31/08/2021
سيد اللبن
الحلقة 1
بعد العصر مباشرة يكون قد وصل أطراف الحلة ويبدأ جولته اليومية .
شاب ورث المهنة ولقبها وأدواتها من والده الذي كبر على اللف .. فتقاعد مثابرا ومراقبا لأبقاره في الخلاء .. يبدأون الحلب هو وأخوته من بعد الظهر مباشرة ويعبون ( التمن ) ثم يوزعها على أولاده الثلاث كل له حماره وله حي يختص به ..كلهم أكتفوا من التعليم الابتدائي فقط .. يطرق الأبواب بعصاته مناديا النداء المألوف ..
لبن .... لبن ,,, لبن ..
ويمر بالبيوت مبتدئا من أولها .. بعضهم يسبقونه أنتظارا أمام الباب يحملون أوعيتهم . رجال ونساء وأطفال .. بمختلف طبائعهم وأعمارهم وثقافتهم . بعضهم يمازحه وبعضهم يعامله بجلافة .. أما هو فلم تكن ابتسامته تفارق محياه أبدا وأسنانه البيضاء التي تفوق لبنه بياضا ..وشعره الأجعد الفاحم السواد الذي يكمل وسامته .. وملابسه التي يجتهد في أن تكون نضيفة قدر استطاعته .. صفات كثيرة أكسبته ميزة ومحبة عند أهل الحي ..
مرة من المرات في إحدى جولاته وهو واقف أمام أحد البيوت . طفل صغير يناديه ..
- يا عمو .. يا سيد اللبن .. يا عمو .. يا سيد اللبن .
التفت ناحيته وجده طفل في السابعة أو الثامنة من عمره يرتدي شورط قصير وفنلة رياضية وجزمة وشراب .. لا يشبه أطفال الحي ( شكلا ومضمونا ) عطفا على عبارة ( يا عمو ) ..
- أيواا يا كابتن يافالح ..
- ممكن تجي تبيع لينا حليب في بيتنا ؟
- جدا يا حبيب أبيع ليكم حليب أها وأنتو ساكنين وين .
- في البيت داك الجمب البقالة ..
- في البيت السمح الجمب عمود النور داك؟ .. أنتو رحلتوا جداد في الحلة دي ؟.
- أيوة لينا يومين
- جايين من وين؟ ..
تقاطعه الزبونة التي يقف أمام بيتها
- شنو يا أدروب هههههه يدي وجعتني من الحلة ما تبايعنا بعدين تشوف زبائنك الجداد . ههههه جنس خفه
- ما تصبري يا سناء بس نعرف بيتهم وين .
- ما قال ليك جمب البقالة .ولآ انتو الا يقولوا ليكم جمب الدكان عشان تفهموا .. تطول في المواضيع مالك ولا لقيت الولد السمح دا أها طوالي نسيتنا اهاهاهاهاها.
- أستغفر الله أنتي جنك دا أصلوا ما تخليهو ابدا .. دقيقة يا كابتن أتخارج من الكفوة دي وأرجع ليك .أها كبيت ليك رطلين وباقي ليك رطلين ..هاك ليهم هاتي القروش يلا أقطعي وشك دا قبل ما تقطعي رزقنا .
- اليلة رزقك بقا جايي بالستلايت ؟. هاهاهاها .
- يلا أدخلي بيتك ستا لايت في عينك ..... ستالايت دا شنو كمان .؟
يلا يا كابتن أرح نمشي على بيتكم .
- وناس عبد الغفار وعم عمر ما حا تبيع ليهم ؟.
- يا بت ما تختيني أنت مش أخدتي لبنك مالك ومال الناس يلا أقفلي بابك دا وانكشحي
ذهب سيد اللبن بصحبة الضيف بعد أن جر حمارته من رسنها ..
- أنتو جايين من وين ؟.
- نحن جايين من الخرطوم . أبوي ضابط اداري نقلوه هنا ونحن رحلنا معاهو .
- يلا أمشي قدامي عشان تحضروا ماعونكم .
وجرى الطفل متحمس .. ومعتبرا هذا إنجازا أولا يحققه من أول سكنتهم بهذا الحي بعد أن جر سيد اللبن مغيرا سير تحركه ليعود ويبدأ من بيتهم من جديد .
وقف سيد اللبن بحماره أمام البوابة الفارهة منتظرا خروج أحد أفراد زبائنه .. فتح الباب ...
وطل منه بدرا فج السحاب طالع . بصحبة الصغير ,.
فقر فاه ينظر إليها باندهاش حاملا أناء التعبئة .
سيد اللبن ؟ يا سيد اللبن ...سيد اللبن .. عووووووك سيد اللبن
الي اللقاء
ههههههههه غايتو جنس حاله الله يكون في العون
