13/08/2022
مازلــــــــــــــــت باطــــــــــــــــــي ** و مازال ريحي ما بغاش يواطي
مازال بيدي الحلّ ** ومازلت كل اللي يربطوه انحلّ
ومازلت زي الصقر كيف انطلّ ** لين تنكسر تركع عيون الواطي
ومازال صوتي كي فحل البلّ ** يهدر يعاند قوّة الشوّاطي
يا صاحبي حيران ما تقدر اتطول فحل ** غير تو تمشي بالقفا الأوقاتي
ويمكن تشوف الفار هاجم صل ** والجيد باسم اللايشين يهاتي
ويا صاحبي شقلب كيان الكلّ ** نخاف نتكلم تنجرح لهاتي
وبيغاذ يطفح فاض كان انزّل ** قادر يسويها جبل وشاطي
وزيّك سكني في الجواجي غلّ ** والغل يسكن كان راجل عاتي
باقي العلوجة الساكنه في الظلّ ** كلاب ضالّه تدغر على الملفاتي
ومازلت باطي ومازال ريحي مابغاش يواطي ……….
*****
مازال ماضي حدّي ** ومازلت واقف عل قوايم قدّي
ومازال ريحي ما بغاش يهدّي ** يعصف ويسوي العالية بالواطي
ومازال بحري فاض موجه يدّي ** لا فيه مرسى ولا عليه شواطي
ومازلت نرزم بالقوافي نسدّي ** نثبّت وحاكم غرزتي ورباطي
ومازلت في الميعاد فايح ندّي ** دلالات في صمّ الحجر بصماتي
ومازلت من سوق البلي متعدّي ** صيود الوغي تجفل تهاب عياطي
أنا من سلالة بو جبين مندّي ** اللى لغير ربي لا ركع لا يطاطي
حني من كسب لشقر وليه تجدّي ** رجال تنكسر تركع قداه تواطي
ومازلت باطي ومازال ريحي مابغاش يواطي …….
*****
ومازلت في الأبعاد ** ومازلت نقطع واد نلقى واد
ومازال بي يميعد الميعاد ** وحتى الصدق في غيبتي متواطي
وعودي قدي دخن برد سواد ** سواد من لهايب شاعلاله واطي
ومهري شرد وتقطعت الأمراد ** وميّحت زادي طاح من مخلاتي
والأيام حكمت ع الكبير إنقاد ** والأيام لا واطت تزيد تواطي
والأيام ديره وحايفه وجدّاد ** والأيام لعبت خربقة غلّاطي
والأيام هي اللي شيّبت الأولاد ** وعاد المهطّي يقول هذي وطاطي
ومازلت يا سود الهذب نشّاد ** وننحب على اسمك وبيه انهاتي
ونقطع برور الواسعة وأسناد ** مزازات في مزازات برّي خاطي
و يوقد الواقد ما ضنوه أجواد ** و توصل رحلة سفينته للشّاطي
ونار ال قدت تقعد عقاب رماد ** و يقعد الواطي طول عمره واطي
ومازلت باطي ومازال ريحي مابغاش يواطي …….
*****
