04/23/2020
ခေါင်းဆောင်ကောင်းတွေ ပြောလေ့မရှိတဲ့ စကားများ
================================
(၁) ဒီနေရာမှာ ငါက အကြီးအကဲပဲ။
ဒီလို အာဏာပြတဲ့စကားမျိုးတွေကို ခေါင်းဆောင်ကောင်းတွေ ပြောလေ့မရှိပါဘူး။ ဒါပေမယ့် ကိုယ့်လက်ထဲမှာ ပါဝါတစ်ခုခုရှိတယ်ဆိုတာကို
အရှိန်အဝါကနေတစ်ဆင့်တော့ ပြတတ်ပါတယ်။ ဒီလို စကားလုံးတွေကနေတော့ မောက်မာလေ့မရှိပါဘူး။
(၂) ဒါဟာ မဖြစ်နိုင်ဘူး။
မဖြစ်နိုင်ဖူးဆိုတဲ့စကားကို ကိုယ်ကသုံးလိုက်ပြီဆိုတာနဲ့ ကိုယ့်လက်အောက်ကလူတွေအတွက်တော့ စိတ်ဓါတ်ကျစရာ ဖြစ်သွားနိုင်ပါတယ်။
ခေါင်းဆောင်ကောင်းတွေအတွက် ခက်ခဲတယ်ဆိုတဲ့ အခြေအနေမျိုးကိုသာ ပြောလေ့ရှိပြီး ဘယ်လိုရင်ဆိုင်မယ်ဆိုတဲ့စကားကိုသာ ပြင်ဆင်ထားသင့်ပါတယ်။
တကယ်ကို အခြေအနေ အကြောင့်ကြောင့် ဖြစ်နိုင်ဖို့ ခဲယဉ်းမယ်၊ မဖြစ်နိုင်လောက်ဖူးဆိုရင်လည်း ပါးပါးနပ်နပ်ပဲ ရှောင်လွှဲသွားသင့်ပါတယ်။
ကိုယ့်လက်အောက်ငယ်သားတွေ စိတ်ဓါတ်ကိုထိခိုက်စေမယ့် စကားမျိုးတော့ ရှောင်ကြဉ်သင့်ပါတယ်။
(၃) တခြားအကြံဥာဏ်မလိုတော့ဘူး။
ကိုယ်သိ၊ ကိုယ်တတ်ဆိုတဲ့ ခပ်ညံ့ညံ့ခေါင်းဆောင်တွေ ပြောတတ်တဲ့စကားပါ။ တကယ့်ခေါင်းဆောင်ကောင်းတွေကတော့ နောက်လိုက်တွေရဲ့
အကြံပေးစကားနဲ့ ထင်မြင်ယူဆချက်တွေကို အမြဲတစေ စောင့်ကြည့်နားထောင်နေတတ်ပါတယ်။ အကြံဥာဏ်တွေ ပေးနိုင်အောင်လည်း
အမြဲ အားပေးလေ့ရှိပါတယ်။
(၄) ငါပြောတဲ့အတိုင်းလုပ်။
ဘာစည်းကမ်းမှ မချိုးဖောက်နဲ့။ ဘာမှ အထွန့်မတက်နဲ့။ ငါပြောတဲ့အတိုင်းလုပ် ဆိုတာမျိုးက ကိုယ့်နောက်လိုက်တွေရဲ့ စွမ်းအားကို
ကန့်သတ်လိုက်တာပါပဲ။ သာမန် ရေလိုက်ငါးလိုက် နောက်လိုက်တွေအတွက်လည်း တိုးတက်မှုမရှိတော့သလို တကယ်ထက်မြက်တဲ့ နောက်လိုက်တွေ
အတွက်ဆိုရင် စိတ်ဓါတ်ကျဆင်းစရာတောင် ဖြစ်သွားနိုင်ပါတယ်။
(၅) ဂရုမစိုက်ဘူး။
ဘာပဲဖြစ်ဖြစ် ဂရုမစိုက်နိုင်ဘူးဆိုတဲ့စကားက သာမန်လူတွေ ပြောရင်တော့ သာမန်စကားပဲဖြစ်ပါတယ်။ ဒါပေမယ့် ခေါင်းဆောင်တစ်ယောက်
ပြောလိုက်ရင်တော့ ဒါဟာ တာဝန်မဲ့တဲ့စကား၊ ဗရမ်းဗတာနိုင်တဲ့စကား ဖြစ်သွားပါတယ်။ ခေါင်းဆောင်ကောင်းဆိုတာ အခြေအနေအရပ်ရပ်တိုင်းအပေါ်ဂရုစိုက်မှု အပြည့်အဝရှိရပါမယ်။
(၆) အားလုံး ပြီးပြည့်စုံသွားပြီ။
ခေါင်းဆောင်ကောင်းတွေဟာ "မင်းတော်တယ်။ မင်းလုပ်တာကောင်းတယ်" ဆိုတဲ့ ချီးကျူးစကားတွေကို မကြာခဏပြောလေ့ရှိပါတယ်။ ဒါပေမယ့်
အားလုံး ပြီးပြည့်စုံသွားပြီဆိုတဲ့စကားကိုတော့ ပြောခဲပါတယ်။ တော်ရုံတန်ရုံနဲ့ ပြီးပြည့်စုံမှုဆိုတာ မဖြစ်နိုင်သလို၊ ဘယ်တော့မှလည်း သူတို့ဟာ
ကျေနပ်သွားတယ်လို့မရှိတဲ့အတွက် ဒီစကားကိုတော့ ပြောလေ့ပြောထသိပ်မရှိပါဘူး။
(၇) ငါ့ဟာငါ လုပ်မယ်။
ထက်မြက်တဲ့သူတွေရဲ့ ပြဿနာဟာ သူများလုပ်ရင် စိတ်တိုင်းမကျတတ်ခြင်းနဲ့ ကိုယ့်ကိုယ်ကိုသာ ယုံကြည်အားကိုးတတ်ခြင်း ပါပဲ။ သာမန် လူတော်၊လူထက်
လုပ်မယ်ဆိုရင် ဒီအကျင့်က ကောင်းပါတယ်။ ဒါပေမယ့် ခေါင်းဆောင်တစ်ယောက် လုပ်တော့မယ်ဆိုရင်တော့ ဒီအကျင့်က သင့်အတွက် လုံးဝကို ဖျောက်ပစ်ရမယ့်
အကျင့်ပါ။ သင့်နောက်လိုက်တွေကို အခွင့်အရေးပေးရပါမယ်၊ ယုံကြည်မှုတွေ ပေးနိုင်ရပါမယ်။ နည်းပေးလမ်းပြမှုတွေ လုပ်နိုင်ရပါမယ်။ ဒါမှ ခေါင်းဆောင်ကောင်းတစ်ယောက်
ပီသနိုင်ပါလိမ့်မယ်။
(၈) မလုပ်နိုင်ဘူး။
"ငါမလုပ်နိုင်ဘူး" ဆိုပြီး ခေါင်းဆောင်ကောင်းတစ်ယောက် ပါးစပ်က ထွက်ကျလာမယ်ဆိုရင် သူ့အဖွဲ့ဟာ ဘယ်တော့မှ ဒီကိစ္စကို လုပ်နိုင်တော့မှာ မဟုတ်ပါဘူး။
(၉) မောင်မောင်က မင်းထက်ပိုတော်တယ်။
ဘယ်သူဘယ်ဝါက ဘယ်သူ့ထက် ပိုတော်တယ်ဆိုတဲ့ နှိုင်းယှဉ်မှုဆန်တဲ့စကားတွေကို ဘယ်ခေါင်းဆောင်ကောင်းကမှ မပြောတတ်ပါတယ်။ ဒါဟာ
နောက်လိုက်တွေအတွက်တော့ အင်မတန်ဆိုးဝါးတဲ့စကားပါပဲ။ ခေါင်းဆောင်ကောင်းတွေဟာ တော်တဲ့သူကို အသိအမှတ်ပြုတယ်၊ အားနည်းတဲ့သူကို
လက်တွဲခေါ်ပါတယ်။
(၁၀) ငါ့မှာ အချိန်မရှိဘူး။
ခေါင်းဆောင်တစ်ယောက်အနေနဲ့ တာဝန်ကြီးကြီးယူရလေလေ အချိန်မရှိလေလေဆိုတာ နားလည်ပါတယ်။ တစ်ခါတစ်လေ စဉ်းစားစရာတွေ များတဲ့အခါစိတ်မရှည်ဖြစ်တာမျိုးလည်း ရှိနိုင်ပါတယ်။ ဒါပေမယ့် ကိုယ့်နောက်လိုက်တစ်ယောက်ရဲ့ အကြောင်းကိစ္စတစ်ခုခုကို ငါ့မှာ အချိန်မရှိဘူးဆိုပြီး တုံပြန်လိုက်မယ်ဆိုရင်တော့ သင်ဟာ ခေါင်းဆောင်ကောင်းမပီသနိုင်တော့ပါဘူး။
လက်ရှိမှာ ခေါင်းဆောင်လုပ်နေရတဲ့သူတွေနဲ့.. အနာဂတ်မှာ ခေါင်းဆောင်ဖြစ်မယ့်သူတွေအတွက် အကျိုးရှိနိုင်စေဖို့ မျှော်လင့်ပါတယ်။
___________________
လေးစားမှုများဖြင့်..
ရွှေညာမောင် (Junior Boss)
Ref: MG
