https://www.facebook.com/839007459816445/

FR FREErider, 萬華區華西街17之4號, Taipei (2026)

26/07/2023

[ 🇹🇼 臺北米其林系列] 小王煮瓜
地址: 台北市萬華區華西街17之4號攤位153號 (華西街觀光夜市)
推介: 魯肉飯
—
👀八點收舖嘅人氣米芝蓮瓜店主打魯肉飯
_
第一次嚟到華西街觀光夜市，要留意唔少人龍店收八點，唔好諗住太夜嚟掃街，依個夜市係台灣本地人比較多。
小王煮瓜主打魯肉飯，先寫點餐紙再去收銀處俾錢，轉頭就有人將餐點拎去你張枱。雖然有室內冷氣空間，但係唔好對衛生有太高要求同期望。
魯肉飯(大)
魯肉飯可選大或小，兩個人的話建議揀大嘅share就可以。肉係極肥，基本上每粒都係脂肪，入口融化。好唔好食見人見智，作為口味較淡嘅香港人，食多幾啖已經覺得幾肥膩。
焢肉飯
焢肉即係一大舊滷肥豬肉，肥膏位入口即溶，豬肉可以一絲絲扯開而唔覺老，脂肪同豬肉比例大約一比一。
焢肉飯有幾片請菜，米飯淋上飯汁，最好兩人分享，飽腹感十足。
滷鴨蛋油豆腐
兩款滷水味道偏鹹。
油豆腐好入味，較乾同實心但係豆味好濃。
滷鴨蛋口感似鐵蛋，蛋白位置極度爽彈，鴨蛋蛋黃亦比雞蛋質感厚身而味道濃好多。

—
味道環境價錢(10): 🐒🐒🐒🐒🐒🐒🐒
值得特別到訪(10): 🐒🐒🐒🐒🐒🐒
—
#台灣 #台北 #台菜 #米芝蓮 #米其林 #夜市 #旅遊 #旅行 #魯肉飯 #滷水 #小吃 #晚餐 #香港美食 #香港

24/07/2023

[🇹🇼 臺北] 鼎泰豐
地址: 台北市信義區市府路45號臺北101購物中心B1層
—
👀開舖時喺附近就食啦食物質素同服務比香港店舖好
_
鼎泰豐臺北101分店長時間都多人，我哋開舖時間左右到等大約20-30分鐘，佢哋會慢慢放人入。再遲少少到就要等非常耐，食物質素合格，職員服務比香港殷勤好多，整體比香港店出色，但係要等咁耐位就唔值喇。
冷菜: 紅燒茄子
餐牌寫咗係季節推介，茄子軟淋唔會食到脷痕，醃得入味，仲有少少肉末。味道唔算極濃，係一道惹味而老少咸宜嘅開胃菜。
冷菜: 香辣牛肚
香辣牛肚微軟煙韌，口感唔錯。牛肚辣味比較輕手，同樣醃得入味。冷菜面有大量炸蒜粒，味道變得極濃味，令到依碟冷菜只有蒜嘅味道。
小籠包
小籠包豬肉鮮甜，皮比香港嘅薄好多，充滿湯汁，質素比香港店好好多。唯略嫌湯汁味道偏淡。
蟹粉小籠包
蟹粉小籠包味道比原味小籠包稍濃，可以唔洗點醋。可惜豬肉肉甜味重，湯汁嘅蟹粉鮮香未夠突出。
乾拌麵: 擔擔麵
麵質幼滑偏硬身，係我哋鍾意嘅軟硬度。第一次以拌麵形式食擔擔麪，醬汁黏稠度極高，亦有一定嘅辣度。唯花生麻醬過多致苦，除咗辣味之外其他風味被完全覆蓋。每一啖麵入口都有苦味，叫人難受。

—
味道環境價錢(10):🐒🐒🐒🐒🐒🐒
值得特別到訪(10):🐒🐒🐒🐒
—
#台灣 #台北 #台菜 #米芝蓮 #米其林 #湯 #飯 #餐廳 #旅遊 #旅行 #晚餐 #香港美食 #香港

24/07/2023

2023我翻嚟喇!!!
去咗幾個地方，有近有遠，會慢慢出post同大家分享一下。

[🇹🇼 臺北米其林系列] 小酌之家
地址: 台北市中山區吉林路420號
推介: 鮑魚烏骨雞湯, 乾煸肥腸
—
👀訂位是必須的必試米芝蓮滋補鮑魚烏骨雞湯
_
很重要，餐廳唔收信用卡，記得帶極之充足嘅現金去。
小店放到五張大枱，無論幾多個人都會俾一張大枱，冇限用餐時間，務必訂座。
當日比較早到嘅關係同老闆傾咗偈，唔少香港人嚟到幫襯佢哋，我哋嘅餸菜選擇交俾老闆揸主意。最後要咗半鍋雞湯同埋兩餸半份炒飯。每碟餸嘅份量非常充足，如果二至四人的話建議最盡要半鍋雞湯、三個餸加一碟飯，相信已經係一傾難忘而美味嘅晚餐。
鮑魚烏骨雞湯
老闆話嚟到兩個人都應該飲半鍋湯，因為依煲湯佢哋贏得米芝蓮嘅美譽，冇可能唔飲嘅。
半鍋鮑魚烏骨雞湯有五顆鮮嫩鮑魚，將鮮味加到雞湯中。雞湯中藥藥材味雖濃但不難接受，當歸氣味撲鼻，入口嘅鮮甜雞湯亦有回甘人參。烏骨煮後肉變軟嫩，每一啖都飲得出唔同藥材同食材嘅層次。
乾煸肥腸
菜館將豆角、豆乾同肥腸炒埋一齊。大腸唔臭係基本啦，油份逼出，外脆內軟，同豆角豆乾炒埋一齊，香口好餸飯餸酒，連我唔食豆角都一啖接一啖。
好推介，好推介！
小酌炒飯
因為我哋得兩個人所以只要半碟飯，不過份量足夠四人分享一人一碗。
看似食材簡單冇乜特別嘅豉油炒飯，出乎意料地好食。飯粒煙韌分明、唔會過油，每粒飯粒都均勻咁黏上醬油，澱粉質愛好者唔可以放過依碟炒飯。
烤軟絲
嚟到台灣冇可能唔食海鮮吧。店員叮囑烤軟絲要熱食。
餐廳用咗最原始方法烹調魷魚，外皮就好似出面賣嘅烘烤魷魚，煙煙韌韌，包住厚嫩而水潤嘅魷魚肉，點美乃滋食。其實只要食材好，還原最根本嘅煮法反而令食材更美味。

—
味道環境價錢(10): 🐒🐒🐒🐒🐒🐒🐒🐒
值得特別到訪(10): 🐒🐒🐒🐒🐒🐒🐒
—
#台灣 #台北 #台菜 #米芝蓮 #米其林 #湯 #飯 #餐廳 #旅遊 #旅行 #晚餐 #香港美食 #香港

11/09/2020

「MARS貼地經濟艙飛機餐全紀錄：🇭🇰 國泰航空暫時最後一個飛機餐review 台港線係咪真係應該叫猶太餐？」
航空公司：國泰航空 CX (經濟客艙)
航線：TPE-HKG
餐食：猶太教餐 Kosher Meal
評論：以前台灣飛香港國泰派雞卷時(依加食飯時間有機會有一兜仔飯同一支水)，有唔少人教人叫猶太教餐，因為猶太教餐係成set上，都幾大盤吓，同嗰袋雞卷曲奇檸茶比就梗係震撼級啦。
Kosher meal又係乜呢? 猶太教徒嘅食物要有好高規格嘅宗教要求，所以一般係預先買定一大堆(即係可以雪一段長時間)，有人訂餐就送上機加熱。佢哋嘅食物講究潔淨(至於詳細啲宗教嘢大家自己上網search啦)，個tray一早包實曬。一上機空姐空少會俾你望吓個封實嘅tray，問你使唔使幫你拆開拎入去加熱。
國泰台港線嘅Kosher Meal係點呢?
有一個封實嘅包裝雜果(真係好好好好甜，我掂一掂已經放低)，仲有一個都係好甜唔知乜料嘅撻，同一粒都係好甜嘅朱古力。
主餐係一兜炸嘢，冇錯，成兜都係炸嘢，食落係似魚糕咁嘅東西，佢俾埋茄汁，同茄汁食係正正常常。不過本大少早就過咗好鍾意食一粒粒嘅炸野嗰個年紀，同埋真係好熱氣。
我覺得：份餐的確比熱袋入面嘅食物多(近嚟國泰好似轉咗唔係派好似棒球棍嘅雞卷喇)，不過我唔見得個份好食，仲極甜又熱級熱氣。想食好些少(真係好少好少)嘅讀者，都係乖乖哋book中午或者黃昏嘅機食粟米魚飯啦。
再唔係，大家唔係好鍾意逼PP lounge㗎咩? 都係飲飽食醉先上機啦～

10/09/2020

「MARS貼地經濟艙飛機餐全紀錄：🇹🇼 長榮航空呢啲就係嗰啲所謂點心喎」
航空公司：長榮航空 BR(經濟客艙)
航線：(圖一) HKG-TPE, (圖二) TPE-HKG
評論：長榮嘅台港線近年都唔係提供熱食。曾幾何時，長榮嘅特別餐海鮮餐好hit㗎，如果你手上有台港線海鮮熱餐嘅相，應該係至少三年前嘅事喇。
依加上嘅凍餐佢哋叫做「點心」，預先pack好嘅野食，多數跟一包「米果」，至於果汁就視乎情況，有段時間就係問先俾，有段時間就係派餐順便派埋，我觀察係去程飛台北派蘋果汁，回程飛香港派橙汁。
講吓兜野食啦，我冇post三文治仔出嚟，望落真係好寒酸(依加小學生開聖誕party?)🙄聽聞仲有幾款唔同嘅所謂「點心」，我遇過兩次「XX酥」同一次意粉沙律。
意粉沙律係出現喺黃昏嘅航班，會飽肚啲呱。嗰兜嘢有D粟米呀豆嗰啲囉，有塊比紙皮厚少少嘅雞扒。印象幾深嘅係：兜嘢非常極度油。
個酥我見過兩次，我覺得都幾災難級(當然唔否認都會有人好鍾意食啦）。用個盒裝三粒貌似批仔，重點係佢係凍㗎。真心偏實(多謝佢俾鐵刀叉我切批，用得著)，料又偏乾。我會用三隻字形容對佢嘅感覺：似石仔💁🏻‍♂️
之前post過中華嘅兒童餐，真係好睇又好食。就算係正常餐，感覺上中華都係比長榮好太多。差不多嘅機票價錢下(唔少時間長榮仲要貴少少)，我一定揀中華。

09/09/2020

「🇮🇳2020年Lonely Planet最佳旅遊城市印度科欽 7: 你可能有興趣知關於印度嘅幾樣野」
1️⃣問題一：印度神油究竟存唔存在？
其實我去科欽之前已經聽聞印度神油唔係印度嘢。不過去到印度都係問咗酒店老細喺邊度有得買。佢話冇，我聽咗一粒鐘分享可以用啲乜會勁啲。我冇興趣知你同老婆啲嘢呀😌
老細呀，我淨係想買支油翻去show比大家睇吓咋：（
2️⃣問題二：印度啲街乾唔乾淨？
落雨水浸係勁污糟，見到直情想嘔。正正常常個街又ok喎，垃圾係有，不過全部踢埋一個角落。
3️⃣問題三：印度人friend唔friendly?
同印度人好易做到friend，佢哋好鍾意羣體活動亦好多嘢講，我覺得佢哋係冇惡意。
不過有樣嘢大家要留意，佢哋冇乜時間觀念，遲一個鐘係好基本嘅事，你約佢哋朝早十點就叫佢哋九點到。佢哋要五點送你翻酒店可能八點仲同你喺個街遊緊。
4️⃣問題四：條街多唔多女人？
少見啦，周街都男人，連去超市都係男人多，如果你見到女人，多數老公或者男朋友榜喺側邊。
5️⃣問題五：有冇啲關於酒店/沖涼或者藥嘅有關內容可以分享吓？
除非你鍾意住dorm，否則我建議大家住酒店，住一晚都係大約一百蚊，間房係非常cheap，不過有個私人地方瞓就好。
沖涼同洗手水唔乾淨，印度人屋企係會裝濾水器。D沖涼洗手水一開係黃毛有鐵鏽味，希望你哋冇傷口啦，有而又冇打過破傷風針嘅話，Good Luck！
一定要帶屙嘔藥，帶定出去，如果你唔放心，頭嗰幾次可以食定，不過你應該過多幾次就放棄再食㗎喇。記住呀，一定要帶定旁身。
6️⃣問題六：飛機係咪有咖哩味？
係，有。好大陣咖哩味，飛機餐係serve咖哩。另外，唔好搭red eye，佢哋係可以唔瞓覺，keep住講嘢，個個都講，好嘈。
7️⃣問題七：當地消費水平如何呀？
唔貴，幾平，錢好似使極都使唔曬。
唔好唱咁多錢，印度買嘢同馬來西亞價位差不多。
8️⃣問題八：可唔可以簡單講關於科欽嘅政治？
科欽係一個共產地方。有個印度阿叔無端端行埋嚟問我邊度嚟，冇耐佢就開始説理喇，
做乜逼我聽你啲政治思想呢？

02/09/2020

「MARS貼地經濟艙飛機餐全紀錄：🇹🇼 中華航空(二) 普通餐唔多啱食」
航空公司：中華航空 CI (經濟客艙)
航線：(圖一) HKG-TPE
餐食：晚餐 Dinner
評論：上一個post同大家分享咗中華嘅兒童餐，兒童餐幾大份幾好食已經講咗，咁依家就俾大家睇吓唔訂特別餐佢份正常餐係點樣啦！
份餐得舊橙味蛋糕仔同熱食。一個鐘到機程你就唔好expect有餐揀，你可以揀食定唔食。
我哋黃昏機係有「豬肉麵」一兜。等我elaborate一吓，係「豬肉絲豉油皇炒麵加菜心」。俾肉絲好大方㗎喇，麵真係好乾吓，加一條黃黃哋嘅菜。唔難食嘅，不過一定要有水先得。
所以話叫兒童餐係明智，有沙律有漢堡扒仲有蕃茄意粉。
不過疫情穩定先算，飛機餐都未必變翻以前咁。

01/09/2020

「MARS貼地經濟艙飛機餐全紀錄：🇹🇼 中華航空(一) 一定揀兒童餐」
航空公司：中華航空 CI (經濟客艙)
航線：(圖一) HKG-TPE, (圖二及三) TPE-HKG
餐食：兒童餐 Children Meal
評論：中華份兒童餐真心極高質，多數我訂完機票第一件事係將正常餐改兒童餐。
有讀者應該會諗：點解CI機特別多人訂特別餐？
或者訂兒童餐嗰啲人應該成日搭，知道中華兒童餐係超大份極好食。
兒童餐有咩呢?有沙律、生果、零食、麵包、主餐同果汁(明顯豐富有誠意過國泰嗰啲囉)，個半鐘有咁多嘢食好難得，次次都食到勁飽先落機。個餐好靚，細路見到一定勁開心(連大人見到都happy，何況小朋友呢)，最緊要係真心好味，難得我讚飛機餐好食喎💁🏻‍♂️。
多數有茄汁意粉同漢堡扒(唔係好薄嗰種亦唔係牛肉)，塊漢堡扒好厚要用刀切😂，好彩嘅話仲會有埋蛋同薯餅添，雖然唔知係乜配搭嚟但咁多嘢食我就已經好開心。
有次回程撞中有蛋包飯，有邊個諗到坐Y又唔係日航ANA竟然有依樣嘢食。包住茄汁炒飯同埋有條腸仔(依次又俾翻烚蛋我喇)，不得不提佢個沙律有時會有埋公仔魚蛋㗎。
下個post講中華台港線嘅正常餐。
唔好怕醜，叫兒童餐啦！同一班機大把大人都係咁叫嘅(例如我☺️)。

28/08/2020

「🇮🇳2020年Lonely Planet最佳旅遊城市印度科欽 6: 幸福嘅感覺或者就係咁?」
科欽係全球十大樂土，唔係冇原因。有一刻望住個海灘，你可以忘記所有煩惱，聽吓海浪嘅聲音，玩嘅人嘅笑聲。
揸兩個幾鐘車去印度國家級泳灘Cherai Beach，去到嘅時候人極多，都算幾逼，啲人一大group一大group，有老有嫩，一齊睇日落，或者喺海邊玩水。
個beach唔太大，但一定大過香港嗰啲，望住個天橙黃太陽落山，之後漸漸變紫，漸漸變深藍入黑。
嗰刻我明白到心靈富足為人帶來嘅快樂。唔需要乜物質或者甜言蜜語，好舒服好滿足。

20/08/2020

「🇮🇳2020年Lonely Planet最佳旅遊城市印度科欽 4: 咁勇敢喺街邊等印度嘢?」
點解咁勇當時會揀食街邊嘢😂窮嘛，依個烤餅先港幣5蚊。
酒店附近又冇乜嘢食，入黑又有少少恐怖，臨出門口問過host附近嘅餐廳還可以(問心我唔覺得係餐廳囉)。叫嘢食都雞同鴨講，唔上枱都唔知食乜，烤餅要用手拿，不過見個水籠頭應該污糟過我對手，我放棄😂，我已經有心理準備嗰晚會屙到腳仔軟。
烤餅包住係素菜咖哩，我覺得唔辣。老細教我點食，逐小小逐小小點汁食，其中一個汁好似yogurt，另一個係辣椒汁呱，唔難食，一世人食過一次印度街邊嘢，心滿意足了。
佢哋又好老實冇見遊客就開貴啲個價，我一食完就一支箭衝翻去stay️嗰度食定D腸胃藥，最後冇事。☺️
南印度家庭食乜呢?幾個重點，一係南印嘅人唔同北印，食魚食肉；二係香料味重，食物偏辣偏鹹偏甜；三係又煎又炸，油好似唔使錢咁。Masala Fish真係呢，我諗咗好耐好冇食印度游水魚🐟，最後豁出去，條魚勁好食，又滑又有油脂(原來印度有黃立倉嘅😂）。另外有勁重口味幾鹹嘅香料煎雞(其實我會話係炸囉🙄)，雞又肥又滑嘅，但個皮幾燶，曬哂。個甜品係一碗傳統印度糖水，甜到有D誇張，另外奶味極濃，唔係太啱我口味。
最後想介紹Biryani印度炒飯，自此愛上咗佢。印度米炒飯一流，粒粒分明又好咬，同咖哩炒又唔太辣好香，當地friend好介紹呀。魚炒飯最正，魚又厚肉又冇骨。炒飯係喺印度好common，超市熟食檔一定買到，又飽又抵食。

19/08/2020

「🇮🇳2020年Lonely Planet最佳旅遊城市印度科欽 3: 原來水浸係咁款」
臨走嗰日撞正水浸，經歷過嘅我終於明點解印度人咁多露趾鞋。
話說最後一日之前嗰晚落狗屎，當然last day所有活動要cancel曬啦 (不過活動單位冇取消囉)。喺房個窗望出去都知誇張，朝早勁驚嗰日去唔到機場 (架車點開，大佬?)。
原來酒店個位已經好好，浸咗我一半小腿，出面其他地方係浸到條腰。唔可以唔講D水係啡色好恐怖，我對腳濕咗成日到機場先可以除鞋襪吹乾。
Agent好好提早開架車嚟，竟然有車呀！
架車望落幾靚，比啲污糟水浸咗一半，架車邊行邊飄，好似坐船咁，啲水個面有啲垃圾飄來飄去，勁喎啲水冇入架車。司機去到某啲少水位就跳落車望吓有冇嘢刮花架車。
嗰邊啲車同巴士都照開，咁樣應該好易壞，係咪? 路邊有唔少壞車(嗰兩個幾鐘幾驚壞嗰架係我嗰架🙄)，唔少地方水多到唔行得車，又有啲地方淨係大車可以行而電單車唔行得。除咗印度交通警外，唔少司機同市民自發指揮交通，好佩服佢哋work together條路啲車都照行到。
不過最後仍然都要講句，唔好雨季去。雨一係唔落，一落就落狗屎，你哋一樣唔會接受到啲水。😂

06/08/2020

「MARS貼地經濟艙飛機餐全紀錄：🇻🇳越捷航空買餐筆錢使得過」
航空公司：越捷航空 VN
航線：(圖一) HKG-SGN, (圖二) SGN-HKG
餐食：付費餐食 Pre-purchase Meal
評論：其實我去程上機前喺泰航個lounge食飽咗同飲酒飲到wing wing哋先上機。😂但飛機餐買機票時已經買咗，所以仍然會食咗佢。網上預訂都40蚊港紙，香港消費水平來講當然濕濕碎，但對當地普通市民來講就絕對唔平。結論係，會餓嘅就訂定啦，味道可以接受(一定好食過CX兒童餐兜螺絲粉先)。
越捷一樣有亂派餐亂賣餐嘅情況，網上買咗餐嘅乘客要跟緊啲。冇派餐而一見佢哋推餐車就即刻出聲。
收費餐係會送樽裝水一支，啱喇水係極度極度重要。去程要咗泰式雞肉炒飯，事實係唔多好食，兜飯酸之餘只係暖，唔係熱，加埋另外包豉油味道叫做好啲。回程個蟹肉粉絲反而幾好食(佢冇講有蝦，其實我唔食得蝦片起咗💁🏻‍♂️)，有蒜味，加咗個甜辣醬好香，粉絲唔乾，依個我係真心推介嘅。
至於越捷有乜特色呢，空姐靚女空少靚仔，件衫好靚。而飛機方面大家都係坐三個鐘都唔需要乜service啦。

FR FREErider

26/07/2023

24/07/2023

24/07/2023

11/09/2020

10/09/2020

09/09/2020

02/09/2020

01/09/2020

28/08/2020

20/08/2020

19/08/2020

06/08/2020

Address

Website

Alerts

Contact The Business

Shortcuts

Share

Category