اكلمها ولا اصبر؟ .. خالدة قالت ليها اصبري .. لغاية ما مشكلتو تتحلا ويجي براهو في البيت ..
طبعا هناك خدر مشى لي ناس نسرين .. وحكا ليهم كل الحاصل بينو وبين خالدة .. وانو خالدة رافضة رفض شديد .. والسبب هندوية ..
ونسرين كانت كايسة لي وقت.. تركب تجي لي لي خالدة تتكلم معاها .. كويس ..
قبل زواج لبنى بي تلاتة ايام .. نسرين ركبت وجات لي خالدة في البيت .. وعايزة تبذل مجهود تقنعها باي اسلوب ..
اها لمن جات خالدة فاجأتها بالتطورات الحصلت.. وطليق هندوية الجا السودان.. وهسي موجود في السجن وكدا .. وقالت ليها على كل انا خلاص اقتنعت بي خدر ومافي مشكلة .. بس المفروض نحن نقيف مع هندوية.. في محنتها دي البت دي مسكينة يا نسرين ..
نسرين قالت ليها ياشيخة بلا مسكينة بلاغم .. عليك الله سيبي المسكنة والعباطة الانتي فيها دي.. واكسبي زمنك ..
قالت ليها انتي موش هدفك انو انا وخدر نتلم.. على كتاب الله وسنة رسوله ؟؟وانا اكون سعيدة ومطمئنة ؟؟ انا ما بطمن الا بعد اطمن على هند .. انا سامحتها .. ونسيت كل الحصل منها.. ولازم اكون صادقة في كلامي اني اقيف معاها .. اقل حاجة ممكن اعملا .. اني ما ح اعمل موضوع زواج هسي.. قبل ماهي ترجع بيتها وتستقر ..
بي اختصار ..
نسرين مشت اتصلت حكت لي خدر التطورات..
خدر ده من الفرحة بالخبر اتبرع بي 3مليون للعمال .. قسمها ليهم ..
ورجع لي نسرين قال ليها موضوع راجلها ده ساهل.. انا لو بعت ليهو القدامي والوراي بفكو من الحبس .. ويرجع ليها .. موش عشانها هي ولا عشانو هو .. بس عشان خالدة .. لانهم واقفين عوارض في طريقنا ..مرت الايام وخالدة جات في زواج لبنى من الصباح .. لابسة احسن لبس الحشمة والجمال .. وسايقة اولادها ..وكانت حدث في المناسبة
وعمك حسيب شافها .. وقال لي خدر والله فعلا ابن فتله .. وما ممكن تقع فوق حاجة ساهلة ..
وانا لو ماعارف الرؤيا المنامية.. كان شكيت في نيتك في كفالة الايتام ..
اها يازووول الحمد لله الزواج انتهى .. في امن وامان .. ولبنى مشت بيت راجلها .. وخدر اتفرغ لي قصة معتز طليق هندوية .. كويس؟؟؟
بعد يومين اتصل على هندوية.. قال ليها انا ونسرين وعبدو جايين عليك اطلعي لينا في الزلط ..
وركبو التلاتة ومشو حلة حمد .. ساقو هند من الشارع ومشو وين؟
مشو السجن بتاع ام درمان زيارة لي معتز .. وهند عرفتو بيهم انو ديل اقرب اصحاب ليها .. ومستعدين للتضحية والمساعدة ..
ومعتز اتكيف من خدر جدا".. وحس انو الزول فيهو شهامة غير عادية.. وبدا يحكي ليهو في الحاصل .. المهم وراهو الزول المعصلج الاسمو الفاتح هارون .. خدر قال ليهو شغال في مجال شنو الزول ده؟؟
قال ليهو مورد لساتك سيارات قال ليهو والله ده الا نسأل منو ناس ابراهيم وعادل حسين .. انا ما سمعت بيهو .. لكن الموضوع ده خلو علي .. لو ربنا مطلعك الجمعة الجاية دي بتعديها في البيت..
وفعلا خدر سكه الموضوع .. ومشى لي ناس ابراهيم وعادل وحكى ليهم الحاصل كلو .. وقفو معاهو وقفة رجل واحد .. ومشو للفاتح في بيتو .. والفاتح هارون لمن شاف ابراهيم .. اندهش .. لانو ابراهيم زول مشهور في مجال الاعمال ..
وقال ليهم ياجماعة انا والله زيارتكم عندي تساوي 120 مليار خلي مليون .. والزول الفطيسة الفي السجن ده.. انا مابكسر خاطر رجال زيكم عشانو.. البتسووهو انا قبلان .. غايتو كل واحد كتب ليهو شيك .. وادوهو ليهو .. ماقدر قروشو لكن المهم مساهمة كبيرة ماساهلة .. لكن بالجد ماعارفها كم 😊
قال ليهم خلاص انا بنتظر اهله واشوفهم البدفعوها يدفعوها وبفكو ليهم .. اصلو قالو مافضل زول غيري الناس كلهم فطسوهم واقنعوهم .. وانا ابيت والله كان ما انتو .. لو مات في السجن مايمرق الكلب ..
المهم بعد يومين من الكلام ده .. خالدة سمعت انو راجل هند جا في البيت .. وقال عايز مراتو يرجعها وقالو يوم الجمعة الجاية .. جايب اهلو ووجاي يسوق مرتو ..
ضربت كلمت نسرين بالخبر .. ونسرين فرحت فرح شديد .. وطوالي ضربت لي خدر .. قالت ليهو والله يا الفره امورك اتسهلت .. وماشة معاك باسطة ..
خالدة اتصلت اتصلت علي ياخدر فرحانة قالت هند ح ترجع لي راجلها يوم الجمعة .. ومامعروفة خالدة فرحانة لي هند .. ولافرحانة بيك انت ؟ خدر يتبسم يازول يتبسم فرحااان .. وخلاص ماعندو اي مشكله تقيف ليهو في طريقو بعد كدا .. لكن ياترى هل كل شي ماشي على مايرام؟
الحصل الغير متوقع ابدا" انو يوم الجمعة معتز خلف موعدو وماجا لي ناس هند .. والناس كلهم منتظرين .. هند واهلها واعماما .. وخيلانها واصحاب ابوها .. واصحابا هي .. نسرين وخالدة بي اولادها .. وكل الناس .. لغاية الساعة عشرة بالليل معتز ماجا وتلفونو مقفول .. وهند دخلت على غرفتها وخلت الناس برة وقفلت عليها الاوضة .. شوف بالله العوارض دي .. ربنا كريم ..

Address

Al Khartum Bahri
249

Telephone

0911900219

Website

Alerts

Be the first to know and let us send you an email when روايات طارق اللبيب posts news and promotions. Your email address will not be used for any other purpose, and you can unsubscribe at any time.

Contact The Business

Send a message to روايات طارق اللبيب:

Shortcuts

Share

Category