17/05/2026
Waxaan u soo ambabbaxay Nairobi, anigoo wata warbixintaydii natiijada shirka Carte, Madaxweyne Moi ayaan ballan aan ku arko ka codsaday, maalmo ayey qaadatay ballantaasi.
Galab dambe ayuu ii yeeray Madaxweynuhu, waxaa la joogay madaxa Nabad Sugidda dalka Brig. Wilson Boinett. Salaan kaddib, wuxuu igu bilaabay warkaagii waa kaa soo horreeyey ee bal ii waran?
Si niyad ah oo xamaasad leh ayaan wixii shirku ku dhammaaday uga warramay, waxaan ku iri, "Madaxweyne, shirku muhiim ayuu ahaa, dowlad Soomaaliyeed ayaa ka dhalatay, Khudbadaadiina shirka waan ka jeediyey, waana la soodhaweeyey, aad ayaa Soomaalidii ugu faraxday fariinteenna. Hadda waxa keliya ee inoo yaalla waa in aan garab istaagno Dowladda cusub ee Soomaaliya loo dhisay."
Madaxweyne Moi wuu yara muusooday, qosol xoogaa iska keen ah ayuu i tusay, waxaana iiga muuqatay in uu hayo xog ka duwan tii aan u sheegay. Intuu hal mar indhaha galka ka bixiyey ayuu hadal guntan oo is haysta wuxuu ku yiri, "laakiin, waxaa la ii sheegay meesha in ay ka dhisantay dowlad Islaami ah oo khatar ku noqon karta gobolka."
Waxaan ku iri, "Madaxweyne dadka Dowladda dhistay waa dad Islaam an, waajibaadkeennu waa inaan dowladaasi garab siinno sida fariintaadii ad ii dhiibtay ay ahayd."
Intuu mar kale indhihii yaryareeyey isagoo aad u muujinaya in uu ka caraysan yahay waxa aan u sheegayo ayuu yiri, "be careful", ka taxadar arrintaan. Ra'iisalwasaaraha Itoobiya ma taageerayo natiijada shirka Carte, wuxuuna iiga warbixiyey waxa meesha ka dhacay oo ah xog ka duwan tii nan gudbinayey.
B 61aad, 62aad.
