24/04/2026
Bravo, lavdi u qoftë, gjykatësit Ngadhnjim Arrni dhe Prokurorisë speciale, për "kryqëzimin" e terroristëve serbë!
Një fije shprese për një kthesë të madhe në rivënien e drejtësisë, ndëshkimin e krimit serb dhe ekspansionit hegjemon e gjenocidal të Serbisë!
Gjykata e Kosovës i ka dhënë një ndëshkim meritor pjesëmarrësve në krimin shtetëror serb ndaj Kosovës, për sulmin në Banjë, në veri të Kosovës, i kryer më 24 shtator 2023.
Një sulm shtetëror i Serbisë, i cili dështoi, duke rezultuar me vrasjen e së paku tre serbëve dhe plagosjen e disave, ndërsa në çastin e sulmit forcat serbe kishin vrarë policin Afrim Bunjaku, u plagos polici Alban Rash*ti, dhe ishin lënduar policët Çlirim Sahiti, Mirsad Kryeziu dhe Sedat Dushi.
Udhëheqësi i sulmit shtetëror serb në terren ishte Milan Radojçiqi, por nën komandën e institucioneve më të larta të shtetit serb!
Radojçiqi konsiderohet vegël kriminale e kriminelit Aleksandër Vuçiq, përveç se zëdhënës i Millosheviçit veç tjerash ka marrë pjesë në vrasjen e fëmijëve në Bosnje!
“Të akuzuarin Blagoje Spasojeviq e gjykon me dënim me burgim të përjetshëm, të akuzuarin Vlladimir Tolliq e gjykon me dënim me burgim të përjetshëm, të akuzuarin Dushan Maksimoviq e gjykon me dënim me burgim me kohëzgjatje prej 30 viteve”, ka thënë të premten gjykatësi Arrni duke shqiptuar dënimet kapitale për terroristët serbë!
Ndërsa prokurori është zotuar për kapjen e të gjithë atyre që morën pjesë drejtpërdrejt në sulm, raportojnë mediat.
“Gjithë ata të cilët kanë urdhëruar, kanë financuar edhe kanë koordinuar këtë sulm, sulmin e datës 24 shtator 2023, do të përgjigjen para organeve të drejtësisë”, ka thënë Abazi.
Prokuroria Speciale më 11 shtator 2023 ka ngritur aktakuzë ndaj Milan Radoiçiq dhe 44 të tjerëve, ndërsa, para pak ditësh është arrestuar edhe një i dyshuar për pjesëmarrje në sulmin shtetëror serb ndaj sovranitetit dhe integritetit të Kosovës!
