01/09/2022
Lee-Verno nou al drie maande weg
GEMSBOK-UPINGTON: Dit is byna drie maande sedert Lee-Verno van Wyk se familie die 5-jarige seun laas gesien het.
Die familie het gesê hulle het nog nie opgegee om te hoop hy sal terugkeer nie.
Die 5-jarige seun van Louisvale het Dinsdag, 31 Mei, verdwyn terwyl hy saam met sy vriende gespeel het.
Sy oom, Maxwell van Wyk, het destyds aan die media gesê die graad R-leerling het ná 12:30 van die skool af gekom, sy skooltas neergesit en vertrek om te gaan speel.
“Hy en sy neef en nog ‘n vriend het gaan speel. Hulle het by die treinspoor gaan speel, waar daar vir ons gesê is dat nog vriende hulle ontmoet het. Later het die klein niggie huis toe gekom en sy het gesê Lee-Verno speel nog met sy vriende,” het Van Wyk gesê.
Hy het gesê kommer het toegeneem namate die seun nie huistoe gekom het nie.
Toe sy oom ná 16:00 van die werk af aankom, was Lee-Verno se ma, Lie-en van Wyk, reeds opsoek na haar seun. Lee-Verno is een van vyf kinders.
Maxwell het onlangs aan IOL gesê hulle glo Lee-Verno leef nog.
“Dit is twee maande en drie weke sedert Lee-Verno, beter bekend as Boeta, vermis geraak het.
“As ‘n gesin glo ons dat hy moontlik ontvoer is, want as hy dood moes wees, sou ons reeds ‘n lyk gekry het. Tot vandag toe het ons niks gevind nie. Die polisie het die soektog opgeskort, maar hul ondersoek na sy verdwyning duur steeds voort,” het Maxwell gesê.
Hy het gesê Lee-Verno se verdwyning was moeilik vir almal in die familie, veral sy bababoetie en oupa.
“Dit is baie moeilik vir sy bababoetie om te verstaan hoekom Lee-Verno nie huistoe gekom het nie.
“Dit is ook uiters moeilik vir sy oupa wat hom grootgemaak het, maar ons familie sukkel almal om dit te verwerk.
Lee-Verno se ouers is sedertdien terug werk toe om besig te bly, maar wat ’n mens kry is die feit dat ’n mens snags lê en wonder waar hy is. Het hy warm klere? Het hy iets om te eet? Waar slaap hy? Is hy warm genoeg gedurende hierdie tyd?” sê Maxwell.
Die familie doen ‘n beroep op enigiemand met inligting om na vore te kom.
Indien iemand klein Lee-Verno van Wyk gesien het of weet waar hy hom bevind, kontak asseblief vir Maxwell van Wyk by 076 420 8183 of mev Solomons by 069 120 3804.
