01/12/2019
قداش من دينار تخبى على جنب توة مدة باش يتلمّ حق التسكرة...
قداش من دينار تحفتر من سطوش لميمة باش يتوفؤ مصروف للرحلة، للساندويش، للدخان...
قداش من دينار لايت تصب في التالفون باش الكونكسيون تمشي و التصاور يهبطوا بالوقت
قداش من بروشينق تعمل البارح عند الحجامة، و قداش من سلفي تصور و قداش من ستوري فرحانة تحطت على الانستاغرام
قداش من سوايع تعداو البارح من غير نوم و عينين محلولة تستنى في النهار باش يطلع
قداش من تبديلة تقاست و تلوحت على الفرش، لا هاذي خير، لا بالك برد، زعمة شنوة الطقس غادي؟
قداش من مساج تبعث :وينو حميري؟ صطوشي عندك؟ مريولي الازرق...
قداش من ضحكة، من تبسيمة، من توشويشة في الكار، قداش من التركينة من تالي، قداش من خزرة في العينين، قداش من تعنيقة...
قداش من تالفون من عند.ماما و الا بابا: وصلتوا و الا مازلتوا؟
قداش من فجعة، من عيطة، من غصرة موت، قداش من شهادة....الله اكبر....يا ربييييي...قداش من شهادة قبل الموت....
قداش من فرحة تقصفت....قداش من حلم تهدم...قداش من نفس تكتم...قداش من قلب سكت....قداش من دم....قداش من همّ
قداش من خد تندب،قداش من رأس تعرى، قداش من أم تشوات، قداش من بو برك....
قداش من حفرة باش تتحفر غدوة....قداش منك يا قلب....قداش منك يا تونس.... 😐😐😐😐😐
