03/09/2026
#အဲဒီငန်းဟာငန်းတကာတို့ရဲ့ဘုရားသခင်လို..
အဝေးက အဖေ့အကြောင်း ဖုန်းဝင်လာပြီး၊
နှင်းမုန်တိုင်းကြောင့် မနက်ဖြန် ဖလိုက်တွေအကုန် ကန်ဆယ်ဖြစ်ပြီး၊
ငါတို့နှစ်ယောက်ကြား မပြောလိုက်ရတဲ့ နောက်ဆုံးစကားတွေ ဒီတိုင်း ကျန်နေခဲ့ပြီး၊
ရင်ခွဲရုံမှာ ကလီစာတွေ နှုတ်သိမ်းပြီး၊
အလောင်းကို ရေခဲတိုက်ကနေထုတ်ယူ မီးသင်္ဂြုလ်ပြီး၊
ပြာအိုးကို ငါ့အိမ်ရှေ့အရောက် စာတိုက်ကနေ ပို့လာပြီး၊
ဘရွတ်ခ်လင်မှာ သူ့အတွက် ရက်လည်လုပ်ပြီး၊
ငါ့ကိုယ်ငါ ပြောလိုက်တယ်၊ ငါငှက်တွေကို ကြွေးချင်တယ်။ ငါငှက်တွေကို ပေါင်မုန့်ကြွေးချင်တယ်။ ငါ ပန်းခြံထဲက ငှက်တွေကို ပေါင်မုန့်ကြွေးချင်တယ်။
ရေကန်နဲ့ စစ်ပွဲအမှတ်တရအဆောက်အအုံဘေးက ပတ်လျှောက်ပြီး၊
ခြေတလှမ်းလှမ်းတိုင်း တခု တွေ့နေရတဲ့ ငန်းစာမကြွေးပါနဲ့ဆိုတဲ့ ဆိုင်းဘုတ်တွေကို ဖြတ်လာပြီး၊
အဲဒီငန်းဟာ ငန်းတကာတို့ရဲ့ဘုရားသခင်လို ရေထဲက ရုန်းထလာပြီး၊
အဲဒီငန်းဟာ ငန်းတကာတို့ရဲ့ငရဲကလာတဲ့ မိစ္ဆာလို အော်မြည်ပြီး၊
အဲဒီငန်းဟာ ငန်းတွေထက်သေးငယ်တဲ့ သတ္တဝါတွေ ကျဲဖြန့်လိုက်ပြီး၊
မာကြောတဲ့နှုတ်သီး၊ ရိုင်းကြမ်းတဲ့ပါးစပ်နဲ့ ငါ့လက်ကပေါင်မုန့်ကို သုတ်ယူသွားပြီး၊
ငါ့ခေါင်းထဲမှာ တိတ်ဆိတ်သွားတော့တယ်၊ ဝင်္ကပါတွေထဲ လမ်းပျောက်နေတဲ့ ကွယ်လွန်သူတွေဆီက
ပွက်လောရိုက်နေတဲ့အသံလည်း မရှိတော့၊ ဝမ်းနည်းစကားဆိုနေတဲ့ ခြင်တွေရဲ့ တဝီဝီမြည်သံလည်း မရှိတော့၊
ငါ့ရဲ့ လက်ဗလာထဲ နောက်တကြိမ်တင်မြှောက်ထားတဲ့ ပေါင်မုန့်ပဲရှိတော့တယ်
လောကနဲ့ ငါ စစ်ပြေငြိမ်းလိုက်တဲ့အထိမ်းအမှတ်စားပွဲပေါ်က နွေးနေတဲ့ပေါင်မုန့်သာ ရှိတော့တယ်။
Martin Espada ရဲ့ After the Goose the Rose like the God of Geese ပါ
မိုးဆတ်၂၀၂၁ မှာ ပြန်ပြီး ၂၀၂၆ မှာ နည်းနည်းပြင်ပါတယ်။
