22/10/2020
معتقلي اللاماب ومفارقات العدالة :
يوم 25 الجاي حتكون جلسة النطق بالحكم في قضية أخوانا الشرفاء ؛ في الجلسة دي لازم كلنا نقيف معاهم ونساند أهاليهم ، كلنا لازم نكون حضور في الوقفة التضامنية الأخيرة، الحيتحدد فيها مصير الثوار الشرفاء أبناء اللاماب المعتقلين.
شباب اللاماب ديل إعتقلوهم بعد 4 يوم فقط من فض الاعتصام، يعني تقريباً يوم 7 يونيو، ومن اللحظه ديك ما فكوهم.
تخيلوا بس وقت الشوارع مقفله والبلد كلها مترّسه، شرطة المباحث بكل الاجتهاد الفي الدنيا تقبض حوالي 11 شاب وتعذبهم وتحقق معاهم بتهمة إنو قتلوا عسكري دعم سريع، ما بنقول إنو دا ما شغلهم طبعاً، لكن بنقول إنو فض الاعتصام والأيام البعديها كمية الضرب والتعذيب والاغتصاب والقتل والحرق والغرق الحصل بسبب ميليشيات الدعم السريع، و الكان واضح تماماً قدام عيون العالم كلو هو منو الجاني بالضبط! ومنو الغلطان، كيف دا كلو يمر ساي بدون حساب وبدون توجيه اتهامات واضحه ؟!
هل قوات الشرطه والمباحث والنيابات إجتهدت في مسألة فتح البلاغات، أو اتفاعلت في إنو تعمل تحقيقات جِديّه في الموضوع دا؟
خليك من مجالس التحقيق الكلنا عارفين آخرتها شنو...
في النهايه نحن بنطالب بتحقيق العداله تجاه أولاد حلتنا، و برضو بنطالب إنو أي انتهاك حصل لمواطن سوداني من قوات الدعم السريع يكون فيهو بلاغات ومحاسبات بنفس الجدية والاجتهاد والسرعه الحصلت في بلاغات الثوار ديل .
لجنة مقاومة اللاماب ناصر
مكتب الإعلام
