24/06/2023
المحادثة اللي في الصورة بيني انا وزبون يشتكي من اقمشتنا ..
تقريبا هذا ثالث زبون من يوم فتحنا المحل يشتكي ..
وغالبا الزبون المشتكي يجي مهاجم وغاضب .. فلما اساله ليش وكيف وبعض التفاصيل .. تكتشف ان المشكلة مش هي من القماش ..
فمثلا اول زبون بيصيح ايش من ثوب اديت لي .. وهذا وانا صاحبك و و و .. فلما سالته ايش المشكله .. قال كلما البسه يطلع فوقي فستان مشو ثوب .. وبعد نقاش خفيف .. نكتشف ان الخياط اللي خيطه هو اللي لعب بالمقاس مش المشكلة في القماش 🤦
والزبون الثاني دخل للمحل وبيصيح ايش من اقمشة شمات اديتهن لي في رمضان و و و .. حاولت افهم منه ليش وايش الشمات وايش المشكلة عشان اعوضه .. جلس يتهرب ولا رضي يدي خبر .. في الاخير اشترى ٣ اقمشة من جديد واكتشفت ان الزوبعه حق البداية ويفجعني اني نكبته عشان اخفض له وامشي هذولاء بنقص قوي 😅
مع انه لو بضاعتنا شمات .. ايش رجعك 🤔
والزبون الثالث ..
امامكم في المحادثة .. شوفوها واحكموا
باختصار ..
كلمتين حابب اوجهها لضيوف محلنا وكل شخص ناوي يشتري مننا ..
ياحبيب افهم نفسك
افهم ايش تحب
تحب خشخاش او ناعم
فاتح او غامق
ابيض او ملون
صيفي او شتوي
وبعد هذا
اختار مخيط محترم .. لاتدور الرخيص وبعدين تشكي من القماش .. لان في خياطين ممكن يطلع لك الطربال حاجه فاخره .. وفي بعض خياطين يطلع الذهب حديد
لذا احنا معانا خياطين محترمين نتعامل معاهم ونرسل زبائننا لهم عشان نضمن خدمة كاملة ..
واعرف ياحبيب ..
انه احيانا اذا طلع شي في القماش او الخامة او اللون ماعجبك .. او النتيجة النهائية للثوب ماعجبتك
هذا لايعني ان احنا غشيناك وضحكنا عليك وركبناك متر
لانه احيانا تشتري برتقال وانت تحب التفاح .. وترجع تلعن صاحب الفواكه لاسابع جد لان طعم البرتقال ماعجبك
مع ان الخلل مش في البرتقال وانما الخلل عندك مافهمت نفسك واختياراتك ورغباتك ..
يكون الخلل يكون من صاحب الفواكه لما يبيع لك تفاح معفن .. او يقلك هذا تفاح بلدي ويطلع خارجي .. او او
مش لانه باع لك برتقال وانت تحب التفاح فهو غشاش 😅
فركز ياحبيب .. لان احنا مانشتيش نخسرك
ولا نشتي تشتري شي مننا مش عاجب لك او ماتلبسه او تندم انك شليته
زلطك انت اولى بها وبضاعتنا عيدي الله لها من يحبها ..
وعموما اي زبون يشكي او يحس انه مغلوب معانا يبشر بتعويض من العيون .. لانه قوي جدا يهمني تلبس وانت مرتاح وحابب مااشتريته ومالبسته 💙
وسلامتكم
نسيج هادي Nasij Hadi
